އައްޑު އަށް ނިސްބަތްވާ ރާއްޖޭގެ މަޝްހޫރު ފުޓްބޯޅަ ކުޅުންތެރިޔާ މުހައްމަދު އާރިފް (ބަކާ) ރައްޔިތުންގެ މަޖިލީހުގެ ކައުންސެލް ޖެނަރަލްގެ މަގާމުގައި ހުންނެވި ފާތުމަތު ފިލްޒާ އާ ކައިވެނިކޮށްފި އެވެ.
ހިތަދު އަށް ނިސްބަތްވާ އަދި މާޒިޔާ އަށް ކުޅެމުން އަންނަ ގައުމީ ފުޓްބޯޅަ ޓީމުގެ ހުނަރުވެރި މިޑްފީލްޑަރު ބަކާ އާއި ފިލްޒާގެ ކައިވެނީގެ ޕާޓީ ރޭ ވަނީ ދަރުބާރު ގޭގައި ބާއްވާފައި އެވެ.
އެ ދެ މީހުން ކައިވެނިކޮށްފައި މި ވަނީ ލޯބީގެ ގޮތުން ރައްޓެހިވެގެން އުޅޭތާ ދުވަސްތަކެއް ފަހުންނެވެ.
އެނގިފައިވާ ގޮތުގައި ވަރުގަދަ ޑްރެޑްލޮކްސް ދިގު އިސްތަށިގަނޑެއް އޮންނަ ބަކާ މިދިޔަ އަހަރު ބޯ ކޮށާލީ ވެސް ފިލްޒާގެ އެދިވަޑައިގަތުމަކަށެވެ.
ފިލްޒާއަކީ މީގެ ދެ އަހަރެއްހާ ދުވަސް ކުރިން މަޖިލީހުގެ ކައުންސެލް ޖެނެރަލް މަގާމަށް މަޖިލިހުން އަންޔަންކޮށްފައިވާ ބޭފުޅެކެވެ.
އޭނާ އާއި ބަކާ ކައިވެނި ކުރި އިރު، ބަކާ ވަނީ މިދިޔަ ސީޒަންގައި އޭނާ ކުޅުނު މާޒިޔާގެ ކޮންޓްރެކްޓް ވެސް މި އަހަރު އާކޮށްފަ އެވެ.