އައްޑޫގެ ހަތަރު ރަށެއްގެ ބިން ހިއްކަން ހަމަޖެހިފައިވާ ކަމަށް ދާދި ފަހުން ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވި ނަމަވެސް، ބިން ހިއްކާނެ ފައިސާ ނެތް ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަބްދުﷲ ޒިޔާދު ވިދާޅުއްޖެ އެވެ.
އޭނާ މިގޮތަށް ވިދާޅުވީ މިކަމާ ބެހޭ ގޮތުން މައުލޫމާތު ސާފުކޮށް ދިނުމަށް އެދި އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާ މެމްބަރު ހަސަން ޝާހިދު މި މަހުގެ 16 ވަނަ ދުވަހު މިނިސްޓްރީ އަށް ފޮނުއްވި ސިޓީއެއްގެ ޖަވާބުގަ އެވެ.
ޒިޔާދު ސޮއި ކުރައްވައި ޝާހިދަށް މި މަހުގެ 21 ވަނަ ދުވަހު ފޮނުއްވި ސިޓީގައި ވިދާޅުވެފައި ވަނީ "މިނިސްޓްރީގެ ފަރާތުން 2014 އަށް ތައްޔާރު ކުރި ބަޖެޓްގައި އައްޑޫގެ ހަތަރު ރަށެއްގެ ބިން ހިއްކުން ހިމަނާފައިވީ ނަމަވެސް، ރައްޔިތުންގެ މަޖިލީހުން 2014 ގެ ބަޖެޓް ފާސްވެގެން ލިބުނު އިރު، މި މަޝްރޫއަށް ބަޖެޓްކޮށްފައިވާ ފައިސާ ވަނީ އުނި ކުރައްވާފައި" ކަމަށެވެ.
"މި މަޝްރޫއަށް ބޭނުންވާ ފައިސާ ބަޖެޓަށް ލިބިއްޖެ ނަމަ މި އަހަރުގެ ތެރޭގައި މަސައްކަތް ކުރިއަށް ގެންދެވޭނެ ވާހަކަ ދެންނެވީމެވެ،" ޒިޔާދުގެ ސިޓީގައިވެ އެވެ.
އައްޑޫގެ ހަތަރު ރަށެއްގެ ބިން މި އަހަރުތެރޭ ހިއްކަން ފެށޭނެ ކަމަށް ޑރ. މުއިއްޒު ވިދާޅުވީ މި މަހުގެ 14 ވަނަ ދުވަހު އެވެ.
އެހެން ނަމަވެސް މިނިސްޓްރީން މިހާރު ދީފައިވާ ޖަވާބުން ބިން ހިއްކުމުގެ މަޝްރޫއާ ދޭތެރޭ މި ވަނީ ސުވާލް އުފެދިފަ އެވެ.