މިސްރު މީހުން ހަންގަނޑު ރީތިކޮށް ބެހެއްޓުމަށް ތަފާތު ތެޔޮ ބޭނުން ކުރަމުން އަންނަ އިރު އެމީހުންގެ އެންމެ މަގުބޫލު އެއްޗަކަށް ވެފައި ވަނީ ބަދަން ތެލެވެ. ފެންވެރުމުގެ ކުރިން އެމީހުން ގައިގައި ބަދަން ތެޔޮ ލާ ކަމަށްވެ އެވެ.
ބަދަން ތެލަކީ ހަގީގަތުގައި ހަންގަނޑަށް ވަރަށް ރަނގަޅު އަދި އޭގައި ގިނަ ފައިދާތަކެއް އެކުލެވޭ އެއްޗެވެ. އޭގައި ގިނަ އަދަދަކަށް ވިޓަމިން އީ އާއި ވިޓަމިން ޑީ ހުރެ އެވެ. އަދި ކެލްސިއަމް މެގްނީޒިއަމް ފަދަ މުހިއްމު ބައެއް މިނަރަލްސްތައް ވެސް އޭގައި ހިމެނެ އެވެ. އެއިން މުހިއްމު ބައެއް ފަރުވާތައް ލިބެ އެވެ.
އެގޮތުން ބަދަން ތެލުން ބޯ މަސާޖު ކުރުމުން އިސްތަށިގަނޑު ދިގުވެ ވަރުގަދަ ވުމަށް އެހީތެރި ވެދެ އެވެ. އަދި އިސްތަށި ފޭބުމުން ދުރުކޮށްދިނުމުގެ އިތުރުން އިސްތަށިގަނޑު އޮމާންވާ ކަމަށްވެ އެވެ.
ބަދަން ތެޔޮ ބޭނުން ކުރުމުން ހަންގަނޑަށް ލިބޭ ބައެއް ފައިދާތަކަށް ބަލައިލާއިރު، އެ ތެލުން މަސާޖު ކުރުމުން ލަކުނުތައް ފިލަ އެވެ. އަދި ހަންގަނޑު ކުރަކިވުމުން ސަލާމަތްކޮށް ދިނުމުގެ އިތުރުން ހަންގަނޑު މަޑުވެ އޮމާންވެ އެވެ. ޖުމްލަކޮށް ބަލާއިރު ހަންގަނޑުގައި ރޫޖެހުން ލަސްކޮށްދީ ޒުވާންކަން ދަމަހައްޓައިދޭ ކަމަށްވެ އެވެ.
ގިނަ ފައިދާތަކެއް ބަދަން ތެލުގައި ހިމެނިފައިވުމުން ތަފާތު ލޯޝަނާއި ޝޭމްޕޫ ފަދަ އުފެދުންތަކުގައި ވެސް އެ ބޭނުން ކުރެ އެވެ. ގުދުރަތީ ބައެއް މާއްދާތައް އުފެއްދުމުގައި ބަދަން ވެސް ބޭނުން ކުރެ އެވެ.
ބަދަން ތެޔޮ ބޭނުންކޮށްގެން މޫނު ސާފު ކުރުމަށް އުފެއްދުމެއް ތައްޔާރު ކުރެވިދާނެ އެވެ. އެގޮތުން ބަދަން ތެލާއި ފިނިފެން (ރޯސް ވޯޓާ) އެއްކުރާށެވެ. އެއިން މޫނު ދޮވުމުން މޫނު ސާފުވެ އޮމާން ވާނެ އެވެ.