ކޮމަންޑޫ ދާއިރާގެ ބައި އިލެކްޝަނުގެ ވޯޓު ނެގުން ފެށިގެން ކުރިއަށްއެބަދެ އެވެ.
ވޯޓުލާ މަރުކަޒުތަކުގައި ވޯޓުލުން ފެށުނީ ހެނދުނު 8.00 ފެށިގެނެވެ. ވޯޓުލުން ކުރިއަށްދާއިރު އެހެން އިންތިހާބުތަކެކޭ އެއްގޮތައް ސަލާމަތީ ކަންކަން ފުލުހުން ގެންދަނީ ވޯޓުލާ މަރުކަޒުތަކުގައި ބަލަހައްޓަމުންނެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގެ އިތުރުން މިއަދު ތ. ވިލުފުށި އަދި ގއ. ގެމަނަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންގެ ވޯޓުލުންވެސް މިއަދު ކުރިއަށްދާނެ އެވެ. ވޯޓުލުން ކުރިއަށްދާނީ ކޮވިޑް 19 އިން ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް އަޅައިގެން ކަމަށް އިލެކްޝަން ކޮމިޝަނުން މައުލޫމާތުދެ އެވެ. އެގޮތުން ކޮވިޑް-19އަށް ފައްސިވެފައިވާ މީހުންނާއި ކަރަންޓީނުގައި ތިބޭ މީހުން ވޯޓުލުމަށް ކަނޑައެޅިފައިވަނީ މެންދުުރު ފަހު 15:00 އިން 16:00 އަށް ކަމަށް އިލެކްޝަނުން ވަނީ އިއުލާންކޮށްފަ އެެވެ. އަދި އެ ފަދަ މީހުން ވޯޓުލާ މަރުކަޒަށް ވޯޓުލުމަށް ވަޑައިގަންނަވާއިރު ހެލްތު ޕްރޮޓެކްޝަން އެޖެންސީއިން ކަނޑައަޅާފައިވާ ރައްކާތެރިކަމުގެ ފިޔަވަޅުތައް އަޅައިގެން ދިއުމަށް ވަނީ އިލްތިމާސްކޮށްފަ އެެވެ.
އިލެކްޝަންސް ކޮމިޝަނުން އާއްމު ކޮށްފައިވާ ލިސްޓުގައިވާ ގޮތުން ފޯކައިދު އާއި މަރޮށި އަދި ކޮމަންޑޫން 3،309 މީހުންނަށް މި ދާއިރާ އަށް ވޯޓު ލުމުގެ ހައްގު ލިބިގެންނެވެ. ވޯޓު ލުން ކުރިއަށްދާނީ ހެނދުނު 8.00 ފެށިގެން. ވޯޓުލުން ބަންދުވާނީ ހަވީރު 04.00ގައި އެވެ.
މި އިންތިހާބުގައި ހަތް ވޯޓު ފޮށި ބަހައްޓާފައިވޭ. ކޮމަންޑޫ އާއި ފޯކައިދޫގައި ދެ ފޮށި ބަހައްޓާފައިވާއިރު މަރޮށީގައި އެއް ފޮށި ބަހައްޓާފައިވޭ. މި ދާއިރާގެ މީހުން ވޯޓުލުމަށް މާލޭގައި ވެސް ދެ ފޮއްޓެއް ބަހައްޓާފައިވޭ. މާލޭ ދެ ފޮށި ބަހައްޓާފައިވަނީ އިސްކަންދަރު ސްކޫލުގަ އެވެ.
ވޯޓުލުމުގެ ހައްގު ލިބިފައިވާ މީހުންގެ އަދަދު
ކޮމަންޑޫ: 1،406
މަރޮށި: 703
ފޯކައިދޫ: 1،201
ފޯކައިދޫ ވޯޓުލުން ފެށިގެން ކުރިޔަށް ދަނީ! pic.twitter.com/jLYdcQr4sP
— Ahmed Anwar (@Simwarr) February 5, 2022
މިއަދު ބާއްވާ ކޮމަންޑޫ ދާއިރާގެ ބައި އިލެކްޝަން ބާއްވަން ޖެހުނީ އެ ދާއިރާގެ މަޖިލީހުގެ ގޮނޑި ފުރުއްވަމުން ގެންދެވި ހުސައިން ވަހީދު އަވަހާރަވުމާ ގުޅިގެންނެވެ. ކޮމަންޑޫ ދާއިރާގެ މެމްބަރު ހުސައިން ވަހީދު އަވަހާރަވީ 13 ޑިސެމްބަރ 2021 ވަނަ ދުވަހުގެ ރެ އެވެ. ހުސެއިން ވަހީދު އަވަހާރަވީ ކެންސަރަށް ފަރުވާ ހޯއްދަވަމުން ގެންދަވަނިކޮށް އޭޑީކޭ ހޮސްޕިޓަލުގައެވެ. އަވަހާރަވިއިރު މެމްބަރު ވަހީދުގެ އުމުރުފުޅަކީ 53 އަހަރެވެ. ހުސެއިން ވަހީދު 2019 ވަނަ އަހަރު އެ ގޮނޑިއަށް އިންތިހާބުވީ އެ ދާއިރާގެ ރައްޔިތުންގެ ބޮޑު އަގުލަބިއްޔަތަކުންނެވެ.
ކޮމަންޑޫ ދާއިރާގެ ބައި އިލެކްޝަނަށް ތިން ކެންޑިޑޭޓުން ވާދަކުރާއިރު މި އިންތިހާބުގެ ވާދަކުވެރިކަން ވަނީ ރިޔާސީ އިންތިހާބެކޭ އެއްވަރަށް ބޮޑުވެފަ އެވެ. އިންތިހާބުގައި ވެރިކަން ކުރާ މައި ޕާޓީ އަދި އެންމެ ގިނަ މެމްބަރުން ތިބި ސިޔާސީ ޕާޓީ، މޯލްޑިވިއަން ޑިމޮކްރޮޓިކް ޕާާޓީ(އެމްޑީޕީ) އާއި އިދިކޮޅު އެންމެ ބޮޑު ޕާޓީ އަދި ދެ ވަނައަށް އެންމެ މެމްބަރުން ގިނަ ޕާޓީ، ޕްރޮގްރޮސިވް ޕާޓީ އޮފް މޯލްޑިވްސް(ޕީޕިއެމް) އާއި އަަލަށް އުފެދުނު މޯލްޑިވްސް ނޭޭޝަނަލް ޕާޓީ(އެމްއެންޕީ)ގެ ކެންޑިޑޭޓަކު ވާދަކުރެ އެވެ.
ކޮމަންޑޫ ދާއިރާގެ ކެންޑިޑޭޓުން:
– މުހައްމަދު ރާޝިދު(އެމްޑީޕީ)
– މޫސާ ފަތުހީ (ޕީޕީއެމް)
– އަބްދުލް ހަންނާނު އިދްރީސް(އެމްއެންޕީ)
އިންތިހާބާ ބެހޭ މުހިންމު ތާރީހްތައް:-
15ޑިސެމްބަރ 2021 – ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަން، 05 ފެބުރުވަރީ 2022 ވާ ހޮނިހިރު ދުވަހު އޮންނާނެ ކަމަށް އިއުލާންކޮށް 16 ޑިސެމްބަރު 2022 ވަނަ ދުވަހުން ފެށިގެން އިންތިހާބަށް ކުރިމަތިލާން ހުޅުވާލި.
30 ޑިސެމްބަރު 2022 – އިންތިހާބަށް ކުރިމަތިލުުމުގެ މުއްދަތު ހަމަވި
27 ޑިސެމްބަރ 2021 – އެމްއެންޕީގެ ފަރާތުން އަބްދުލް ހަންނާން އިދުރީސް އިލެކްޝަންސް ކޮމިޝަނަށް ފޯމު ހުށަހެޅުއްވި
29 ޑިސެމްބަރ 2021 – އެމްޑީޕީގެ ފަރާތުން މުހައްމަދު ރާޝިދު އިންތިހާބަށް ކުރިމަތިލުމަށް ފޯމް ހުށައެޅުއްވި
14 ޑިސެމްބަރ 2021 – ޕީޕީއެމްގެ ކެންޑިޑޭޓް މޫސާ ފަތުހީއަށް އެ ޕާޓީގެ ޓިކެޓް ދިންކަން އިއުލާންކުރި
30 ޑިސެމްބަރ 2021 – އިންތިހާބުގައި ވާދަކުރާ ތިން ކެންޑިޑޭޓުންގެ ގުރުއަތުލުން ބޭއްވި
19 ޖެނުއަރީ 2022 – ރީ-ރަޖިސްޓަރީ ވުމުގެ ފުރުޞަތު 20 ޖަނަވަރީ އިން ފެށިގެން 24 ޖަނަވަރީއަށް ހުޅުވާލި
ކެމްޕެއިން ތެރެއިން ފާހަގަކޮށްލެވޭ މުހިންމު ތާރީހްތައް:-
6 ޖެނުއަރީ 2022 – އެމްއެންޕީގެ ރައީސް މުހައްމަދު ނާޒިމް ކޮމަންޑޫ ދާއިރާއަށް ވަޑައިގެންނެވި. އެ ދަތުރުގައި ކޮމަންޑޫ ދާއިރާގެ ތިން ރަށުގައި ހަންނާނެ އިދްރީސްގެ ކެމްޕެއިން ޖަގަހަ ހުޅުވި
07 ޖެނުއަރީ 2022 – ރައީސް އިބްރާހިމް މުހައްމަދު ސޯލިހް ކޮމަންޑޫއަށް ވަޑައިގެން އެމްޑީޕީގެ ކެމްޕެއިން ލޯންޗް ކުރެއްވެވި. މި ދަތުރުފުޅުގައި ކޮމަންޑޫ ދާއިރާގެ ރަށްތަކުގައި ކެމްޕެއިން ކުރެއްވި
13 ޖެނުއަރީ 2022 – ޕީޕީއެމްގެ ރައީސް، އަދި ކުރީގެ ރައީސުލް ޖުމްހޫރިއްޔާ ކޮމަންޑޫއަށް ވަޑައިގެންނެވި. އެ ދަތުރުފުޅުގައި އެ ދާއިރާގެ ތިން ރަށަށަށް ވަޑައިގެން ޔާމީން ކެމްޕެއިން ކުރެއްވި
15ޖެނުއަރީ 2022 – ނައިބު ރައީސް ފައިސަލް ނަސީމް ކޮމަންޑޫ ދާއިރާގެ ރަށްތަކަށް ކެމްޕެއިނަށް ވަޑައިގެންނެވި
ތިން ކެންޑިޑޭޓުންގެ ކެމްޕެއިންތަކުން ފެނިގެން ދިޔައީ ރިޔާސީ އިންތިހާބުގައި ފެންނަފަދަ ފޯރިގަދަ މަންޒަރުތަކެވެ. އިއްޔެގެ ހަވީރު 6.00 ވުމުން ހުރިހާ ޕާޓީތަކުންވެސް ކެމްޕެއިން ހުއްޓާލީ އިންތިހާބުން މޮޅުވާނެ ކަމުގެ ޔަގީންކަމާއެކު އެވެ. ކެމްޕެއިން ފެށިގެން ނިމުމާ ހަމައަށްވެސް އެއްވެސް ހަމަނުޖެހުމެއް ހިނގާފައެއްނުވެ އެވެ. މި އިންތިހާބުގެ ނަތީޖާ އަކީ ކޮންމެ ޕާޓީއަކަށްވެސް އޮތް މަގުބޫލުކަން ހާމަވާނެ އިންތިހާބެއްކަމަށް އެ ޕާޓީތަކުން ދެކެ އެވެ. އެހެންވެ މުޅި ރާއްޖެ އޮތީ މި އިންތިހާބަށް ޝައުގުވެރިކަން ހުއްޓިފަ އެވެ.