އަރުޖުން ކަޕޫރަށް އަނިޔާވެގެން "ތޭވަރު" ގެ ޝޫޓިން ފެށުން ލަސްކޮށްފި އެވެ.
މީޑިއާ ރިޕޯޓްތައް ބުނާ ގޮތުން އަރުޖުން އަށް އަނިޔާވީ މިހާރު ރިލީޒް ކުރަން ތައްޔާރުވަމުން އަންނަ "ގުންޑޭ" ގެ ޝޫޓިއެއްގެ ތެރޭގައި އުޅެނިކޮށެވެ. އަދި އަނިޔާވެފައި ވަނީ އޭނާގެ ބުރަކަށްޓަށެވެ. އެހެންވެ އޭނާ މިހާރު ވަނީ ޖިމަށް ދިއުން ވެސް މެދުކަނޑާލައިފަ އެވެ.
ގިނަ އަދަދެއްގެ އެކްޝަން މަންޒަރުތަކެއް ހިމެނޭ "ގުންޑޭ" ސިނަމާތަކަށް އަންނާނީ އަންނަ މަހުގެ 14 ވަނަ ދުވަހު އެވެ. މި ފިލްމުގައި އަރުޖުން އާ އެކު ޕްރިޔަންކާ ޗޯޕްޅާ އާއި ރަންވީރު ސިންގް ވެސް މުހިއްމު ރޯލްތަކެއް އަދާ ކުރެ އެވެ.
އަރުޖުން އަށް އަނިޔާވެފައިވާތީ 15 ދުވަހުގެ ރެސްޓަކަށް އޭނާ ވަނީ އެދިފަ އެވެ. "ތޭވަރު" އަކީ އަރުޖުންގެ ބައްޕަ ބޮނީ ކަޕޫރު ޕްރޮޑިއުސް ކުރާ ފިލްމެކެވެ.
މި ފިލްމަކީ ތަމަޅަ ފިލްމެއް ކަމަށްވާ "އޮއްކަޅޫ" ގެ ރިމެކިންއެކެވެ.
އަމިތު ޝަރްމާ ޑައިރެކްޓް ކުރާ "ތޭވަރު" ގައު ބަތަލާއެއްގެ ގޮތުގައި އަރުޖުން އާ އެކު ފެނިގެން ދާނީ ސޮނާކްޝީ ސިންހާ އެވެ. އަދި މަނޯޖް ބަޖްޕާއީ ވެސް މި ފިލްމުގެ މުހިއްމު ރޯލަކުން ފެނިގެން ދާނެ އެވެ.