އެމްއީސީ ބަދަހި ކަޕް 2022، ނެޓްބޯޅަ މުބާރާތުގައި މިހާތަނަށް ކުޅުނު ހުރިހާ މެޗަކުން މޮޅުވެގެން އެމްކޭ އާއި ހުޅުމީދޫ ޕޮލިސް ރެކްރޭޝަން ކުލަބުން ފައިނަލަށް ދަތުރުކޮށްފި އެވެ.
މި މުބާރާތުގައި އެމްކޭ އިން ތިން މެޗް ކުޅެފައިވާއިރު ތިން މެޗްގައި ވެސް ބޮޑު ތަފާތުކުން އެމްކޭ ކާމިޔާބުކުރި އެވެ. އެމްކޭއިން ފައިނަލް ކަށަވަރުކުރީ އެޗްއެސްސީ އާއި ހުޅުދޫ ޔޫތާއި ކްލަބް ވެމްކޯ އާއި ބައްދަލުކުރި މެޗުން މޮޅުވެގެންނެވެ.
ހުޅުމީދޫ ޕޮލިސް ރެކްރޭޝަން ކުލަބުން ފައިނަލަށް ދިޔަކަން ކަށަވަރުކުރީ އެޗްއެސްސީ އާއި ހުޅުދޫ ޔޫތާއި ކުލަބް ވެމްކޯ އާ އެކު ކުޅުނު މެޗުން ވެސް މޮޅުވެގެންނެވެ.
މި މުބާރާތުގައި ކުޅޭ ފަސް ޓީމުންވެސް ކޮންމެ ޓީމެއްވެސް އަނެއް ޓީމާ ބައްދަލުކުރާއިރު ފައިނަލްގެ ކުރިން މިރޭ އަދި ދެ މެޗް ކުޅޭނެ އެވެ. މިރޭ ކުޅުމަށް ހަމަޖެހިފައިވަނީ އެޗްއެސްސީ އާއި ކްލަބު ވެމްކޯ ބައްދަލު ކުރާ މެޗްގެ އިތުރުން ހުޅުމީދޫ ޕޮލިސް ރެކްރޭޝަން ކްލަބާއި އެމްކޭ އެވެ.
މުބާރާތުގެ ފައިނަލް ކުޅުމަށް ހަމަޖެހިފައިވަނީ އަންނަ ހުކުރު ދުވަހުގެ ރެ އެވެ.