އިންޑިއާގެ އެންމެ ވަރުގަދަ ޕްރޮޑަކްޝަން ހައުސް ޔާޝްރާޖް ފިލްމްސް (ވައިއާރްއެފް) ގެ އެމެރިކާގެ ސްޓޫޑިއޯ ވައިއާރްއެފް އެންޓަޓެއިންމަންޓުން އުފެއްދި "ގްރޭސް އޮފް މޮނާކޯ" މި އަހަރު ބާއްވާ 67 ވަނަ ކާން ފިލްމް ފެސްޓިވަލް ހުޅުވައިދޭ ފިލްމުތަކުގެ ތެރޭގައި ހިމެނިއްޖެ އެވެ.
މި ފިލްމުގައި ލީޑް ރޯލް ކުޅެފައި ވަނީ ހޮލީވުޑްގެ މަޝްހޫރު ބަތަލާ ނިކޯލް ކިޑްމަން އެވެ. އޭނާގެ އިތުރުން ޓިމް ރޮތު އަދި ފްރޭންކް ލަންގެލާ ވެސް "ގްރޭސް އޮފް މޮނާކޯ" ގެ މުހިއްމު ރޯލްތަކުން ފެނިގެން ދާނެ އެވެ.
މި ފިލްމް ކާން ފިލްމް ފެސްޓިވަލްގައި ޕްރީމިއާ ކުރަން ހަމަޖެހުމާ އެކު ލޮން އެންޖަލިސްގައި ހިންގާ ވައިއާރްއެފްގެ ސީއީއޯ އަދި "ދޫމް" ސީރީސްގެ އަލީގެ ކެރެކްޓާ ކުޅޭ އުދޭ ޗޯޕްޅާ ބުނީ ކާން ފިލްމް ފެސްޓިވަލުން "ގްރޭސް އޮފް މޮނާކޯ" އަށް ފުރުސަތު ލިބުމަކީ ބޮޑު އުފަލެއް އަދި ޝަރަފެއް ކަމަށެވެ.
"މި ފިލްމުގެ ސްކްރިޕްޓް ކިޔާލުމާ އެކު ވެސް އަހަންނަށް ޔަގީންވި މި ފިލްމަކީ ބެލުންތެރިންނަށް ވަރަށް ކަމުދާނެ ފިލްމެއްކަން. އަނެއްކޮޅުން މި ފިލްމަށް ނިކޯލް ކިޑްމަން ގެނެވުމަކީ ވެސް ފިލްމަށް ލިބުނު ވަރަށް ބޮޑު ކުރިއެރުމެއް،" އުދޭ ބުންޏެވެ.
އަރާޝް އަމެލް އާއި ޕިއެރޭ އެންގް-ލެ ޕޯގަމްގެ ސްކްރީންޕްލޭއަކަށް ބިނާކޮށް ހެދި "ގްރޭސް އޮފް މޮނާކޯ" ޑައިރެކްޓްކޮށްފައި ވަނީ އޮލިވިއާ ދަހާން އެވެ.
މި ފިލްމުގައި ކިޔައި ދެނީ މޮނާކޯގެ ކުރީގެ އަމީރާ ގްރޭސް ކެލީ އޭނާގެ ގައުމާއި ފްރާންސާ ދެމެދު އޮންނަ ގުޅުން ރަނގަޅު ކުރަން ކުރާ އާދަޔާހިލާފު އަސަރު ގަދަ މަސައްކަތުގެ ވާހަކަ އެވެ.
"ގްރޭސް އޮފް މޮނާކޯ" ގައި ކެލީގެ ރޯލް އަދާ ކުރަނީ ކިޑްމަން އެވެ.