މަޢާފު ދިނުމާއި އަދަބު ލުއިކޮށް ދިނުމުގެ ޤާނޫނުން ރައީސުލްޖުމްހޫރިއްޔާ އަށް ލިބިވަޑައިގަންނަވާ އިޚްތިޔާރުގެ ދަށުން، އެކިއެކި ކުށްކުށުގެ އަދަބުގައި ޙުކުމް ތަންފީޒު ކުރަމުން ދިޔަ 24 މީހެއްގެ އަދަބު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ލުއިކޮށް ދެއްވައިފި އެވެ.
މިގޮތުން، އެކިއެކި ކުށްކުށުގައި ޙުކުމް ތަންފީޒު ކުރަން ޖަލުގައި ބަންދުކޮށްފައި ތިބި މީހުންނާއި، އަރުވާލާފައިވާ މީހުންނާއި އަދި ގޭގައި ބަންދުކޮށްފައި ތިބި މީހުންގެ ތެރެއިން، މީހާގެ ޢުމުރަށް ބަލައި، ނުވަތަ ބައްޔަކަށް ބަލައި، ނުވަތަ އެ މީހަކު ހޯދަމުންދާ ޞިއްޙީ ފަރުވާއަކަށް ބަލައި، ނުވަތަ އެމީހަކު ހުރި ވަގުތާއި ޙާލަތަށް ބަލައި، ނުވަތަ އިންސާނިއްޔަތު ކަމުގެ ނަޒަރަށް ބަލައި އަދި އެމީހެއްގެ އުޅުމާއި އަޚްލާގަށް ބަލައި، މީހުންގެ ކުށުގެ އަދަބު ލުއިކޮށްދެއްވާފައި ވަނީ ޝަރުޠުތަކަކާ އެކު އެވެ.
މަޢާފު ދިނުމާއި އަދަބު ލުއިކޮށް ދިނުމުގެ ޤާނޫނުގެ 29 ވަނަ މާއްދާގައި ބަޔާންކޮށްފައިވާ އިތުރު މިންގަނޑުތަކަށް ފެތޭ މީހުންގެ ރެކޯޑުތައް ދިރާސާ ކުރުމަށް ފަހު އޭޕްރީލް 1، 2014 ގައި އިތުރު ބަޔަކަށް މަޢާފު ދެއްވުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.