ރިލީޒް ކުރިތާ ފަސް އަހަރު ފަހުން އާމިރް ހާން ލީޑް ރޯލް ކުޅުނު ހިޓް ފިލްމް "3 އިޑިއަޓްސް" ޖަޕާނުގެ އެވޯޑަކަށް ނޮމިނޭޓްވެއްޖެ އެވެ.
އާމިރުގެ އިތުރުން ޝަރްމަން ޖޯޝީ އާއި އާރް. މަދަވަން އަދި ކަރީނާ ކަޕޫރު ލީޑް ރޯލް ކުޅެ ޑިސެމްބަރު 23، 2009 ގައި ރިލީޒް ކުރި "3 އިޑިއަޓްސް" ނޮމިނޭޓްވެފައި ވަނީ މި އަހަރު ބާއްވާ 37 ވަނަ ޖަޕާން އެކެޑެމީ އެވޯޑްސްގެ "އައުޓް ސްޓޭޑިން ފޮރިން ލެންގްއޭޖް" ކެޓަރީންނެވެ.
މި އެވޯޑަކީ 1978 ވަނަ އަހަރުން ފެށިގެން ނިޕޯން އެކެޑަމީ އެސޯސިއޭޝަންގެ ފަރާތުން ދެމުން އަންނަ އެވޯޑެކެވެ.
"3 އިޑިއަޓްސް" އާ އެކު ފޮރިން ލެންގްއޭޖް ކެޓަރީގައި ދެން ވާދަ ކުރަނީ މި އަހަރުގެ އޮސްކާ އަށް ވެސް ވާދަ ކުރާ ހޮލީވުޑްގެ ދެ ފިލްމަކާ އެކު އިތުރު ދެ ފިލްމެކެވެ.
އޭގެ ތެރޭގައި ހިމެނެނީ އޮސްކާ އަށް ވާދަ ކުރާ ޓޮމް ހޭންކްސްގެ "ކެޕްޓަން ފިލިޕްސް"، ޖޯޖް ކުލޫނީގެ "ގްރެވިޓީ" ގެ އިތުރުން "ލެސްމިސެރެބްސް" އަދި "ޖާންގޯ އަންޗެއިންޑް" އެވެ.
ރާޖްކުމާރު ހިރާނީ ޑައިރެކްޓް ކުރި "3 އިޑިއަޓްސް" އަކީ އިންޑިއާގެ ތައުލީމީ ނިޒާމަށް އަމާޒުކޮށް ހަދާފައިވާ ފިލްމެކެވެ. އަދި ފިލްމަކީ އިންޑިއާގެ މަޝްހޫރު ލިއުންތެރިޔާ ޗެތަން ބަގަތުގެ "ފައިވް ޕޮއިންޓް ސަމްވަން" އަސްލަކަށް ބަލައިގެން ހެދި ފިލްމެކެވެ.
ޖަޕާނަކީ ފަހަކަށް އައިސް އިންޑިއާގެ ފިލްމްތަކަށް ބޮޑު މާކެޓެއް ލިބެމުން އަންނަ ގައުމެކެވެ.
އެގޮތުން ސަލްމާން ހާނާއި ކެޓްރީނާ ކެއިފް 2012 ގައި ފެނިގެން ދިޔަ ފިލްމް "އެކް ތަ ޓައިގާ" އާއި ޝާހްރުކް ހާނާއި ދީޕިކާ ޕަދްކޯންގެ 2007 ވަނަ އަހަރުގެ ފިލްމް "އޯމް ޝާންތީ އޯމް" ވެސް ދާދި ފަހުން ޖަޕާނުގައި ވަނީ ޕްރިމިއާކޮށްފަ އެވެ.
ޖަޕާނުގެ 37 ވަނަ އެކެޑަމީ އެވޯޑްސް ހަފުލާ ބާއްވަން ހަމަޖެހިފައި ވަނީ އަންނަ މާޗް މަހުގެ 7 ވަނަ ދުވަހު އެވެ. ހަފުލާ އޮންނާނީ ޓޯކިއޯގެ ގްރޭންޑް ޕްރިންސް ހޮޓެލް ނިއު ޓަކަނާވާގަ އެވެ.