ކެރެޓު ބޭނުން ކުރުމުން ހަނގަނޑުގައި ބިހި ނެގުމުން ދުރުވެ ހަންގަނޑު އޮމާންކޮށްދެ އެވެ. ކެރެޓްގައި ވިޓަމިން އޭ އާއި ބީ އީ އަދި ޕޮޓޭސިއަމް ވެސް ހިމެނެ އެވެ.
ހަންގަނޑު ރީތިވުމަށް މަގުފަހިވަނީ ކެރެޓްގައި ހުންނަ ވިޓަމިންސްގެ މާއްދާތަކުގެ ސަބަބުން ނެވެ.
ކެރެޓުން ތަފާތު ވައްތަރުގެ އެއްޗެހި ތައްޔާރު ކުރެވޭ ގޮތަށް ކެރެޓް ފޭޝަލް މާސްކް ވެސް ތައްޔާރު ކުރެވެ އެވެ. ތިރީގައި އެވަނީ ކެރެޓް ބޭނުންކޮށްގެން ހެދިދާނެ ފޭޝަލް މާސްކެކެވެ.
* ކެރެޓް ޓޮޕް ފޭޝަލް މާސްކް
ބޭނުންވާ ތަކެތި:
2 ނުވަތަ 3 ކެރެޓް
މޭޒުމަތީ 4 ސަމްސާ މާމުއި
ތައްޔާރު ކުރާނެ ގޮތް:
ކެރެޓް މަޑުވަންދެއް ކައްކާށެވެ. ކެއްކުމަށް ފަހު އެ ކެރެޓް މިކްސަރަކަށް އަޅާ ކުދިކުދި ކުރާށެވެ. އެއަށް ފަހު އެ އާއި މާމުއި އެއްކުރާށެވެ. މޫނުގައި އުނގުޅުމަށް ފަހު ދިހަ ވަރަކަށް މިނެޓް ފަހުން ދޮވެލާށެވެ.
މިއީ އާދައިގެ ހަންގަނޑު ހުންނަ ކުދިންނާ ހަންގަނޑު ތެޔޮކޮށް ހުންނަ ކުދިންނަށް ވަރަށް ރަނގަޅު ފޭޝަލް މާސްކެކެވެ.
މީގެ ތެރެއިން އިތުރު ފޭޝަލް މާސްކެއް ތައްޔާރު ކުރެވިދާނެ އެވެ.
އެގޮތުން ކުރިން ތައްޔާރުކޮށްފާއިވާ ކެރެޓް ޕޭސްޓްގެ ތެރެއަށް ލުނބޯ ހުތް އެޅިދާނެ އެވެ. ހަމަ އެގޮތަށް އޮލިވް އޮއިލް ވެސް ބޭނުން ކުރެވިދާނެ އެވެ. ކެރެޓް ފޭޝަލް މާސްކެކޭ އެއްގޮތަށް އާއްމުކޮށް ކެރެޓް ޖޫސް ބޭނުން ކުރުމުން ވެސް ހަންގަނޑު ރީތި ވެ އެވެ.