ރައީސުލް ޖުމްހޫރިއްޔާ ކަމުގައި ހުންނެވިއިއިރު ނުދައްކާ ސިއްރުކުރި ވާހަކަތައް މިހާރު ނުދައްކަވާ ނުހުންނަވާނެ ކަމަށާއި 2018 ވަނަ އަހަރުގެ ރިޔާސީ އިންތިހާބަށް "އަތްބޭނީ އިންޑިޔާ ސަރުކާރުން" ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
މާލޭގައި ދިރިއުޅޭ ކޮމަންޑޫ ދާއިރާގެ ޕީޕީއެމް މެމްބަރުންނާ ބައްދަލު ކުރައްވާ ރައީސް ޔާމިން ރޭ ވިދާޅުވީ އެމަނިކުފާނާއި އެމަނިކުފާނުގެ ފިކުރުގައި ތިބި މީހުނަށް މި ވަގުތު އެންމެ އުނދަގޫވަނީ ދިވެހި ރާއްޖޭގެ ކަންކަމަށް ދިވެހި ސަރުކާރުގެ ބަސް ނުބުނެވޭތީ ކަމަށެވެ. އެހެން ވިދާޅިވެ އިންޑިޔާއަށް ވަރަށް ބޮޑަށް ފާޑު ވިދާޅުވި އެވެ. އަދި ވިދާޅުވީ ރައީސް ޔާމިން ވިދާޅުވި ގޮތުގައި އިންޑިޔާގެ ނުފޫޒު ރާއްޖޭގެ ޝަރުއީ ނިޒާމަށްވެސް އޮތީ ފޯރާފަ އެވެ.
"އިންޑިޔާ ސަރުކާރުން އަތް ބޭނީ އިންތިހާބަށް. އަދި އޭގެ ތެރޭގައި ބައެއް ދާއިރާތަކުގައި ވެރިންގެ ގޮތުގައި ތިއްބެވި ހާއިނުން އެކަމަށް މަގުފަހިކޮށް އެމީހުންގެ އަމިއްލަ ޖީބުތައް ފުންވެގެން ދިޔައީމަ އެ ބޭފުޅުން އެގޮތައް އިންތިހާބު ފުރޮޅާލީ. އެހެންވީމަ މިއީތޯ ދިވެހި ރައްޔިތުން އުޅެންޖެހޭނެ ހިތްދަތިގޮތަކީ،" ރައީސް ޔާމީން ވިދާޅުވި އެވެ.
އެމަނިކުފާނު ރޭ ވެސް ވިދާޅުވީ މިތަނުގައި ދިވެހި ސަރުކާރުގެ ބާރެއް ނެތް ކަމަށާއި ރާއްޖޭގެ އެކި ހިސާބުތަކުގައި އިންޑިޔާގެ އަޝްކަރިއްޔާގެ މީހުން އެބަ ތިބި ކަމަށެވެ. އެމަނިކުފާނު ވިދާޅުވި ގޮތުން އިންޑިޔާ ސިފައިން ރާއްޖޭގައި ތިބީ ރާއްޖޭގެ އެކި ވަސީލަތްތައް ދިގު މުއްދަތަކަށް އިންޑިޔާގެ އެކި ކުންފުނިތަކަށް ދީފައިވާތީ އެ އެއްބަސްވުންތައް ރޫޅާލަފާނެ ކަމަށްޓަކައި ކަމަށެވެ.
"ކުރީ ފަހަރު ހެދި އެގްރީމެންޓް އެމީހުން(އިންޑިޔާއިން) ބޭނުންވި ގޮތައް ތަންފީޒު ނުކުރެވިގެން، ރައީސް ޔާމީން އައިސް ޖީއެމްއާރުއަތުން އެއާޕޯޓް އަތިލި ކަމަށް ހަވާލާދީ އިންޑިޔާ ޓީވީގައި އިންޑީޔާގެ އިސްވެެރިން، ސިޔާސީ މީހުން ވާހަކަ ދައްކަމުން ބުނި ތިމަންނަމެނަށް ހެދުނު މިސްޓޭކަކީ ތިމަންނަމެނަށް ހެދުނު ގޯހަކީ އިންޑިޔާ އެއާޕޯޓް ބެލެހެއްޓުމުގައި އިންޑިޔާ ސިފައިން ނުބޭތިއްބުމޭ. އެހެންވީމަ ދުރާލާ މި ފަހަރު އެ އޮތީ އެމީހުންގެ ވަސީލަތްތައް ނޫނީ އެގްރީމެންޓްތައް އަތުލަފާނެ ކަމަށްވިސްނާ ދުރާލާ ރޭވިގެން ފިޔަވަޅު އަޅާފައި،" ރައީސް ޔާމިން ވިދާޅުވި އެވެ.
ރައީސް ޔާމިން ވިދާޅުވީ ކޮމަންޑޫ ދާއިރާގެ ގޮނޑި މުހިންމުވަނީ އެކަންކަމުގައި ވަކާލާތު ކުރުމަށް ކަމަށާއި ދެން މި ސަރުކާރަށ އެއްވެސް ގޮނޑިއެއް ދޭކަަށް ބޭނުން ނުވާކަން ކޮމަންޑޫ ދާއިރާގެ ބައި އިލެކްޝަނުގައި ރައްޔިތުންގެ ފަރާތުން ދައްކަން ބޭނުންވާ ކަމަށެވެ. އަދި އެމަނިކުފާނުގެ ވެރިކަމުގައިވެސް ކޮމަންޑޫ ދާއިރާއަށް އަޅާލާފައިވާނެ ކަމަށް ވިދާޅުވެ ކަމެއް ނުކޮށްދޭ ކަމަށް ދައްކާ ވާހަކަތަަކަށް ވެސް ރައްދު ދެއްވި އެވެ.