ސަލްމާން ހާން ހާއްސަ ފެނިލުމަކުން ފެންނަ އަދި އޭނާގެ އަންހެން ކޮއްކޮ އަލްވިރާ އާއި ޅިޔަނު އަތުލް އަގްނިހޯތުރީ ޕްރޮޑިއުސްކޮށްފައިވާ "އޮ ތޭރީ" ގެ ފުރަތަމަ ޓްރެއިލާ ލޯންޗްކޮށް، އަންނަ މާޗް މަހުގެ 28 ގައި ފިލްމް ރިލީޒް ކުރާ ގޮތަށް ހަމަޖައްސައިފި އެވެ.
އިންޑިއާގައި ވަކި ހިއްޕާލައިފައިވާ ކޮރަޕްޝަނުގެ ކުޅިގަނޑުތަކެއްް ހެއްވާ މަޖާ ގޮތަކަށް ދައްކުވައިދޭ "އޮ ތޭރީ" ގައި ކިޔައި ދޭނީކޮރަޕްޝަނާ ދެކޮޅަށް މަސައްކަތް ކުރާ ދެ އެކުވަރިންގެ ވާހަކަ އެވެ.
އެ ދެ ރޯލުން ފެނިގެން ދާނީ "ފުކްރޭ" އިން އާންމުންގެ ސަމާލުކަން ހޯދި ޒުވާން އެކްޓަރު ޕުލްކިތު ސަމަރަތާއި އަލަށް ތައާރަފްވާ ބިލާލް އަމްރޯހީ އެވެ.
މީގެ އިތުރުން މި ފިލްމުގެ މުހިއްމު ރޯލްތަކުން ސާރާ ޖޭން ޑައަސް އާއި އަނޫޕަމް ކޭރް ފަދަ ތަރިން ވެސް ފެނިގެން ދާނެ އެވެ.
ނިއު ދިއްލީގައި މަންޒަރުތައް ނަގާފައިވާ "އޮ ތޭރީ" ޑައިރެކްޓްކޮށްފައި ވަނީ އުމޭޝް ބިޝްޓް އެވެ.
މި ފިލްމަކީ ސަލްމާން ހާނާއި ކަރީނާ ކަޕޫރު ލީޑް ރޯލް ކުޅުނު "ބޮޑީގާޑް" އަށް ފަހު އަލްވިރާ އާއި އަތުލް ޕްރޮޑިއުސް ކުރާ ދެވަނަ ފިލްމެވެ.