ރައްޔިތުންގެ މަޖިލީހުގެ މަރަދޫ ދާއިރާގެ ގޮނޑި މިހާރު ވެސް ފުރުއްވަމުން ގެންދަވާ ހަސަން އާދިލް، ކުރިއަށް މަޖިލިސް އިންތިހާބުގައި ޖުމްހޫރީ ޕާޓީގެ ފަރާތުން ވާދަ ކުރައްވަން ނިންމަވައިފި އެވެ.
ކުޑަ ކުއްޖަކާ ބެހުނު ކަމަށް ބުނާ މައްސަލައެއްގެ ދައުވާ ވެސް އުފުލުނު އާދިލް މިއަދު ކުރެއްވި ޓްވީޓެއްގައި ވިދާޅުވީ "ޕްރޮގްރެސިވް ކޯލިޝަންގެ ޖޭޕީގެ ފަރާތުން 2014 ވަނަ އަހަރުގެ ރައްޔިތުންގެ މަޖިލިސް މަރަދޫ ދާއިރާ އަށް ދެވަނަ ދައުރަކަށް ކުރިމަލުމަށް ނިންމައިފިން" ކަމަށެވެ.
މަޖިލީހުގައި ދުވަހަކު ވެސް ވާހަކަ ނުދައްކަވާ "ހަނު" މެމްބަރު އިތުރަށް ވިދާޅުވީ، ދާއިރާގެ ރައްޔިތުންގެ އެއްބާރުލުން މި ފަހަރު ވެސް އޭނާ އަށް ލިބޭނެ ކަމަށް އުންމީދު ކުރައްވާ ކަމަށެވެ.
އާދިލް އެންމެ ފުރަތަމަ މަރަދޫ ދާއިރާގެ މަޖިލިސް ގޮނޑި އަށް ހޮވުނީ ގައުމީ ޕާޓީގެ ކެންޑިޑޭޓެއްގެ ގޮތުންނެވެ. އެހެން ނަމަވެސް ދުވަސްތަކެއް ފަހުން، ދާއިރާގެ ރައްޔިތުންގެ އެދުމުގެ މަތިން ކަމަށް ބުނެ އެމްޑީޕީ އަށް ބަދަލުވެ ވަޑައިގަތެވެ.
އޭގެ ފަހުން އޭނާ ގުޅިވަޑައިގަތީ މަހުޖަނު ގާސިމް އިބްރާހީމްގެ ޖުމްހޫރީ ޕާޓީ އެވެ.