ކުރިއަށް އޮތް ރައްޔިތުންގެ މަޖިލީހުގައި ޕީޕީއެމްގެ ފަރާތުން ވާދަ ކުރާ ކެންޑިޑޭޓުން ހޮވުމަށް ބާއްވާ ޕްރައިމެރީގައި ފޭދޫ ދާއިރާގެ ޓިކެޓަށް ވާދަ ކުރައްވާ މުހައްމަދު މޫމިން (މޫނާ) އާއި އަހުމަދު މަރުޒޫގް (މަރާ) އަދި މައްނޫގެ އިބްރާހީދީދީ (އައިބީ) ޕީޕީއެމަށް ފޯމް ހުށަހަޅައިފި އެވެ.
އެނގިފައިވާ ގޮތުގައި މޫނާ އާއި އައިބީ ޓިކެޓަށް ވާދަ ކުރާ އިރު، މި ދެ މީހުންނާ ދޭތެރޭ ޕީޕީއެމްގެ ތެރޭގައި ވަނީ ހިޔާލު ތަފާވުންތަކެއް ވެސް އުފެދިފަ އެވެ.
އަޑުތައް އިވޭ ގޮތުން ޕްރައިމެރީގައި ގަމުގައި "ސައުތު ލޭންޑް" ރެސްޓޯރެންޓް ހިންގާ އައިބީ ވާދަ ކުރާކަށް ޕީޕީއެމުން ބޭނުމެއް ނުވެ އެވެ. އޭގެ ބަދަލުގައި ބޭނުންވީ ޕްރައިމެރީއަކާ ނުލައި އެސްޓީއޯގައި ވަޒީފާ އަދާ ކުރާ މޫނާ އަށް ޓިކެޓް ދޭށެވެ.
އަދި މިފަދަ ހިޔާލު ތަފާތުވުންތަކެއް އުފެދިފައި ވަނީ އައިބީ އިންތިހާބުގައި ވާދަ ކުރިޔަސް ނުހޮވޭނެ ކަމަށް ޕީޕީއެމްގެ އިސް ފަރާތްތަކަށް ގަބޫލް ކުރެވޭތީ އެވެ.
ޕްރައިމެރީގައި ވާދަ ކުރަން ބޭނުންވާ ކެންޑިޑޭޓުންނަށް ފޯމް ހުށަހެޅުމަށް ދީފައި ވަނީ މިއަދާ ހަމައަށެވެ.
ޕީޕީއެމްގެ ޕްރައިމެރީ ބާއްވަން ހަމަޖެހިފައި ވަނީ އަންނަ މަހުގެ 4-5 ހިސާބުގަ އެވެ.