މިއަދު ރައީސް އިބްރާހިމް މުހައްމަދު ސޯލިހް ރައްޔިތުންގެ މަޖިލީހުގައި އިއްވެވި ރިޔާސީ ބަޔާނުގައި ހެއްދެވީ ހުސް ދޮގު ކަމަށް ކޮމަންޑޫ ދާއިރާގެ ބައި އިލެކްޝަނުގައި ޕީޕީއެމްއިން ވާދަކުރާ މޫސާ ފަހްތީ އާދަމް ވިދާޅުވެއްޖެ އެވެ.
މިއަދު ހަވީރު ކޮމަންޑޫގައި ބޭއްވި ކެމްޕެއިން ޖަލްސާ ވާހަކަ ދައްކަވަމުން ފަތުހީ ވިދާޅުވީ ކޮވިޑްގެ ހާއްސަ ހާލަތުގައި ކަންކަން ކުރެއްވި ވާހަކަ ރައީސް ވިދާޅުވިއިރު ދައުލަތުގެ 170 ބިލިއަން ރުފިޔާ ވަނީ "ދިރުވާލާފައި" ކަމަށް އޭނާ ވިދާޅުވި އެވެ.
އަދި ރާއްޖޭގެ ތާރީހުގައިވެސް އެންމެ ބޮޑު ބަޖެޓެއް މިއަހަރަށް ފާސްކޮށްފައިވާއިރު ކޮށްދިން އެއްވެސް ކަމެއް ނެތް ކަމަށެވެ.
"މަރުހޫމް ހުސެއިން ވަހީދުގެ އަވަހާރަވުމާ ގުޅިގެން މި ކޮމަންޑޫ ދާއިރާގެ ބައި އިލެކްޝަން ނައިނަމަ ކޮމަންޑޫ އޮތް ދިމާލަަށް ބަލާވެސް ނުލާނެ މިއިން މީހަކު. މިއަދު ހުސެއިން ވަހީދަށްވެސް ތިޔަ ކުރައްވަނީ މާލާމާތް. ފާޅުގައި ނޫންތޯ ތިޔަ ބުނަނީ މިއިން ތަނަކަަށް އެއްވެސް ސަރުކާރަކުން ކަމެއް ކޮށްފައެއް ނެތޭ. ބަލަގަ މަޖިލިސް މި މީހުން އަތުގައި، ކައުންސިލް މި މީހުން އަތުގައި، ސަރުކާރު ދެ ދަންފަޅި މި މީހުން އަތުގައި. ކޮން ސަރުކާރެއްގެ ވާހަކަތޯ މި ދައްކަނީ،" އޭނާ ވިދާޅުވި އެވެ.
މީގެ އިތުރުން ފަތުހީ ވިދާޅުވީ ކޮވިޑް ވެކްސިން ޖެހި ވާހަކަ ރައީސް ވިދާޅުވިއިރު އާބާދީގެ ނިސްބަތުން އެންމެ ގިނަ މީހުން ޕޮސިޓިވްވި ގައުމަކީ ރާއްޖޭ ކަމަށެވެ.
"ދިވެހި ރާއްޖެ ނޫނިއްޔާ ނޯންނާނެ މި ބަލި ފެތުރުނު ގޮތަކީ، ފެށިގެން އައީ ކޮންތަނަކުންކަން ބުނެދޭން ނޭނގުނު ގައުމެއް. ވަސީލަތް ނެތީތޯ. އާބާދީ ބޮޑުވެގެން އެކަން ނުވެ އޮތީތޯ. ނޫން ސަރުކާރުގެ އިހްލާސްތެރިކަމެއް ނެތީމަ އެކަން ނުވެ އޮތީ،" ފަތުހީ ވިދާޅުވި އެވެ.