ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނުގެ ނަތީޖާއިން އެނގިގެން ދިޔައީ އަންނަ އަހަރު އޮންނަ ރިޔާސީ އިންތިހާބު ޕީޕީއެމް އިން ކާމިޔާބުކުރާނެކަން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވިދާޅުވެއްޖެ އެވެ.
ކޮމަންޑޫ ދާއިރާގެ ބައި އިލެކްޝަން އެމްޑީޕީން ކާމިޔާބުކުރާނެކަން މިހާތަނަށް ކަށަވަރުވެފައިވީ ނަމަވެސް ޑރ.ޖަމީލް ކުރެއްވި ޓުވީޓެއްގައި ވިދާޅުވީ މުޅި ދައުލަތާއި، ކޯލިޝަން އެކުގައި ނިކުމެ ހުރިހާ ނުފޫޒެއް ފޯރުވުމުންވެސް ކޮމަންޑޫ ދާއިރާގެ އެމްޑީޕީގެ ވޯޓުގެ މެޖޯރިޓީ ބޮޑުތަނުން ގެއްލި ހަނިވެފައިވެފައިވާތަން ފެނިގެން ހިނގައްޖެ ކަމަށެވެ.
މުޅި ދައުލަތާއި، ކޯލިޝަން އެކުގައި ނިކުމެ ހުރިހާ ނުފޫޒެއް ފޯރުވުމުންވެސް ކޮމަންޑޫ ދާއިރާގެ އެމްޑީޕީގެ ވޯޓުގެ މެޖޯރިޓީ މިއޮތީ ބޮޑުތަނުން ގެއްލި ހަނިވެފައި. އެހެންވީމަ 2023 ޕީޕީއެމް ކާމިޔާބު ކުރާނެކަން ޔަގީން،ان شاالله. ޕީޕީއެމްގެ މަސައްކަތަށް ތަޢުރީފު ޙައްގު
— Mohamed Jameel Ahmed (@MJameelAhmed) February 5, 2022
މި އިންތިހާބުގައި މުހައްމަދު ރާޝިދުއާ އެންމެ ގާތުން ވާދަކުރެއްވީ ޕީޕީއެމްގެ ކެންޑިޑޭޓް މޫސާ ފަތުހީ އާދަމެވެ. ޑރ.ޖަމީލް ވަނީ ޕީޕީއެމް އިން ކުރި މަސައްކަތައް ތައުރީފު ހައްގު ކަމަށްވިދާޅުވެފަ އެވެ.
ކޮމަންޑޫ ދާއިރާގެ ބައި އިލެކްޝަން ކާމިޔާބުކުރުމަށް ޕީޕީއެމް އިން ބޮޑެތި މަސައްކަތްތަކެއްކުރި އެވެ. އެގޮތުން ކުރީގެ ރައީސް އަބްދުﷲ ޔާމީން އަބްދުލް ގައްޔޫމާއި ޕީޕީއެމް ލީޑަރޝިޕްގެ ގިނަ ބޭފުޅުން އެ ދާއިރާއަށް ވަޑައިގެން ކެމްޕެއިން ކުރެއްވެވި އެވެ.
އަދި ޕީޕީއެމްގެ ލީޑަރޝިޕްގެ ބޭފުުޅުން މެދުކެނޑުމެއް ނެތި ސަރުކާރު ހިންގައި މައި ޕާޓީ އެމްޑީޕީއަށް ގެންދިޔައީ ބަހުގެ ހަމަލާތައް ދެމުންނެވެ. މި އިންތިިހާބު އެމްޑީޕީން ކާމިޔާބުކުރި ފަރަގު ކުޑަވުމުން ޕީޕީއެމް މިހާރު ގެންދަނީ އެކަން ފާހަގަކޮށް އެކަމަށް ފާޑުކިޔަމުންނެވެ.