ޝާހްރުކް ހާން މިހާރު ކުޅެމުން އަންނަ ފިލްމް "ހެޕީ ނިއު އިޔާ" ގެ ޝޫޓިންއެއްގައި މިއަދު އުޅެނިކޮށް އަނިޔާވެގެން ހޮސްޕިޓަލްގައި ފަރުވާ ދޭން ފަށައިފި އެވެ.
މިކަން ޝާހްރުކްގެ އޮފީހުން ނެރުނު ސްޓޭޓްމަންޓެއްގައި ވެސް ވަނީ ކަށަވަރުކޮށް ދީފަ އެވެ.
އެ ބަޔާނުގައި ބުނެފައި ވަނީ 48 އަހަރުގެ ޝާހްރުކަށް އަނިޔާވުމާ ގުޅިގެން ޑރ. ބަލަބާއީ ނަނާވަތީ ހޮސްޕިޓަލްގައި އެޑްމިޓްކޮށް ފަރުވާ ދެމުން އަންނަ ކަމަށެވެ. އަދި އޭނާ އޮތީ ހޮސްޕިޓަލްގެ ފިޒިއޮތެރަޕީ ޑިޕާޓްމަންޓްގައި ކަމަށް ވެސް ޝާހްރުކްގެ އޮފީހުން ނެރުނު ބަޔާނުގައި ބުނެ އެވެ.
އެކަމަކު ލިބުނު އަނިޔާގެ އެއްވެސް ތަފުސީލެއް ހާމަކޮށްފައެއް ނުވެ އެވެ. ބަޔާނުގައި ބުނެފައި ވަނީ "ޝޫޓިން ކުރަނިކޮށް މައިނާ އިންޖަރީއެއްވީ" ކަމަށެވެ.
"އެހެން ނަމަވެސް އޭނާގެ ހާލު މިހާރު ރަނގަޅު." ބަޔާނުގައިވެ އެވެ.
ފަރަހް ހާން ޑައިރެކްޓް ކުރާ "ހެޕީ ނިއު އިޔާ" ގައި ޝާހްރުކްގެ އިތުރުން ދީޕިކާ ޕަދްކޯން، އަބިޝެކް ބައްޗަން، ސޯނޫ ސޫދު، ވިވާން ޝާހް އަދި ބޮމަން އިރާނީ މުހިއްމު ރޯލްތަކެއް އަދާ ކުރެ އެވެ.
މި އަހަރުގެ ދިވާލީގައި ރިލީޒް ކުރާ މި ފިލްމުގެ ފުރަތަމަ ޕޯސްޓަރު މި މަހުގެ 1 ވަނަ ދުވަހު ވަނީ އާންމުކޮށްފަ އެވެ.