ފާއިތުވި ދެ އަހަރެއްހާ ދުވަހުގެ ތެރޭގައި އަށެއްކަ ފަހަރު އައްޑު އަށް އަޅުގަނޑު ގޮސްފީމެވެ. އެއީ އަމިއްލަ ބޭނުންތަކާއި ވަޒީފާ އާ ގުޅުންހުރި ތަފާތު ކަންކަމުގައެވެ.
މީގެ ތެރެއިން ގިނަ ދަތުރުތަކުގައި ކައުންސިލަރަކާއި ބައްދަލުވެވޭތޯ ވަރަށް ގިނަގުނަ މަސައްކަތްތަކެއް ކުރެވިފައިވާނެ އެވެ. ޚާއްސަކޮށް މޭޔަރު އަބްދުﷲ ސޯދިގް(ސޯބެ) އާއި އޭނާގެ ނާއިބު ހަސަން ޝާހިދު އާ ބައްދަލުވެވޭތޯ އުޅެމެވެ. މީން މީހަކާ ބައްދަލު ނުވެވޭތާގައި ފޯނަށް ވެސް ޖަވާބު ދިނުމެއް ނޯވެ އެވެ.
މެސެޖެއް ފޮނުވައިގެން ވެސް ވަކި ސަހަލުހެން ހިޔެއް ނުވެއެވެ. ކައުންސިލް އިދާރާގައި މީޑިއާ ކޯޑިނޭޓަރެއްގެ ވަޒީފާ އަދާކުރާ މީހާއަކީ ކުރީއްސުރެ ރަހުމަތްތެރިޔަކަށްވާތީ އޭނާއާ ގުޅައިގެން ކަމެއް ވެދާނެކަމަށް ބަލައިގެން ކުރި މަސައްކަތުން ނުކުތް ނަތީޖާވެސް ހަމަ ސުމެކެވެ.
މިވެރިންނާ ބައްދަލުކުރުން މިހާ ދަތި އުނދަގޫ ކަމަކަށް މިވާ ސަބަބެއް ނުވިސްނެއެވެ. ކައުންސިލަރަކާ ބައްދަލުވެވޭތޯ އަޅުގަނޑު މަސައްކަތްކުރީ އެއިން މީހެއްގެ ފަރާތުން ނާޖާއިޒު ފައިދާއެއް ހޯދުމުގެ ނިޔަތެއް އޮވެގެނެއް ނޫނެވެ. އެއިން މީހެއްގެ ފަރާތުން އަޅުގަނޑު އެދޭ އަމިއްލަ ކަމެއް އޮތީކީވެސް ނޫނެވެ.
އެއީ ޒިންމާދާރު މަގާމުތަކެއްގައި ތިބި ބަޔަކަށްވެފައި ރައްޔިތުންނަށް ޖަވާބުދާރީވުމަކީ އެމީހުންނަށް ލާޒިމްކުރާ ކަމަކަށްވާތީ އަޅުގަނޑު އުޅުނީ ރައްޔިތުންގެ ބައެއްކަހަލަ ޝަކުވާތަކަށް ޖަވާބެއް ހޯދުމަށެވެ. އެކަން އެމީހުންނަށްވެސް އެނގެނީ ތޯއްޗެކެވެ. އަޅުގަނޑު ގަބޫލުކުރާ ގޮތުގައި އެއިން ކައުންސިލަރެއްގެ ކިބައިގައި ޖަވާބުދާރީވުމުގެ ގާބިލްކަމެއް ނެތެވެ. މަގާމާއި އެކަށޭނަ ހުޝިޔާރުކަމާއި ތޫނުފިލިކަމެއް ވެސް ނެތެވެ. ކަންކަން ހާމަކޮށްދިނުމުގެ ބަދަލުގައި ތަންތަނަށްވަދެ ބޮނދައިގެން ތިބެން ޖެހޭ އެހެން އެއްވެސް ސަބަބެއް އޮންނާނެ ކަމަކަށް ނުވިސްނެއެވެ.
ބައެއް މީހުން ބުނާތީ އަޑުއިވެއެވެ. ކައުންސިލަރުންގެ އެންމެ ބޮޑު ޝަކުވާއަކީ ބަޖެޓް ނުލިބުމުގެ ޝަކުވާއެވެ. ކަންކަން ނުކުރެވެނީ ބަޖެޓް ނުލިބިގެންނޯލައެވެ. މަގުތައް ނެހެދި ހަލާކުވުމާއި ބަނދަރުތައް ވީރާނާވުމާއި މިހެންގޮސް މިބާވަތުގެ ހުރިހާކަމެއް ގޮސް ނިމެނީ ބަޖެޓް ނުލިބުމާކަމަށް ވެއެވެ.
އެހެންކަމަށް ވަންޏާ އެވާހަކަ ދައްކަން ޓީވީ ރޭޑިއޯތަކަށް ނާރަނީ ކީއްވެގެންބާވައެވެ. ކަމުގެ ތަޖުރިބާކާރުންނާއެކު ބަހުސްކުރަން ޖެހިލުންވެ ފިލައި ތިބެނީ ކީއްވެގެންބާވައެވެ. ތިމާމެންގެ ފެންވަރާއި ހުނަރާއި ނުބައްދަލުގެ މުސާރަ އެބަ ބޭނުން ކުރެވެއެވެ. ތިމާމެން ނިސްބަތްވާ ޕާޓީގެ ކަމެއް ވިއްޔާ އެއީ ގާނޫންތައް މުގުރާލުންކަމަށްވިއަސް އެކަމެއް އެބަކުރެވެއެވެ. އެކަމަކު ބަޖެޓް ނުލިބިގެން ރައްޔިތުންނަށް ޚިދުމަތެއް ނުކުރެވެއެވެ. ޖަވާބުދާރީއެއްވެސް ނުވެވެއެވެ. މިއީ ދެން އަރަތެއް ކަހަލަ ކަމެކެވެ.
ކައުންސިލަރުންނޭ ކިޔައިގެން މިތާގައި އަޅުގަނޑު ޖުމްލަތަކެއް މިއަތުރާލަނީ އެއިން މީހަކާ ދޭތެރޭ ޒާތީ ކަމެއް އޮވެގެނެއް ނޫނެވެ. އޮންނާނީވެސް ދެން ކޮން ޒާތީ ކަމެއް ހެއްޔެވެ. ހިތަދޫ އެވެނިގެއެއްގެ ސޯބެއަކާއި މީދޫ މިވެނި ގެއެއްގެ ޝާހިދުއަކާ އަޅުގަނޑަކާ ކޮން ކީކީއެއްތޯއެވެ. އަޅުގަނޑުގެ މައްސަލަ މިއޮތީ ކައުންސިލަރުންނާއެވެ.
ރައްޔިތުންނަށް ޚިދުމަތްކުރަން ރައްޔިތުން ހޮވާފައިތިބި ކައުންސިލަރުންނަށް އެމީހުންގެ މައްސޫލިއްޔަތު އަދާނުކުރެވެންޏާ އަޅުގަނޑު އެވާހަކަ ދައްކާނަމެވެ. އެހެންމީހުންވެސް ދައްކާނެއެވެ. އެކަމާ ރުޅިއަންނަ ބަޔަކު އަންނަންވީއެވެ.
ކަޅު ބިއްލޫރި ޖެހި ކާރުގައި ލިންކްރޯޑުގައި ބުރުޖަހާފައި ރައްޔިތުންގެ ފައިސާ ތިމާމެންގެ އަމިއްލަ ބޭނުންތަކަށް ތަޅައި ހުސްކުރީމާ ކައުންސިލަރުކަން އަދާކޮށް ނިމުނީ ކަމަށް އެވެރިން ހީކުރުމަކީވެސް އެކަށީގެންވާކަމެކެވެ.
މީހަކު ނުރުހިގެން އެއްޗެއް ބުނެފިއްޔާ އެމީހަކަށް ގުޅައިގެން ރޭގަނޑު ދަންވަރު ކޮފީއަށް ގެންގޮސް ކުޑަކުދިން ދައްކާޒާތުގެ ތާކުންތާކު ނުޖެހޭ ވާހަކަ ދެއްކީމާ މަގާމުގެ ޒިއްމާ އަދާކޮށް ނިމުނީކަމަށް ހީކުރުމަކީވެސް ވެދާނެ ކަމެކެވެ. މިހާތަނަށް އައްޑޫއަށް ކުރިމަތިވި ބޮޑު އެއްވެސް ކަމެއްގައި މީން މީހަކަށް އެއްޗެއް ވިސްނިގެން ނުކުމެ ކުރިކަމެއް ނެތެވެ. ގަމުގެ އެއަޕޯޓްގެ މައްސަލާގައި މިދޭތެރެއިން ހިނގައިދިޔަ ކަންތައް މިކަމުގެ މިސާލަކަށް ފުދެއެވެ. މީން މީހަކަށް އެއްޗެއް ވިސްނެނީ ވެސް ވާނެ އެއްޗެއް ވެ ނިމޭ ފަހުންނެވެ.
މި މައްސަލާގައި ދެން ވާހަކަ ގިނަކުރުމުގެ މާބޮޑު ބޭނުމެއް ނެތެވެ. އައްޑޫ ކައުންސިލަރުންނަކީ އެކަމަށް ކުފޫ ހަމަވާބައެއް ނޫނެވެ. ދެންވެސް ރައްޔިތުންނަށް ކަމެއްކޮށްދޭން ބޭނުމިއްޔާ އިސްތިއުފާދީފައި ގެއަށްދިއުމަށްވުރެ ބޮޑު ހެވެއް ނޯންނާނެއެވެ.
ކޮންމެހެން ޒާތްޒާތުގެ ބަހަނާ ކުރިމަތިކޮށް ބަޖެޓޭ އެންމެ ހަ މީހުންނޭ ސިވިލް ސާވަންޓުންނޭ މިސްކިތު މުދިމުންނޭ ކިޔުމުގެ ބޭނުމެއް ނެތެވެ. ތިޔައީ ކޮން ބައެއްކަމާއި ތިޔަ މީހުންގެ ކޮށިކަން އެންމެންނަށްވެސް އެނގި ސާފުވެ ނިމިއްޖެއެވެ. މަގާމުތަކުގައި ތިޔަ މީހުން ހޭދަކުރާ ކޮންމެ ދުވަހަކީ ރައްޔިތުންގެ ވޭންތައް އިތުރުވާ ދުވަހެކެވެ.
އެހެންވީމާ ލަސްނުކޮށް އަވަހަށް ފެއްސިގަންނާށެވެ.