މައްސަލަ ބޮޑު ސ. ހެރަތެރަ ރިސޯޓް ސިންގަޕޫރުގެ ކުންފުންޏަކަށް ވިއްކާލަން ނިންމި ގޮތް، އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަަށައިފި އެވެ.
އެ ރިސޯޓް ވިއްކާލަން އެމްޓީޑީސީން އިއުލާން ކުރުމުން ކުރިމަތިލި ހަތަރު ފަރާތުގެ ތެރެއިން އެންމެ ބޮޑު އަގެއް ހުށަހެޅީ، 33 މިލިއަން ޑޮލަރަށް ސިންގަޕޫރުގެ ކޭނަރީޒް ޕްރައިވެޓް ލިމިޓެޑުންނެވެ.
އޭސީސީން ބުނީ ހެރަތެރަ ސިންގަޕޫރު ކުންފުންޏަށް ވިއްކާލާ ގޮތް ބަލަނީ އެއީ ދައުލަތުގެ މިލްކެއް ހިމެނޭ ވަރަށް ބޮޑު މުއާމަލާތަކަށް ވުމުން އެ ކޮމިޝަނުން އަމިއްލަ އަށް އިސްނަގައިގެން ކަމަށެވެ.
އެގޮތުން އެ ރިސޯޓް ވިއްކާލުމުގެ ބިޑިން ޕްރޮސެސް ހިނގާ ދިޔަ ގޮތް ބަލައި ދިރާސާކުރަމުން އަންނަ ކަމަށް އެ ކޮމިޝަނުން ބުންޏެވެ.
އެހެން ނަމަވެސް އެ ރިސޯޓް ވިއްކާލުމުގެ މުއާމަލާތްތައް މަޑުޖައްސާލާކަށް އަންގައިފައެއް ނުވެ އެވެ.
އެމްޓީޑީސީން 55 މިލިއަން ޑޮލަރު ހަރަދުކޮށްގެން 2007 ވަނަ އަހަރު އޮޕަރޭޓް ކުރަން ފެށި ހެރަތެރަ ރިސޯޓް ގަތުމަށް އިއުލާން ކުރުމުން ކުރިމަތިލީ ސިންގަޕޫރުގެ ކޭނަރީޒްގެ އިތުރުން އެ ގައުމުގެ އިތުރު ކުންފުންޏަކާއި ޗަމްޕާ ހުސެން އަފީފްގެ، ޓްރީޓޮޕް މޯލްޑިވްސް އަދި މެލޭޝިޔާގެ އަމިއްލަ ފަރާތަކުންނެވެ.