ކޮވިޑް-19 ގައި ހާލުދެރަވާ މީހުންނަށް ފަރުވާ ދިނުމަށް ބޭނުންވާ ވެންޓިލޭޓަރުތައް ގެންނަން ދުބާއީގެ އެގްޒިކިއުޓާސް ކުންފުންޏާ ހަވާލުކުރުމުގައި ތުހުމަތުކުރެވޭ ކޮރަޕްޝަންގެ މައްސަލައިގައި ކަން ހިނގި ގޮތް އެނގޭ ކަމަށް ވިދާޅުވެ ކޮމަންޑޫ ދާއިރާގެ ބައި އިލެކްޝަނުގައި ޕީޕީއެމްއިން ވާދަކުރައްވާ މޫސާ ފަތުހީ އާދަމް ބޮޑެތި ތުހްމަތުތަކެއް ކުރައްވައިފި އެވެ.
ގާނޫނީ ވަކީލު ފަތުހީ ވިދާޅުވީ އޭނާ އަކީ ވެންޓިލޭޓަރުގެ ކޮރަޕްޝަނުގައި މައްސަލައިގައި ހިމެނޭ އެކަކުގެ ވަކީލެއް ކަމަށާއި ވެންޓިލޭޓަރު ގަންނަން 32 މިލިއަން ރުފިޔާ ހޭދަކުރީ ކާކު ބުނެގެން އަދި ކާކު އެކައުންޓަކަންވެސް އޭނާއަށް އެނގިވަޑައިގަންނަވާ ކަމަށެވެ.
"އެ ހަރަދުކުރަން(ވެންޓިލޭޓަރު ގަތުމުގެ މުއާމަލާތް ކުރުމަށް) އޯޑަރު ދިނީ އިބްރާހިމް މުހައްމަދު ސޯލިހް. ހަރަދުކުރަންވި ދުބާއީ މީހާގެ އެކައުންޓް ނަމްބަރު، ޕާސަލް އެކައުންޓަށް ޖަމާކުރާށޭ ބުނީ ރައީސް އޮފީހުގެ މިނިސްޓަރެއް،" ފަތުހީ ވިދާޅުވި އެވެ.
ވެންޓިލޭޓަރު ގަތުމަށް ބޭނުންވާ ފައިސާ ފޮނުވަން ވެގެން ރޭ ގަނޑެއްގެ ދަންވަރު ހެލްތް މިނިސްޓްރީގެ މުވައްޒަފަކާ ގުޅިގެން އެކަން ކުރެއްވީ ފިނޭސް މިނިސްޓަރު ކަމަށް ވެސް ވިދާޅުވި އެވެ.
ކޮވިޑްގެ ކަންތައް ބެލެހެއްޓުމަށް އެކުލަވާލި ޓާސްކްފޯހުގެ ރިޔާސަތުގައި ރައީސް ސޯލިހް އިންނަވައިގެން ވާނުވާ ބަލަމުން ދިޔައިރު ދައުލަތުގެ 32 މިލިއަން ރުފިޔާ އެމަނިކުފާނަށް އެނގިވަޑައިނުގެން ނުދާނެ ކަމަށް ވެސް އޭނާ ވިދާޅުވި އެވެ.
ފަތުހީ ތަކުރާރުކޮށް ވިދާޅުވީ ވެންޓިލޭޓަރުގެ މައްސަލައިގެ ޝަރީއަތް ރައީސް އިބްރާހިމް މުހައްމަދު ސޯލިހް ހުންނަވައިގެން ބަލަން ނުކުރޭނެ ކަމުގެ ޔަގީންކަން އޭނާއަށް އެބަ އޮތް ކަމަށެވެ.
"އެ ޗެލެންޖު މިކުރަނީ. ހެލްތް މިނިސްޓްރީ ތެރޭގައި ހިނގާދިޔަ އެ ވައްކަން މި ރާއްޖޭގެ އެއްވެސް ކޯޓެއްގައި އިބްރާހިމް މުހައްމަދު ސޯލިހް ވެރިކަމުގައި ހުރެގެން ނުހިނގާނެ" އޭނާ ވިދާޅުވި އެވެ.
ކޮވިޑް-19 ގައި ހާލުދެރަވާ މީހުންނަށް ފަރުވާ ދިނުމަށް ބޭނުންވާ ވެންޓިލޭޓަރުތައް ގެންނަން ދުބާއީގެ އެގްޒިކިއުޓާސް ކުންފުންޏާ ހަވާލުކުރުމުގައި ތުހުމަތުކުރެވޭ ކޮރަޕްޝަންގެ މައްސަލައިގައި ދައުވާކުރުމަށް ހުށަހެޅި މައްސަލަ، ޕްރޮސެކިއުޓާ ޖެނެރަލް (ޕީޖީ) އޮފީހުން ތިން ވަނަ ފަހަރަށް ވަނީ އަނބުރާ އޭސީސީ އަށް ފޮނުވާލައިފަ އެވެ.
މިމައްސަލަ ދަޢުވާކޮށްދިނުމަށް އެދި ހުށަހަޅާފައިވަނީ 11 މީހެއްގެ މައްޗަށެވެ. އޭސީސީން ބުނީ އެންމެ ފަހުން ދައުވާ ކުރަން ފޮނުވިއިރު އިތުރު ދަޢުވާތަކެއް ކޮށްދިނުމަށް އެދިފައިވާނެ ކަމަށެވެ. ނަމަވެސް އެ މައްސަލައިގައި ހިމެނޭ ފައިސާ ދައުރުވެފައިވާ ގޮތާއި އެ ފައިސާއިން އެއްވެސް މިންވަރެއް އެ ދައުވާ ކޮށްދޭން އެދުނު އެއްވެސް މީހަކަށް ނުވަތަ އެއިން ފަރާތަކާ ގުޅުން އޮތް ފަރާތަކަށް ލިބިފައިވޭތޯ ބެލުމަށް ކޮށްފައިވާ މަސައްކަތުން މިހާތަނަށް އޭގެތެރެއިން ފަރާތަކަށް އެފަދަ ފައިސާއެއް ލިބިފައިވާކަން ފާހަގަކުރެވިފައިނުވާ ކަމަށް އޭސީސީން ބުނެފައިވެ އެވެ.
" މިމައްސަލާގައި ހިމެނޭ އެއްވެސް ފަރާތަކަށް ނުވަތަ އެފަދަ ފަރާތަކާ ގުޅުންހުރި ފަރާތަކަށް، މި މައްސަލައާ ގުޅުންހުރި އެއްވެސް ފައިސާއެއް ލިބިފައިވޭތޯ ބެލުމަށް އަދިވެސް އިތުރަށް ބަލައި އެފަދަ ކަމެއް ފާހަގަކުރެވިއްޖެނަމަ، އެ މައްސަލައެއްގެ ތަޙުޤީޤު ވަކިން ކުރިއަށް ގެންދާގޮތަށް ވަނީ ނިންމާފައެވެ." އޭސީސީން މިމައްސަލައިގައި އެންމެފަހުން މީޑިއާއަށް މައުލުމާތު ދެމުން ބުނެފައިވެއެވެ.
ވެންޓިލޭޓަރުގެ މައްސަލައިގައި ރައީސް އޮފީހުގެ މިނިސްޓަރަކަށް އަދި ރައީސް ސޯލިހަކަށް ތަހްގީގުގައި ސުވާލެއް ކޮށްފައިވާކަން އެނގިފައެއްނުވެ އެވެ.