މައްސަލަ ބޮޑު ސ. ހެރަތެރަ ރިސޯޓް ވިއްކާނުލުމަށް ސިވިލް ކޯޓުން ވަގުތީ އަމުރެއް ނެރެފި އެވެ.
ސިންގަޕޫރުގެ ކުންފުޏެއް ކަމަށްވާ ސިންގަޕޫރު ކޭނަރީޒް އަށް 33 މިލިއަން ޑޮލަރަށް 546 އެނދުގެ އެ ރިސޯޓް ވިއްކާލުމުގެ މަސައްކަތް ހެރަތެރަ ތަރައްގީ ކުރި އެމްޓީޑީސީން ކުރަނިކޮށް އެ ކުންފުނީގެ އެއްވެސް އެސެޓެއް ކުއްޔަށް ދިނުމާއި ވިއްކުން ހުއްޓުވުމުގެ ވަގުތީ އަމުރަކަށް އެދުނީ ރެޒޮނަންސް ކިޔާ އަމިއްލަ ކުންފުންޏަކުންނެވެ.
އެކަމާ ގުޅިގެން ސިވިލް ކޯޓުން ވަގުތީ އަމުރު ނެރުނީ އިއްޔެ އެވެ.
ވަގުތީ އަމުރު ހޯދަން އެ ކުންފުނިން ކޯޓަށް ހުށަހެޅި އެ މައްސަލައިގައި ބުނެފައި ވަނީ ގއ. ކޮނޑޭމަތީލާބައިދޫގައި ރިސޯޓެއް ތަރައްގީ ކުރުމަށް އެމްޓީޑީސީ އާއި އެ ކުންފުންޏާ ދެމެދު ހެދި އެއްބަސްވުން ބާތިލް ކުރުމުން 5.2 މިލިއަން ޑޮލަރު ދެއްކުމަށް ސިވިލް ކޯޓުން އެމްޓީޑީސީގެ މައްޗަށް ކުރި ހުކުމާ އެއްގޮތަށް އެ ފައިސާ ނުދައްކާ ކަމަށެވެ.
އަދި އެ ފައިސާ ނުލިބި ވަނިކޮށް އެމްޓީޑީސީގެ މިލްކިއްޔާތުގައި ހުރި އެސެޓެއް ވިއްކައިފި ނަމަ އެކަމުގެ ސަބަބުން ބަދަލުގައި ގޮތުގައި ރެޒޮނަންސަށް ލިބެންޖެހޭ ފައިސާ ނުލިބި ބޮޑު ގެއްލުމަކާ ކުރިމަތިވުމުގެ ފުރުސަތު އޮތް ކަމަށެވެ.
ސިވިލް ކޯޓުގެ ގާޒީ އަލީ ނަސީރު ސޮއި ކުރައްވައި ނެރުއްވި އެ އަމުރުގައި ބުނަނީ ދެ ފަރާތުން ކޯޓަށް ހުށަހެޅި ލިޔެކިޔުންތަކުންނާއި ފެންނަން ހުރި ހެކިތަކުގެ މައްޗަށް ބަލާ އިރު އެމްޓީޑީސީން ދައްކަން ޖެހޭ ފައިސާ ރެޒޮނެންސަށް ނުދައްކާ، އެ ކުންފުނީގެ އެސެޓެއް ވިއްކާލައިފި ނަމަ ރެޒޮނަންސްގެ ހައްގަކަށް އުނިކަމެއް ލިބިދާނެ ކަމެއް ކަމަށް ފެންނަ ކަމަށެވެ.
އަދި ހެރަތެރަ ރިސޯޓް ވިއްކާލުމަކީ ރެޒޮނެންސްގެ ހައްގަކަށް އުނިކަން ލިބުމުގެ ފުރުސަތު އޮތް ކަމެއް ކަމަށެވެ.
"ރެޒޮނެންސަށް އެމްޓީޑީސީން ދައްކަންޖެހޭ ސާބިތު ދަރަނީގެ ފައިސާ ސިވިލް ކޯޓުގައި ޑިޕޮސިޓް ކުރެވެން ދެން ހެރަތެރަ އާއި އެ ރަށުގައި ހަދާފައިވާ ރިސޯޓާ ގުޅިގެން އެމްޓީޑީސީ އަށް ލިބިފައިވާ ލީސް ހޯލްޑާ ރައިޓްސް ވިއްކާލުން ފަސް ކުރުމަށް އެމްޓީޑީސީއަށާއި މިކަމުގައި ޝާމިލްވާ އެންމެހައި ފަރާތްތަކަށް އަންގާ އަމުރުކޮށްފީމެވެ." އަމުރުގައިވެ އެވެ.