ޔޫތު މިނިސްޓަރު އަހުމަދު މަހުލޫފްގެ މައްޗަށް ދައުލަތުން އުފުލާފައިވާ ރިޝްވަތު ހިފުމުގެ ދައުވާގެ އަޑުއެހުމެއް އަންނަ ހަފްތާގައި ބާއްވަން ތާވަލުކޮށްފި އެވެ.
މީގެ ކުރިން ބާއްވަން ތާވަލުކުރި އަޑުއެހުން ކޮވިޑާ ގުޅިގެން ކަމަށްބުނެ ފަސްކުރުމަށް ފަހު މިހާރު އެ މައްސަލަ ބާއްވަން ތާވަލުކޮށްފައިވަނީ 2އަންނަ ހަފްތާގެ ބުރާސްފަތި ދުވަހު އެވެ. ކޮވިޑާ ގުޅިގެން މަހްލޫފުގެ މައްސަލަ ލަސްކުރުމަށްފަހު ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ މައްސަލަ ކްރިމިނަލް ކޯޓުގައި ކުރިއަށްގެންދާނީ ގިނަ ބައެއްގެ ފާޑުކިޔުން އަމާޒުވި އެވެ.
އެއަށްފަހު ކްރިމިނަލް ކޯޓުން މިހާރު ހަމަޖައްސާފައިވާ ގޮތުން މަހްލޫފުގެ މައްސަލައިގެ އަޑުއެހުމެއް އަންނަ ބުރާސްފަތި ދުވަހުގެ މެންދުރުފަހު 13.30 ގައި އޮންނާނެ އެވެ.
އެމްއެމްޕީއާރްސީގެ ހިޔާނާތުގެ މައްސަލައިގައި މަހުލޫފްގެ މައްޗަށް ދައުވާ ކުރަން މިއަދު ފޮނުވާފައިވަނީ ރައްޔިތުންގެ މަޖިލީހުގެ މެންބަރެއްގެ ގޮތުގައި މަޚްލޫފް ހުރެ، މަޖިލީހުގެ ތަޅުމުގައި އޭރު ބަހުސްކޮށް ވޯޓަށް އެހި ސްޕެޝަލް އިކޮނޮމިކް ޒޯން (އެސް.އީ.ޒެޑް) ބިލަށް ވޯޓުދިނުމާއި ޕީ.ޕީ.އެމްގައި ދެމި ހުރުމުގެ މުޤާބިލުގައި 33,000.00 އެމެރިކާ ޑޮލަރު މަޚުލޫފް އަށް ލިބިފައިވާ މައްސަލައާ ގުޅިގެންނެވެ.
އެގޮތުން އެ ބިލް ފާސްކުރުމަށް ވޯޓް ދިނުމުގެ ގޮތުން 27 އޮގަސްޓް 2014 ގައި މަޚްލޫފް މަޖިލީހުގެ ޖަލްސާއަށް ޙާޟިރުވެފައިވަނީ މެލޭޝިޔާއިން ސީދާ މަޖިލީހުގެ ވޯޓަށްކަމާއި، މަޖިލީހުގައި މަޚްލޫފް އެ ބިލަށް ވޯޓު ދީފައިވަނީ ސަރުކާރާ އެއްކޮޅަށް ބިލް ފާސްކުރުމަށްކަމާއި، އެސް.އޯ.އެފްގެ ޗެކަކުން މަޚުލޫފުގެ އެކައުންޓަށް 33,000.00 އެމެރިކާ ޑޮލަރު ޖަމާކޮށްފައިވާކަން ތަޙްޤީޤުން އެނގޭ ކަމަށް އޭސީސީން ބުނެއެވެ.
އަދި އެ ވޯޓަށްފަހު ކުރީގެ ނައިބު ރައީސް އަޙްމަދު އަދީބު އާއި މަޚްލޫފް އާއި ދެމެދު ބަދަލުކޮށްފައިވާ މެސެޖުތަކާއި އެސް.އޯ.އެފް ގެ ޗެކް މަޚްލޫފުގެ އެކައުންޓަށް ޖަމާކޮށްފައިވާ ތާރީޚްތަކާއި ގުޅުވުމުން، މަޚްލޫފްގެ އެކައުންޓަށް ޖަމާކޮށްފައިވާ އެ ފައިސާއަކީ، އަދީބު، މަޚުލޫފަށް ދީފައިވާ ރިޝްވަތުގެ ފައިސާކަން ތަޙްޤީޤުން އެނގޭ ކަމަށްވެސް އޭސީސީން ބުނެފައިވެއެވެ.
މީގެއިތުރުން 33,000.00 އެމެރިކާ ޑޮލަރު އަކީ، ޑޮލަރު ގަނެވިއްކުމުގެ އަދި ސައްހަ މުއާމަލާތެއްކަން ދެއްކުމަށްޓަކައި އޭ.ސީ.ސީ އަށް ހުށަހަޅާފައިވާ "ޕޭމަންޓް ރިސީވްޑް" ލިޔުމާއި، އެ ޑޮލަރަށްވާ ދިވެހި ފައިސާ ނަގުދު ފައިސާއިން އެސް.އޯ.އެފް އާ ޙަވާލުކޮށްފައިވާނެކަމަށް، މަޚްލޫފް އޭ.ސީ.ސީ އަށް ފޮނުވާފައިވާ ސިޓީއާއި، ދީފައިވާ ބަޔާނަކީ، ކަން ހިނގާފައިވާ ގޮތް އޮޅުވާލުމަށްޓަކައި ދީފައިވާ ބަޔާނެއްކަން ތަހުގީގަށް ފާހަގަކުރެވޭ ކަމަށްވެސް ބުނެފައިވެއެވެ.
އެ މައްސަލައިގައި ދައުވާކުުރުމާމެދު ޕްރޮސެކިއުޓާ ޖެނަރަލް ގޮތެއް ނުނިންމަވައި ގިނަ ދުވަސްތަކެއް ހޭދަކުރެއްވި އެވެ. އެމްއެމްޕީއާރުސީގެ ބޮޑު ހިޔާނާތާ ގުޅިގެން މަހްލޫފުގެ މައްޗަށް ދައުވާ ކުރިނަމަވެސް އޭނާ މިހާރު ހުންނެވީ މިނިސްޓަރު ކަމުގަ އެވެ.
މަހްލޫފު ގެންދަނީ އޭނާގެ މައްޗަށް ކުރެވޭ ތުހްމަތުތައް ދޮގުކުރައްވަމުންނެވެ.