ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ވާދަ ކުރަން ސަރުކާރު ހިންގާ ކޯލިޝަނުގައި ހިމެނޭ ޖުމުހޫރީ ޕާޓީ އަށް ދޫކޮށްފައިވާ 28 ދާއިރާގެ ތެރެއިން ހިތަދޫ ދެކުނު ދާއިރާގެ ގޮނޑި އާއި މަރަދޫ ދާއިރާގެ ގޮނޑި، އެ ދެ ދާއިރާ މިހާރު ވެސް ތަމްސީލް ކުރައްވަމުން ގެންދަވާ ދެ މެމްބަރުންނަށް ޕްރައިމެރީއަކާ ނުލައި ލިބިއްޖެ އެވެ.
ހިތަދޫ ދެކުނު ދާއިރާގެ މެމްބަރު ހަސަން ލަތީފް އާއި މަރަދޫ ދާއިރާގެ މެމްބަރު ޙަސަން އާދިލް އަށް ޕްރައިމަރީއަކާ ނުލައި ޕާޓީގެ ޓިކެޓް ލިބުނީ އެ ޕާޓީގެ މެމްބަރުންގެ ތެރެއިން މި ވަގުތު މަޖިލިހުގައި ދާއިރާތައް ތަމްސީލް ކުރާ މެމްބަރުންނަށް ޕްރައިމަރީއަކާ ނުލައި ޓިކެޓް ދޭ ގޮތަށް ހަމަޖެއްސުމުންނެވެ.
ހަސަން ލަތީފަކީ ރިޔާސީ އިންތިހާބުގެ ދެވަނަ ބުރުގެ ތެރޭގައި ޑީއާރްޕީގައި ހުންނެވުމަށް ފަހު ޖޭޕީ އާ ގުޅިވަޑައިގަތް މެމްބަރެކެވެ.
ޖޭޕީގެ ގައުމީ ހިންގާ ކޮމެޓީގެ މެންބަރު އަދި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ހަސަން ޝާހު ވިދާޅުވީ ޕްރައިމަރީއަކާ ނުލައި އެ ޕާޓީގެ ޓިކެޓް ކަށަވަރުވެފައި ވަނީ ނުވަ ދާއިރާއެއް ކަމަށެވެ.
އޭގެތެރޭގައި ޖޭޕީގެ ލީޑަރު މާމިގިލީ ދާއިރާގެ މެންބަރު ގާސިމް އިބްރާހީމާއި ނައިފަރު ދާއިރާގެ މެންބަރު އަހްމަދު މުޙައްމަދާއި، މަތިވެރި ދާއިރާގެ މެންބަރު ހުސެއިން މުޙައްމަދުގެ އިތުރުން މަރަދޫ ދާއިރާގެ މެންބަރު ހަސަން އާދިލް އާާއި ހިތަދޫ ދެކުނު ދާއިރާގެ މެންބަރު ޙަސަން ލަޠީފެވެ.
އަދި ދަނގެތި ދާއި ރާއިން އެ ޕާޓީގެ ޑެޕިއުޓީ ލީޑަރު އިލްހާމް އަހުމަދަށް ވެސް ވަނީ ޕްރައިމަރީއަކާ ނުލައި ޓިކެޓް ލިބިފަ އެވެ.