އަންނަ މާޗް މަހު ބާއްްވާ ރައްޔިތުންގެ މަޖިލީހުގެ ސ. ހުޅުދޫ ދާއިރާ ގޮނޑި އަށް މިނިވަން ކެންޑިޑޭޓެއްގެ ގޮތުގައި ވާދަ ކުރައްވަން ނިންމަވާފައިވާކަން ޑރ. އިބްރާހީމްދީދީ (ޑރ. ޑީޑީ) މިއަދު އިއުލާން ކުރައްވައިފި އެވެ.
ހުޅުދު އަށް ވަޑައިގަތުމަށް މިއަދު މާލޭން އައްޑު އަށް ވަޑައިގެން ގަން އެއާޕޯޓްގައި އައްޑޫގައި ތިބޭ ނޫސްވެރިންނާ ވާހަކަ ދައްކަވަމުން ޑރ. ޑީޑީ ވިދާޅުވީ އޭނާ މިނިވަން ކެންޑިޑޭޓެެއްގެ ގޮތުގައި މަޖިލިސް އިންތިހާބުގައި ވާދަ ކުރައްވަން ނިންމެވީ ވަރަށް ގިނަ ބަޔަކާ މަޝްވަރާ ކުރުމަށް ފަހު، އެ މީހުންގެ ލަފާގެ މަތިން ކަމަށެވެ.
އަދި މިކަަން އެމްޑީޕީގެ ޗެއާޕާސަން ރީކޯ މޫސާ މަނިކާއި އެ ޕާޓީގެ އެހެން ފަރާތްތަކާ ވެސް ހިއްސާކުރައްވާފައި ވާނެ ކަމަށް، އެމްޑީޕީ މެމްބަރެއްގެ ގޮތުގައި ހުންނެވި ޑރ. ޑީޑީ ވިދާޅުވި އެވެ.
ކުރިން އެމްޑީޕީގެ ރައީސްކަން ކުރެއްވުމަށް ފަހު، ފަހުން ޖުމްޖޫެރީ ޕާޓީ އާ ގުޅިވަޑައިގެން، އަނެއްކާ ފަހުން އެމްޑީޕީ އާ ގުޅިވަޑައިގަތް ޑރ. ޑީޑީ ވިދާޅުވީ އެމްޑީޕީ މެމްބަރެއްގެ ގޮތުގައި ހުންނަވައިގެން، މިނިވަން ކެންޑިޑޭޓެއްގެ ގޮތުގައި ވާދަ ކުރައްވަން އެމްޑީޕީގެ އަސާސީ ގަވައިދު ވެސް ހުރަސް ނާޅާ ކަމަށެވެ.
އޭނާ ވިދާޅުވީ ހުޅުދޫ ދާއިރާ އަށް މިނިވަން ކެންޑިޑޭޓެއްގެ ގޮތުގައި ވާދަ ކުރައްވަން ނިންމެވީ ހުޅުދޫ ތަރައްގީކޮށް، ކުރިއަރުވަން ކަމަށެވެ.
އަދި އެކަން ހާސިލްކޮށް، ސަރުކާރު ޒިންމާދާރު ކުރެވޭނީ ވެސް މިނިވަން ކެންޑިޑޭޓެއްގެ ގޮތުގައި މަސައްކަތްކޮށްގެން ކަމަށް، މަޖިލީހުގެ ފާއިތުވީ މާޒީ އަށް ބަލާ އިރު ފެނިވަޑައިގަތް ކަމަށް ވިދާޅުވި އެވެ.
ޑރ. ޑީޑީ އަދި ވިދާޅުވީ އޭނާ އަބަދު ވެސް މަސައްކަތް ކުރައްވާނީ ރައްޔިތުންގެ ހައްގުގައި ވަކާލާތުކޮށް، ރައްޔިތުންގެ އަޑު ގާތުން އަހައިގެން އިހުލާސްތެރިކަމާ އެކު މަސައްކަތް ކުރެއްވުމަށް ކަމަށެވެ.