އެމްޑީޕީގެ ސްޕޯކްސްޕާސަންގެ މަގާމުން ރައްޔިތުންގެ މަޖިލީހުގެ މާފަންނު މެދު ދާއިރާ މެމްބަރު އިމްތިޔާޒު ފަހްމީ (އިންތި) އިސްތިއުފާ ދެއްވައިފިއެވެ.
އެމްޑީޕީގެ ޗެއާޕާސަންގެ ނައިބު އަލީ ނިޔާޒަށް އެޑްރެސްކޮށް އިމްތިޔާޒް ފޮނުވި ސިޓީގައި ވިދާޅުވެފައިވަނީ، ސްޕޯކްސްޕާސަންގެ މަގާމުގައި ހޭދަކުރި މުއްދަތުގެ ތެރޭގައި އެމްޑީޕީގެ ލީޑަޝިޕާއި ސެކްރެޓޭރިއޭޓްގެ މުވައްޒަފުންނާއި މެމްބަރުންނާއެކު މަސައްކަތްކުރުމަށް ލިބުނު ފުރުސަތަކީ ސިޔާސީ ހަޔާތުގައި ލިބުނު ނުހަނު ބޮޑު ތަޖުރިބާއަކާއި ޝަރަފަކާއި އުފަލެއް ކަމަށެވެ.
ސްޕޯކްސްޕާސަންގެ މަގާމުން އިމްތިޔާޒް އިސްތިއުފާ ދެއްވާފައިވަނީ ޕާޓީގެ ޗެއާޕާސަންގެ މަގާމަށް ކުރިމަތި ލައްވާފައިވާތީއެވެ.
އެމް.ޑީ.ޕީ. ގެ ޗެއާޕާރސަންކަމަށް އަޅުގަނޑު ކުރިމަތިލާފައިވީހިދު، 2012 ވަނަ އަހަރުން ފެށިގެން އަދާކުރަމުންދިއަ، ޕާޓީގެ ސްޕޯކްސްޕާރސަންކަމުގެ މަގާމުން އަޅުގަނޑު އިސްތިއުފާދީފީމެވެ. pic.twitter.com/A5guTmFc6S
— 𝐈𝐦𝐭𝐡𝐢𝐲𝐚𝐳 𝐅𝐚𝐡𝐦𝐲 (@Imthiyazfahmy) February 16, 2022
2012 ވަނަ އަހަރު އެމްޑީޕީގެ ވެރިކަން ވައްޓާލި ހިސާބުން ފެށިގެން މިހާތަނަށްވެސް އެމްޑީޕީގެ ސްޕޯކްސްޕާސަންގެ މަގާމުގައި ހުންނެވީ އިމްތިޔާޒެވެ.
އިންތިގެ އިތުރުން އިކޮނޮމިކް މިނިސްޓަރު ފައްޔާޒް އިސްމާއިލްވެސް އެ މަގާމަށް ވާދަކުރައްވާނެކަން ހާމަކުރައްވާފައިވެއެވެ.
އެމްޑީޕީގެ ޗެއަރޕާސަން މަގާމާއި އަންހެނުންގެ ރޫހު، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަޤާމުގެ އިންތިހާބް ބޭއްވުމަށް ހަމަޖެހިފައިވަނީ އޭޕްރިލް 16 ވަނަ ދުވަހުއެވެ. އެ މަގާމުތަކަށް ކުރިމަތިލުމަށް ބޭނުންވާ ފަރާތްތަކަށް ކުރިމަތިލުމުގެ ފުރުސަތު ފެބްރުއަރީ 19 ވަނަ ދުވަހުގެ 16:00 އާހަމައަށް ހުޅުވާލާފައިވާ ކަމަށް އެމްޑީޕީން ބުނެފައިވެއެވެ.