ކޮމަންޑޫ ދާއިރާގެ ބައި އިލެކްޝަން އެހާ ފޯރިގަދަވެގެން ދިޔައީ ޕާޓީތަކުގެ ލީޑަރުން އެ އިންތިހާބު މާނަކުރި ގޮތާއި އުޅެގެން ގޮތުން ކަމަށް ވެދާނެ އެވެ. އަދި އެ އިންތިހާބުގެ ނަތީޖާއަކީ ރާއްޖެގެ ސިޔާސީ މަޝްރަހްގެ ހާލަތު މިހާރު އޮތް ގޮތް ދެނެގަތުމަށް މުހިންމު އެއްޗެއް ކަމަށް މުޅި ރާއްޖެވެސް ދެކުނީ އެ ދާއިރާއަކީ ސިޔާސީ ގޮތުން އެއްކޮޅަކަށް ގޮސް ހުސްވެފައިވާ ދާއިރާއަކަށް ނުވުމުންނެވެ. އެހެންވެ މިއީ އަޖުމަ ބަލާލަން ރަނގަޅު އިންތިހާބެއް ކަމަށް ސިޔާސީ ހިޔާލު ތަފާތުވުން ބޮޑެތި ޕާޓީތައް މެދުގައިވެސް އިއްތިފާގުވެ ކެމްޕެއިން ކުރީ އެ ފޯރީގަ އެވެ.
މިއީ ރިޔާސީ އިންތިހާބަށް ވާނެ ގޮތުގެ މަންޒަރު ދައްކައިދޭނެ އިންތިހާބެއް ކަމަަށް ޕީޕީއެމްގެ އިސްވެރިން ދެކުނުއިރު މިއީ ސަރުކާރަށް އޮތް ތާއީދު އެގޮތުގައި ދެމި އޮތްކަން މުޅި ދުނިޔެއަށް ދައްކައިދޭނެ އިންތިހާބެއްކަމަށް ވާނެ ކަމަށް ސަރުކާރުގެ ކޯލިޝަނުން ދެކުނެވެ. ސުވާލަކީ ކުޑަ އިންތިހާބުން ފެނުން ބޮޑު މަންޒަރަކީ ކޮބައިތޯ އެވެ.
ޕީޕީއެމް ބަލިކުރަން ރައީސް އެހެން ޕާޓީތަކުގައި އެދިވަޑައިގެންނެވި
އެމްޑީޕީއާ ޕީޕީއެމްގެ ތަޅާފޮޅުންގަނޑު ހޫނުވެގެން ގޮސްފައިވަނިކޮށް ވަކި ހިސާބަކުން ފެނުނީ ރިޔާސީ އިންތިހާބުތަކުގައި ފެންނަ މަންޒަރެކެވެ. އެމްޑީޕީގެ އެންމެ އިސް ލީޑަރު، ރައީސް އިބްރާހިމް މުހައްމަދު ސޯލިހް އެހެން ޕާޓީތަކުގެ ވާގިވެރިކަމަަށް އެދުނެވެ. ރައީސްގެ އެ ހުށައެޅުމާއެކު އަދާލަތު ޕާޓީގެ މަޝްވަރާ މަޖިލީހެއް ބާއްވާ ކޮމަންޑޫ ދާއިރާގެ ބައި އިލެކްޝަނުގައި އަރާނެ ކޮޅަކާމެދު ބަހުސްކޮށް ގޮތެއް ނިންމަންޖެހުނެވެ. އެ ޕާޓީގެ އިލްމްވެރިންގެ މެދުގައި ހިޔާލު ތަފާތުވުން ބޮޑުުވި އެ ބައްދަލުވުމުގެ ނިންމުން ބުރަވީ އެމްޑީޕީގެ ކޮޅަށެވެ. އެއާއެކު އަދާލަތު ޕާޓީގެ ބައެއް މީހުން އެ ޕާޓީގެ އިލްމްވެރިންގެ މަޖިލީހުން އިސްތިއުފާ ދިންތަން ވެސް ފެނުނެވެ.
ބައި އިލެކްޝަނުގެ ވަކި ހިސާބަކުން ކޯލިޝަނުގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމް ނިކުންނަވައި ރިޔާސީ އިންތިހާބަކަށް ކުރާ ފަދަ ކެމްޕެއިންތަކެއްކުރާތީ ފެނުނެވެ. އެހެން ކަމުން އިންތިހާބަށް އެއް ދުވަހަށް ވެފައިވަނިކޮށް ކޮަމަންޑޫ ދާއިރާގައި ރައީސް ސޯލިހް ވަޑައިގެން އެމްޑީޕީން ބޭއްވި ޖަލްސާގެ ފުރަތަމަ ސަފު ފެނުނީ 2018 ވަނަ އަހަރު، އޭރުގެ ރައީސް އަބްދުﷲ ޔާމީން ބަލިކުރަން ބޭއްވި ކެމްޕެއިން ޖަލްސާތަކާ ދާދި އެއްގޮތަކަށެވެ. ރައީސް ސޯލިހްގެ ދެ ފަޅީގައި ތިއްބެވީ ގާސިމް އިބްރާހިމާއި ޝެއިހް އިމްރާނެވެ.ތަފާތަކީ މިއަދު ވެރިކަމުގައި އެ ބޭފުޅުން ތިއްބަވާފައި އިދިކޮޅުގައި ރައީސް ޔާމީން ހުންނެވުމެވެ. ދެން އެ ހާލަތުގައިވާނެ ގޮތް އެންމެ ސާދާކޮށް އިންތިހާބުގެ ތެރޭގައި ސިފަ ކޮށްދިނީ ޝެއިހް އިމްރާނެވެ.
"ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހާ، ރައީސް ނަޝީދާއި، ގާސިމް އިބްރާހިމާއި، އިމްރާނާއި ނިކުތީމަ މި ގައުމު ގުޑާނެ. ކޮމަންޑޫ ދާއިރާ އަންނާނެ. ރާޑޯ ހޮވޭނެ އިރާދަކުރެއްވިއްޔާ. ރާޑޯ ހޮވިއްޖެ އިރާދަކުރެއްވިޔާ،" އިންތިހާބުގެ ވޯޓުލުމަށް ދޮޅު ދުވަހަށް ވެފައިވަނިކޮށް ފޯކައިދޫގައި ބޭއްވި ޖަލްސާގައި އިމްރާން ވިދާޅުވި އެވެ.
އިންތިހާބުގެ ކެމްޕެއިންގައި ވަކި ހިސާބަކުން އެމްޑީޕީ ފެނުނީ ކޯލިޝަނުގެ ދެން ތިއްބެވި ލީޑަރުންގެ ތެރެއިން ކުރީގެ ރައީސް މައުމޫނު އަބްދުލް ގައްޔޫމް ފިޔަވާ އެހެން ބޭފުޅުންނާއެކު މަސައްކަތް ކުރެއްވި ތަނެވެ.
ޕީޕީއެމް ފިކުރު އެކަނި
އިންތިހާބުގެ ކެމްޕެއިން ފެށިގެން ނިމިގެން ދިޔައީވެސް ޕީޕީއެމްއާއެކު އެހެން ފިކުރެއްގެ ޕާޓީއެއް ބައިވެރިވުމެއް ނެތި އެވެ. ޕީއެންސީކިއެއް ކަމަކު ޕީޕީއެމް އިން ދެކެނީ އެއީ ހަމަ އެ ޕާޓީގެ މެމްބަރުންގެ ގޮތުގަ އެވެ. އެހެން ކަމުން މި އިންތިހާބުގައި ވެސް 2018 ވަނަ އަހަރުގެ ރިޔާސީ އިންތިހާބެކޭ އެއްގޮތައް އެމްޑީޕީގެ ކޯލިޝަނާ މި އިންތިހާބުގައިވެސް ޕީޕީއެމް ކުރިމަތިލީ ޕީޕީއެމް އިން އެކަންޏެވެ.
މި އިންތިހާބުގައި ވިއްކަމުން ގެންދިޔައީ ހަމައެކަނި ރައީސް ޔާމީނާއި އެމަނިކުފާނުގެ ފިކުރެވެ. ރައީސް ޔާމީންގެ އެންމެ ބޮޑު ކެމްޕެއިން ޝިއާރެއްގެ ގޮތައް އަންނަ އަހަރުގެ ރިޔާސީ އިންތިހާބުގައިވެސް ބޭނުންކުރާނެ ކަމަށް ބެލެވޭ "އިންޑިޔާ އައުޓް" ޝިއާރު މި އިންތިހާބުގައިވެސް ބޭނުންކުރި އެވެ. ކޮމަންޑޫ ދާއިރާގެ ކެމްޕެއިން ނިންމުމަށް ޕީޕީއެމް އިން ބޭއްވި ޖަލްސާގައި ޕީއެންސީގެ ރައީސް އަބްދުﷲ އަބްދުއްރަހީމް ވިދާޅުވި އެ ވާހަކަތަކެވެ.
"ރައްޔިތުން ބުނަނީ މި ފަހަރު ގޮނޑި ހަދިޔާކުރާނީ މި ގައުމާއި މި ގައުމުގެ ރައްޔިތުންނާއި މާތްވެގެންވާ އިސްލާމް ދީނާއި މި ގައުމުގެ މިނިވަން ކަމާއި މި ގައުމުގެ އިސްތިގުލާލް ރައްކާކޮށްދޭން ލީޑަރަކަށޭ. އާދެ އެ ލީޑަރަކީ ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލް ގައްޔޫމް،" ކެމްޕެއިން ނިންމުމުގެ ގޮތުން ދެއްކެވި ވާހަކައިގައި އަދުރޭ ވިދާޅުވި އެވެ.
އެހެން ކަމުން ކޮމަންޑޫ ދާއިރާގައި ޕީޕީއެމް އިން ޓެސްޓްކުރަން ބޭނުންވީ އެމީހުންގެ އެ ސިޔާސަތުތަކަށް ރައްޔިތުން ބުނަނީ ކީކޭތޯ އެވެ.
އެމްއެންޕީގެ އާ ފިކުރެއް ވައިގަ ނުހިފި
2018 ވަނަ އަހަރުގެ ބޭއްވި ރިޔާސީ އިންތިހާބުގައި ސިޔާސީ މަޝްރަހުން ނުފެންނަ އާ މަންޒަރަކަށް ފެނުނީ ނޭޝަނަލް ޕާޓީ އޮފް މޯލްޑިވްސް ނަމުގައި އަލަަށް އުފެއްދި ސިޔާސީ ޕާޓީން މި އިންތިހާބުގައި ވާދަކުރުމެވެ. މީގެ ކުރިން ޖުމްހޫރީ ޕާޓީގައި އިސްކޮށް އުޅުއްވި ކުރީގެ ޑިފެންސް މިނިސްޓަރު މުހައްމަދު ނާޒިމާއި ކުރީގެ ޕޮލިސް ކޮމިޝަނަރު އަބްދުﷲ ރިޔާޒް އިސްކޮށް ތިއްބަވާ ޕާޓީން ނެރުނު ކެންޑިޑޭޓަށް ތާއީދު ހޯދަން ކެމްޕެއިންގައި މަސައްކަތްކުރީ އެ ޕާޓީގެ ފިކުރު ވިއްކައިގެނެވެ. ކެމްޕެއިނުގައި އެ ޕާޓީން ގެންދިޔައީ އެމްޑީޕީ އާއި ޕީޕީއެމް އަށް ބަހުގެ ހަމަލާތައް ދެމުންނެވެ. އަދި ދެ ޕާޓީން ކުރެ ތިން ވަނަ ފިކުރަކަށް މަސައްކަތްކުރާ ކަމަށް އެ ޕާޓީން ގެންދިޔައީ ބުނަމުންނެވެ.
އަންނަ ރިޔާސީ އިންތިހާބުގައި ވާދަކުރާނެ ކަމަށް އިއުލާންކޮށްފައިވާ އެމްއެންޕީއަށް މިއީ ރަނގަޅު ފިލާވަޅަކަށްވާނެ އެވެ. ސިޔާސީ މަޝްރަހާއި އެ ޕާޓީގެ ފިކުރު ހިނގާނެ ވަރު މި އިންތިހާބުން މިހާރު ކޮންމެވެސް ވަރަކަށް އެނގޭނެ އެވެ.
އެމްޑީޕީއަށް ރަންގޮނޑީގެ ޝަރަފު، އެކަމު ނަތީޖާ ކިހިނެތް
ރާއްޖޭގެ ސިޔާސީ މަޝްރަހްގެ ހާލަތު ދެނެގަތުމަށް ނެގި ވޯޓެއްކަމަށް ބަލައިގެން އެންމެގެ ލޯތައް އަމާޒު ކޮށްގެން ތިބި އިންތިހާބުގެ ނަތީޖާ ވޯޓުލާ ނިމުނުތާ ތިން ގަޑިއިރެއްހާއިރު ތެރޭގައި ޔަގީންވެއްޖެ އެވެ. މި އިންތިހާބުގައި ސަރުކާރުގެ ބޮޑު ކޯލިޝަނުގެ ތާއީދާއެކު ނިކުން އެމްޑީޕީގެ ކެންޑިޑޭޓް މުހައްމަދު ރާޝިދު (ރާޑޯ) 240 ވޯޓުގެ ތަފާތުން އިންތިހާބު ކާމިޔާބު ކުރެއްވި އެވެ. ރާޝިދަށް ޖުމްލަ 1،401 ވޯޓު ލިބުނެވެ. އޭނާއާ އެންމެ ގާތުން ވާދަކުރި ޕީޕީއެމްގެ މޫސާ ފަތުހީ އަށް ލިބިވަޑައިގަތީ 1،161 ވޯޓެވެ. ތިން ވަނަ ފިކުރެއް ވިއްކަން ނިކުތް އެމްއެންޕީގެ ކެންޑިޑޭޓް ހަންނާނަށް ހޯއްދެވުނީ 232 ވޯޓެވެ.
ކޮމަންޑޫ ދާއިރާގެ އިންތިހާބުން އެނގުނީ ކޯލިޝަންގައި ދެމި އޮވެ އެމްޑީޕީއަަށް ދެންވެސް ވެރިކަން ލިިބިދާނެކަން؟!
އިންތިހާބުގެ މި ނަތީޖާއިން އެމްޑީޕީ މޮޅުވިއަސް އެމްޑީޕީއަށް ޔަގީންވި އެއްމަކީ އަދިވެސް އިންތިހާބަށް އެހެން ޕާާޓީތައް އެ ޕާޓީއަށް މުހިންމުވާ ވަރުކަމަށް ބައެއް މީހުން ދެކެ އެވެ. އެމްޑީޕީއަށް ދެން އޮތް ރިޔާސީ އިންތިހާބުވެސް މި ކޯލިޝަނާއެކު ކާމިޔާބު ކުރެވިދާނެ ކަން މިއިން އެނގިއްޖެ ކަމަށް ވެސް ބައެއް މީހުން ދެކުނެވެ.
އެމްޑީޕީއަށް އެކަނި ދެންވެސް ނުވާނެ ކަމަށް ގަބޫލުކުރާ މީހުން އެގޮތައް ދެކެނީ އެމްޑީޕީ އާއި ޕީޕީއެމްގެ ކެންޑިޑޭޓާ ދެމެދު ހުރި ފަރަގުގެ ބޮޑު ކަމުންނެވެ. އަދާލަތު ޕާޓީގެ ވެސް ކޮންމެވެސް ވަރެއްގެ ތާއީދެއް އޮންނަ ކޮަމަންޑޫ ދާއިރާއިން އެމްޑީޕީއަށް ލިބުނު ކާމިޔާބު ފަހަތުގައި ޝެއިހް އިމްރާނާއި އިސްލާމިކް މިނިސްޓަރު ޑރ. އަހުމަދު ޒާހިރު އަލީފަދަ ބޭފުޅުން ކުރެއްވި މަސައްކަތުގެ ބައެއް މީހުން ފާހަގަކުރެ އެވެ. އަދި ގާސިމް އިބްރާހިމް މީގެ ކުރިން ބައެއް މަސައްކަތްތައް ހިންގެވި ކޮމަންޑޫ ދާއިރާއިން ލިބުނު ކާމިޔާބީގެ ފަހަތުގައި ގާސިމްގެ މަސައްކަތުގައިވެސް ކުޑަ ނަމަވެސް ހިއްސާއެއް އޮންނާނެ ކަމަށް މީހުން ގަބޫލުކުރެ އެވެ. އެހެން ނަމަވެސް ރާއްޖޭގައި އަދިވެސް އެއް ޕާޓީއެއް ގޮތައް އެންމެ މަގުބޫލީ އެމްޑީޕީކަން މި އިންތިހާބުން މާބޮޑަށް ސާފުކަން ހިނގައްޖެ އެވެ. އެކަމު އެ ޕާޓީއަށް ރިޔާސީ އިންތިހާބުގެ ޔަގީންކަން އޮތީ އެހެން ޕާޓީތަކާއެކުކަން އެނގިއްޖެ އެވެ. ވޯޓުލީ މީހުންގެ 50 ޕަސެންޓް ވޯޓު ވެސް ކާމިޔާބުވި އެމްޑީޕީގެ ކެންޑީޑޭޓަށް ނުލިބުމުން އެކަން އެނގެ އެވެ.
ޕީޕީއެމްގެ މަގުބޫލުކަން އަދިވެސް ކުޑައެއް ނޫން އެކަމު އެހެން ބަޔަކު ބޭނުންވޭ
ޕީޕީއެމްއިން މިހާރު ވިއްކަމުންދާ އިންޑިޔާ އައުޓް ސިޔާސަތާއި ސަރުކާރާ ދެކޮޅު ސިޔާސަތައް އަދިވެސް އެމްޑީޕީގެ ފިކުރާ ގާތްކުރާ ވަރަށް މީހުން ތިބިކަން މި އިންތިހާބުން އެނގިގެން ހިނގައްޖެ އެވެ. ކޯލިޝަނާ ވާދަކޮށްގެން އެ ޕާޓީން ހޯދި ނަތީޖާއަކީ ކާމިޔާބީއެއް ކަމަށް އެ ޕާޓީން ދެކުނު ނަމަވެސް އެ ޕާޓީއާ ކޯލިޝަން ހަދާނެ އެހެން ޕާޓީއެއް ނެތި ރިޔާސީ އިންތިހާބެއް ކާމިޔާބު ކުރެވެވޭނެ ގޮތެއް މި އިންތިހާބަކުންވެސް ސާފެއްނުވެ އެވެ. ބައެއް މީހުން ދެކޭ ގޮތުގައި މިއިން އެނގުނީ ޕީޕީއެމް ދެވަނަ އިން މައްޗަށް އެރޭނެ ގޮތެއް ނެތް ކަމަށެވެ. އެއީ އަދާލަތު ޕާޓީ އާއި ޖުމްހޫރީ ޕާޓީ އެގޮތައް އެމްޑީޕީއާއެކު އޮއްވާ އިންތިހާބެއް އެއް ޕާޓީއަކަށް ބުރަވުމަކީ ނާދިރު ކަމެއް ކަމަށް މި ނަތީޖާއިން މީހުންދެކެ އެވެ.
ކޮމަންޑޫ ދާއިރާގެ ކުޑަ އިންތިހާބުން ނެރެދިން ބޮޑު ނަތީޖާ އެކި ގޮތް ގޮތައް މީހުން މާނަކުރި ނަމަވެސް މި ސަރުކާރަށް ކޯލިޝަނުގައި އޮވެގެން ދެ ވަނަ ފަހަރަށް ވެރިކަމަށް އާދެވުމުގެ ފުރުސަަތު ބޮޑީ ނަތީޖާގައި ހުރި ފަރަގާއި ކުރި މަސައްކަތުގެ މައްޗަށް ބިނާކޮށެވެ.
އެކި މީހުން އެކި ގޮތްގޮތައް މި ނަތީޖާ މާނަކުރި ނަމަވެސް އަންނަ އަހަރުގެ ރިޔާސީ އިންތިހާބަށް ކުރިމަލާން ބޭނުންވާ ޕާޓީތަކުން ކޮމަންޑޫ ދާއިރާގެ މި ނަތީޖާގެ ބޭނުން ހިފާނެކަން ކަށަވަރެވެ.