ރައްޔިތުންގެ މަޖިލީހުގެ މީދޫ ދާއިރާގެ އެމްޑީޕީ ޕްރައިމަރީގައި ވާދަކޮށް ބަލިވި އަލީ ޝަހީމު ރައްޔިތުންގެ މަޖިލިހުގެ އިންތިޚާބުގައި ސަޕޯޓްކޮށް މަޖިލިހުގެ މީދޫ ދާއިރާގެ ގޮޑި އެމްޑީޕީ އަށް ކާމިޔާބުކޮށް ދިނުމަށް މަސައްކަތްކޮށް ދެއްވާނެ ކަމުގެ ޔަގީންކަން އޮތް ކަމަށް އެ ދާއިރާގެ ޓިކެޓް ކާމިޔާބް ކުރެއްވި ރޮޒައިނާ އާދަމް ވިދާޅުވެއްޖެ އެވެ.
"ޝަހީމު އަޅުގަޑަށް ގުޅުއްވާފައި ދެންނެވި ޝަހީމު އާއި ޝަހީމު އާ އެއްކޮށް މީދޫގައި މަސައްކަތް ކުރެއްވި ހުރިހާ ފަރާތްތަކެއްގެ ތާއިދާއި އެއްބާރުލުން މީދޫ ދާއިރާގެ ގޮނޑި އެމްޑީޕީ އަށް ކާމިޔާބުކޮށްދިނުމުގައި މަސައްކަތްކޮށް ދެއްވާނެ ކަމަށް. އަދި ޕްރައިމަރީގެ ވޯޓްލުމުގެ ކަންތައް ހިނގަމުން ދިޔަ އިރު ވެސް ޝަހީމު އެކިއެކި ކަންކަމުގައި މަޝްވަރާ ހޯދުމަށް އަޅުގަނޑަށް ގުޅުއްވަމުން ގޮސްފައިވޭ،" ތުލުސްދޫ ދާއިރާގެ މިހާރުގެ މެމްބަރު ވިދާޅުވި އެވެ. "ވާދަވެރިކޮށް ބޭއްވޭ އިންތިޚާބެއްގައި ކުދިކުދި މައްސަލަތައް ހުންނާނެ. އެކަމަކު އަޅުގަނޑުމެންގެ މެދުގައި އެއްވެސް މައްސަލައެއް ނެތް."
މިދިޔަ ހުކުރު ދުވަހު ބޭއްވި ޕްރައިމެރީގައި ރޮޒެއިނާ އަށް ލިބުނު ކާމިޔާބީ ފާހަގަ ކުރަން މީދޫގައި ބޭއްވި ބައްދަލުވުމެއްގައި އޭނާ އިތުރަށް ވިދާޅުވީ މީދޫ ދާއިރާގެ ގޮނޑި އަށް ޕީޕީއެމުން ވާދަކުރަން ނިންމާފައި ވަނިކޮށް ކޯލިޝަނުގައި ހިމެނޭ ޖޭ ޕީއަށް މީދޫ ދާއިރާގެ ގޮޑި ހަމަޖެހުމުން ކޯލިޝަންގެ ތެރޭގައި ހިތްހަމަނުޖެހުންތަކެއް ހުރުމުގެ ސަބަބުން އެ ގޮނޑި ކާމިޔާބު ކުރުމުގައި މިހާރު އިތުރު ފަސޭހަތަކެއް ލިބިގެން ގޮސްފައިވާ ކަމަށެވެ.
"މީދޫ ދާއިރާ އަށް ޕީޕީއެމްގެ ކެނޑިޑޭޓަކު ނެރުމަށް އެ ޕާޓީން މަސައްކަތް ކުރަމުން ދަނިކޮށް މިހާރުގެ ސަރުކާރުގެ ކޯލިޝަނުގައި ހިމެނޭ ޖޭޕީއަށް މީދޫ ދާއިރާ ލައްވާލުމުން ޕީޕީއެމްގެ މެމްބަރުންގެ ތެރޭގައި ބައިބައިވުން އުފެދި މިގޮޑި އެމްޑީޕީއަށް ކާމިޔާބުވުމުގެ ފުރުސަތު މިހާރު ވަނީ ބޮޑުވެފައި. ވީމާ އަޅުގަނޑުމެން ހުރިހާބޭފުޅުން އެކުގައި މަސައްކަތްކޮށްގެން މި ގޮނޑި އެމްޑީޕީ އަށް ކާމިޔާބުކޮށް ދިނުމަށް މަސައްކަތްކޮށް ދިނުމަށް ގޮވާލަން. އިރާދަކުރެއްވިއްޔާ އައްޑު އަތޮޅުގެ ހުރިހާ ގޮނޑިއެއް އަޅުގަނޑުމެން ކާމިޔާބު ކުރާނަން." ރޮޒެއިނާ ވިދާޅުވި އެވެ.
މީދޫ ދާއިރާގެ ޕްރައިމެރީގައި ރޮޒައިނާ އާ ވާދަ ކުރީ ޝަހީމްގެ އިތުރުން މަރަދޫފޭދޫ މުހައްމަދު ލިރާރެވެ. އެހެން ނަމަވެސް ޕްރައިމެރީގެ ނަތީޖާގެ ސައްހަކަމާ ދޭތެރޭ ސުވާލް އުފެދޭ ކަމަށާއި ނަތީޖާ ގަބޫލް ނުކުރާ ކަމަށް ލިރާރު ވަނީ ވިދާޅުވެފަ އެވެ.
އަދި އެ މައްސަލަ ބަލައި ދިނުމަށް ލިރާރު ވަނީ އެމްޑީޕީ އަށް ވެސް ހުށަހަޅައިފަ އެވެ.