އިންޑިއާގެ އޮސްކާގެ ގޮތުގައި ބައެއް މީހުން ސިފަ ކުރާ ފިލްމް ފެއާ އެވޯޑް ދާދި ފަހުން ވަނީ ބާއްވައިފަ އެވެ. ކުލަގަދަ ރަސްމިއްޔާތަކާ އެކު ބޭއްވި މި ފަހަރުގެ ފިލްމް ފެއާ އެވޯޓަކީ 59 ވަނަ ފިލްމް ފެއާ އެވޯޑް ހަފުލާ އެވެ.
މި ހަފުލާގެ އުސް އަލިތަކަށް ބަލާ އިރު، އެންމެ މޮޅު އެކްޓަރުގެ އެވޯޑް މި ފަހަރު ގެންދިޔައީ "ބާގް މިލްކާ ބާގް" އިން ފަރްހާން އަހްތަރެވެ.
އެންމެ މޮޅު ބަތަލާއަކަށް ސަންޖޭ ލީލާ ބަންސާލީގެ "ރާމް-ލީލާ" ގައި ކުޅުނު މޮޅު ރޯލުން ދީޕިކާ ވަނީ ދިފާއުކޮށްފަ އެވެ. މި އަހަރުގެ މިހާތަނަށް ބޭއްވި ގިނަ އެވޯޑް ހަފުުލާތަކުގައި ވެސް ދީޕިކާ ވަނީ އެންމެ މޮޅު ބަތަލާގެ އެވޯޑް ހޯދައިފަ އެވެ.
އެެންމެ މޮޅު ފިލްމަކަށް ވެސް "ބާގް މިލްކާ ބާގް" ހޮވުނު އިރު، އެންމެ މޮޅު ޑައިރެކްޓަރަކަށް ހޮވުނީ އެ ފިލްމް ޑައިރެކްޓް ކުރި އޯމް ޕްރަކާޝް މެހެރާ އެވެ.
އެންމެ މޮޅު ސަޕޯޓިން އެކްޓަރަކަށް "ލަންޗް ބޮކްސް" އިން ނަވާޒުއްދީން ސިއްދީގީ ހޮވުނު އިރު، އެންމެ މޮޅު ސަޕޯޓިން ބަތަލާއަކަށް ހޮވުނީ "ރާމް-ލީލާ" ގައި އާދަޔާހިލާފް ރޯލެއް ކުޅުނު ސްޕްރިޔާ ޕަތަކު އެވެ.
އަލަށް ތައާރަފްވި އެންމެ މޮޅު އެކްޓަރަކަށް "ރާންޖަނާ" އިން ދަނޫޝް ހޮވުނު އިރު، ބަތަލާއަކަށް ހޮވުނީ "ޝުދް ދޭސީ ރޮމާންސް" އިން ވާނީ ކަޕޫރެވެ.
އެންމެ މޮޅު އާ ޑައިރެކްޓަރަކަށް ހޮވުނީ "ލަންޗް ބޮކްސް" ގެ ޑައިރެކްޓަރު ރިތޭޝް ބަޓްރާ އެވެ.
އެހެން އެވޯޑްތަކަށް ބަލާ އިރު، އެންމެ މޮޅު ކްރިޓިކް އެކްޓަރަކަށް ހޮވުނީ "ޝާހިދް" އިން ރާޖްކުމާރް ޔާދަވް އެވެ. ބަތަލާއަކަށް ހޮވުނީ "ބީއޭ ޕާސް" ކުޅެގެން އެންެމެން ސިއްސުވާލި ޝިލްޕާ ޝުކްލާ އެވެ.
ސޮނީ ޓީވީގެ ޓްރެންޑްސެޓަ އޮފް ދި އިޔާގެ އެވޯޑް ގެންދިޔައީ ޝާހްރުކް ހާނާއި ދީޕިކާ ލީޑް ރޯލް ކުޅުނު "ޗެންނައި އެކްސްޕްރެސް" އެވެ.
އެންމެ މޮޅު މިއުޒިކު ޑައިރެކްޓަރުންނަށް ހޮވުނީ "އާޝިގީ 2" ގެ މިއުޒިކް ތައްޔާރުކޮށް ދިން މިތޫން، ޖީތު ގަންގޫލީ އަދި އަންކިތު ތިވާރީ އެވެ.
އެންމެ މޮޅު ފިރިހެން ލަވަ ކިއުންތެރިއަކަށް ހޮވުނީ "އާޝިގީ 2" ގެ "ތުމް ހީ ހޯ" ލަވައިގެ އަޑުގެ ވެރިޔާ އަރިޖިތު ސިންގެވެ. އެންމެ މޮޅު އަންހެން ލަވަ ކިއުންތެރިއަކީ "ލުޓޭރާ" ގެ "ސަވާރް ލޫ" ކިއުނު މޮނާލީ ތާކޫރެވެ.
އެންމެ މޮޅު ލިރިސްޓަކަށް ހޮވުނީ "ބާގް މިލްކާ ބާގް" ގެ "ޒިންދާ" ގެ ޅެން ލިއުނު ޕްރަސޫން ޖޯޝީ އެވެ.
އެންމެ މޮޅު ސްކްރީންޕްލޭއަކަށް ހޮވުނީ "ކައި ޕޯ ޗޭ" އެވެ.
އެންމެ މޮޅު ވާހަކައަށް ހޮވުނީ "ޖޯލީ އެލްއެލްބީ" އެވެ. އަދި އެންމެ މޮޅު ޑައިލޮގްގެ އެވޯޑް ލިބުނީ ވެސް އެ ފިލްމުގެ ޑައިލޮގް ލިއުނު ސުބާޝް ކަޕޫރަށެވެ.
"59 ވަނަ ފިލްމް ފެއާ" އެވޯޑް ހަފުލާގެ ރެކޯޑިން މާދަމާ ރޭ ސޮނީ ޓީވީން ދައްކާނެ އެވެ. ހަފުލާ ހުށަހަޅައި ދެނީ ޕްރިޔަންކާ ޗޯޕްޅާ އާއި ރަންބީރު ކަޕޫރެވެ.