ވ. އާރަށް ކުއްޔަށް ދޫކުރުމުގެ ހިންގާފައިވާ ކަމަށް ތުހްމަތު ކުރެވޭ ކޮރަޕްޝަނުގެ އަމަލާ ގުޅިގެން، އެމަނިކުފާނުގެ މައްޗަށް އުފުލާފައިވާ ދައުވާ ސާބިތުކުރުމަށް ދައުލަތުން ހުށައެޅި ހެކިން ކޯޓަށް ހާޒިރުކޮށްފި ނަމަ މި ފަހަރުވެސް އެމީހުން ދާން ޖެހޭނީ ބޭޒާރުވެގެންކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ކޮމަންޑޫ ދާއިރާގެ ބައި އިލެކްޝަނުގައި ޕީޕީއެމްގެ ކެންޑިޑޭޓް ވާދަކުރާ ކެންޑިޑޭޓަށް ތާއީދު ހޯދުމަށް ރޭ ޕީޕީއެމް އިން މާލޭގައި ބޭއްވި ބައްދަލުކުރުމެއްގައި ރައީސް ޔާމީން ވަނީ އެމަނިކުފާނާ ދެކޮޅަށް ކޯޓުގައި ހިނގަމުންދާ މައްސަލައަށް ފާޑު ވިދާޅުވެ ވާހަކަފުޅު ދައްކަވާފަ އެވެ.
"ލައިވްކުރީމަ ދިވެހި ރައްޔިތުންނަށް، ދިވެހި ސަރުކާރަށް އެނގެނީ، ކިހާވަރެއްގެ ކަމެއްކަން ހިނގަމުން މިދަނީ. މި ޝަރީއަތް ލައިވްކޮށްފިއްޔާވެސް މިހާރުވެސް މި ދަންނަވަނީ، ޝަރީއަތް އަދިކިރިޔާ ފެށުނީ، ދައުލަތުން ހެކީގެ ގޮތުގައި އުފައްދައިގެން އެ އުޅޭ ހެކިން އައިސްފި ކަމަށްވަންޏާއި ހެކިދޭއިރު އެމީހުން ފަޞީލަތްވެ، ބޭޒާރުވެގެންދާނީ. ހަމަ ބޭޒާރުވެގެންދާނީ. ކުރީ ޝަރީއަތުގައިވެސް ވީ ހަމަ އެހެން،" ރައީސް ޔާމިން ވިދާޅުވި އެވެ.
މިފަހަރުގެ ޝަރީއަތް ލައިވް ނުކުރަން އެ މައްސަލަ ބައްލަވާ ގާޒީ ނިންމަވާފައިވާ ނިންމެވުމަށް ވަރަށް ބޮޑަށް ފާޑު ވިދާޅުވެ އެ ނިންމުމަކީ ނުފޫޒުން ކުރި ކަމެއްކަމަށް ދޭހަވާ ގޮތައް ރައީސް ޔާމިން ވިދާޅުވި އެވެ. ރައީސް ޔާމިން ވިދާޅުވީ އެމަނިކުފާނުގެ މައްޗަށް އުފުލާފައިވާ ދައުވާގެ ޝަރީއަތް ލައިވްކުރީމަ ހިނގަމުންދަނީ ކިހާ ވަރެއްގެ ކަމެއްކަން ދިވެހި ރައްޔިތުންނަށާއި ސަރުކާރަށް އެނގޭނެ ކަމަށާއި ލައިވް ނުކުރަނީޫ އެހެންވެ ކަމަށެވެ.
އެހެންވެ އެމަނިކުފާނު ކުރައްވާ އެ މަސައްކަތްޕުޅަކީ ދައުލަތުގެ މުވައްސަސާތަކަށް ނުފޫޒު ފޯރުވުން ހުއްޓުވުން ކަމަށް ވެސް ވިދާޅުވި އެވެ.
" ދަންވާލަން މި އުޅޭނީ މިއީ އޭ އަޅުގަނޑުމެން އިދިކޮޅުގައި ތިބެގެން މި ސަރުކާރު ޖަވާބު ދާރީ ކުރުވުމަށް ހާއްސަކޮން ރައީސުލް ޖުމްހޫރިއްޔާ ދައުލަތުގެ މުވައްސަސާތަކަށް އަތްބާނައިގެން މިކުރާ ކަންތައްތައް ހުއްޓުވުމަށްޓަކައި ކުރާ މަސައްކަތް އަޅުގަނޑުމެން މިކުރަނީ،" ޔާމީން ވިދާޅުވި އެވެ.
ރައީސް ޔާމިންގެ މައްޗަށް ދައުލަތުން އުފުލާފައިވާ ރިޝްވަތު ގަބޫލު ކުރުމާއި މަނީ ލޯންޑްރިންގެ ދައުވާގައި ބުނެފައިވަނީ ވ.އާރަށް ކުއްޔަށް ހިފި ފަރާތުގެ ކިބައިން ރިޝްވަތުގެ ގޮތުގައި އެއް މިލިއަން ޑޮލަރު ޔާމިނަށް ލިބިވެވަޑައިގެންފައިވާ ކަމަށެވެ. އަދި އެ ފައިސާ އެމަނިކުފާނު ލޯންޑާ ކުރެއްވި ކަމަށް ދައުވާގައި ބުނެފައިވެ އެވެ. އެ މައްސަލައިގެ އަޑުއެހުންތައް ކުރިއަށް ގެންދަން ތާވަލުކޮށްފައިވާ ގޮތުން ކްރިމިނަލް ކޯޓުން އެ މައްސަލައިގައި ހުކުމް ކުރާނީ މި އަހަރު ފަހުކޮޅު އެވެ.