ބޭރު ފައިސާގެ ތާށިކަން ޙައްލުކުރުމާއި، ދިވެހި ރުފިޔާގެ އަގު ހިފެހެއްޓުމުގެ ފިޔަވަޅުތައް، ސަރުކާރުން މި އަހަރު އަޅަން ފަށާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
މިއަހަރަށް މިއަހަރަށް ރައްޔިތުންގެ މަޖިލީސް ހުޅުވާދެއްވައި ދެއްވި ރިޔާސީ ބަޔާނުގައި ރައީސް ސޯލިހް ވިދާޅުވީ ބޭރު ފައިސާގެ ތާށިކަން ޙައްލުކުރުމަށްޓަކައި ބޭރު ފައިސާގެ ބާޒާރާ ގުޅޭ ޤާނޫނީ އޮނިގަނޑަށް ބަދަލުގެންނަވާނެ ކަމަށެވެ.
ދައުލަތުގެ މާލީ ހާލަތާ ގުޅޭ ގޮތުން ރައީސް ވިދާޅުވީ 2019 ވަނަ އަހަރުގެ ޖުލައި މަހު، ދައުލަތުގެ ރިޒަރވް މެނޭޖް ކުރުމަށް ރިޒަރވް ބޭންކް އޮފް އިންޑިއާއިން ނަގާފައިވާ 250 މިލިއަން އެމެރިކާ ޑޮލަރުގެ ސްވޮޕް ފެސިލިޓީ މިދިޔަ ޑިސެންބަރު މަހުގެ 29 ގައި ދައްކައި ނިމިފައި ކަމަށެވެ. މީގެއިތުރުން، ކުރީ ސަރުކާރުން ނަގާފައިވާ ދަރަނީގެ ތެރެއިން މި ސަރުކާރުން މިހާތަނަށް 447 މިލިއަން ޑޮލަރު ވަނީ ދައްކައި ނިންމާފައިވާ ކަމަށް އެމަނިކުފާނު ވިދާޅުވި އެވެ.
" އެހެންކަމާއެކުވެސް، 2021 ވަނަ އަހަރު ނިމުނުއިރު، ދައުލަތުގެ ރަސްމީ ރިޒަރވްގެ ގޮތުގައި 791.2 މިލިއަން ޑޮލަރު ހުރި" ރައީސް ވިދާޅުވި އެވެ.
ދައުލަތުގެ އިގުތިސާދާ ގުޅޭ ގޮތުން އެމަނިކުފާނު ވިދާޅުވީ ކޯވިޑް-19ގެ ކުރިން އޮތް ހިސާބަށް އިޤްތިޞާދު އަނބުރާ ގެންދެވޭނެ ކަމަށް ގަބޫލުފުޅު ކުރެއްވެނީ އަންނަ އަހަރު ކަމަށެވެ. ނަމަވެސް އެހާ ހިސާބަށް ދިއުމާ ހަމައަށްވެސް އިޤްތިޞާދީ ދުޅަހެޔޮ ސިޔާސަތެއްގައި ދެމިތިބެވޭނެ ކަމުގެ އިތުބާރު ސަރުކާރަށް އެބައޮތް ކަމަށް އެމަނިކުފާނު ވިދާޅުވި އެވެ.
"ދައުލަތެއް ހިނގަނީ މާލީ ލޭންދޭނުތަކާވެސް އެކުގައި. މިގޮތުން، ހޯދަންޖެހޭ އެއްޗެއް ހޯދުމާއި، އަދާކުރަންޖެހޭ އެއްޗެއް އަދާކުރުމުގައި، އިޤްތިޞާދީ ދުޅަހެޔޮ ސިޔާސަތެއްގައި ދެމިތިބެވޭނެ ކަމުގެ އިތުބާރު ސަރުކާރަށް އެބައޮތް. އަންދާޒާ ކުރެވިފައިވާ އިޤްތިޞާދީ އަމާޒު ހިފެހެއްޓުމަކީ ސަރުކާރުގެ ޢަޒުމް. ކޯވިޑް-19ގެ ކުރިން އޮތް ހިސާބަށް އިޤްތިޞާދު އަނބުރާ ގެންދެވޭނެ ކަމުގެ ފާހަގަ ސަރުކާރުން ޖަހާ އަހަރަކީ އިރާދަކުރެއްވިއްޔާ 2023 ވަނަ އަހަރު" ރައީސް ވިދާޅުވި އެވެ.
ރާއްޖޭގެ އިޤްތިޞާދީ ތަފާސް ހިސާބު އެކުލަވައިލަން ފެށި ފަހުން ފެންނަ އެންމެބޮޑު އަދި ކުއްލި އަޑިގުޑަން ރެކޯޑު ކުރެވިފައިވަނީ 2020 ވަނަ އަހަރުގައި ފާހަގަކުރައްވައި ރައީސް ވިދާޅުވީ އޭގެ ކުރީ އަހަރާ އަޅައިބަލާއިރު، އެ އަހަރު ރާއްޖޭގެ އުފެއްދުންތެރިކަން 33.5 އިންސައްތައަށް ދަށަށްދިޔަ ކަމަށެވެ. ނަމަވެސް
އެ ހާލަތުގައި އަވަސް އަދި ހަރުދަނާ ފިޔަވަޅުތަކެއް ނޭޅިނަމަ، ޢާންމު ދިވެހި ދިރިއުޅުން ދުވަހަކު ނުދާހާ ދަށަށް ސޮއްސާލާނެ ޙާލަތަކަށް ރާއްޖެދިޔައީސް ކަމަށާއި ސަރުކާރުން އެޅި ފިޔަވަޅުތަކާއި، އޭގެ ހެޔޮ ނަތީޖާ އަހަރެއްހާ ދުވަސް ނުވަނީސް އިރާދަކުރެއްވީތީ މިވަނީ ފެންނަން ފަށާފައި ކަމަށްވެސް އެމަނިކުފާނު ވިދާޅުވި އެވެ.
" ހުސްވި 2021 ވަނަ އަހަރު ނިމިދިޔައީ، ރާއްޖޭގެ ފަތުރުވެރިކަން ހިފި އަމާޒަށްވުރެވެސް މަތިން ޙާޞިލު ކުރެވިގެން. 2021 ވަނަ އަހަރަށް އަޅުގަނޑުމެން އަމާޒުހިފީ، އެއް މިލިއަން ފަތުރުވެރިންނަށް. ނަމަވެސް، އެ އަހަރު ޖުމްލަ 1.3 މިލިއަނަށްވުރެ ގިނަ ފަތުރުވެރިން ރާއްޖެ ޒިޔާރަތްކުރި" ރައީސް ވިދާޅުވި އެވެ.
މީގެ އިތުރުން ރައީސް ވިދާޅުވީ މި އަހަރުވެސް އެންމެ ބާރަށް ކުރިއަރާނެ ކަމަށް ބެލެވޭ މުޅި ދުނިޔޭގެ ފަސް އިޤްތިޞާދުގެ ތެރޭގައި ދިވެހިރާއްޖެ ހިމެނޭ ކަމަށާއި ސަރުކާރުގެ އަންދާޒާއަކީ، މިއަހަރު ރާއްޖޭގެ އުފެއްދުންތެރިކަން 12 އިންސައްތައިގެ ކުރިއެރުމެއް ހޯދާނެ ކަމަށެވެ. އަދި މި އަހަރު ޖުމްލަ 1.6 މިލިއަން ފަތުރުވެރިން ރާއްޖެ ޒިޔާރަތް ކުރާނެކަމަށް އަންދާޒާ ކުރާ ކަމަށް ރައީސް ފާހަގަ ކުރެއްވިއެވެ.