އައްޑޫގައި ހުޅުވަން ނިންމާފައިވާ މޯލްޑިވްސް އިސްލާމިކް ބޭންކް (އެމްއައިބީ) ގެ އިމާރާތުގެ މަސައްކަތް މަސް ދުވަހުގެ ތެރޭގައި ނިންމަން ސ. ހިތަދޫ ދާގަނޑު ކޮންސްޓަރަކްޝަނާ ހަވާލުކޮށްފި އެވެ.
ކޮންޓްރެެކްޓް އުސޫލުން ދާގަނޑާ ހަވާލުކޮށްފައި ވަނީ އެމްއައިބީ އައްޑޫ ބްރާންޗް ހިންގަން އައްޑޫ ސިޓީ ކައުންސިލުން އެ ބޭންކަށް ދިން ހިތަދޫގައި ކުރިން އެސްޓީއޯ ސްޕަމާކެޓް ހިންގި އިމާރާތުގެ މަސައްކަތްތައް ނިންމުމަށެވެ. އެ މަސައްކަތް ދާގަނޑުން މިހާރު ވަނީ ފަށައިފަ އެވެ.
އެ އިމާރާތަކީ ހިތަދޫ ބޮޑު މަގުގައި ހުންނަ އިމާރާތެކެވެ. އެ އިމާރާތް އެމްއައިބީ އަށް ކައުންސިލުން ކުއްޔަށް ދޫކޮށްފައި ވަނީ 10 އަހަރުގެ މުއްދަތަށެވެ. ކުއްޔަކީ މަހަކު 10،000ރ. އެވެ.
އިމާރާތުގެ އެއްބަސްވުމުގައި އެމްއައިބީ އާއި އައްޑޫ ސިޓީ ކައުންސިލާ ދެމެދު ސޮއިކޮށްފައި ވަނީ މިދިޔަ އަހަރުގެ އޮކްޓޯބަރު މަހުގެ ކުރީކޮޅު އެވެ.
އެމްއައިބީ އައްޑޫ ބްރާންޗް ޖެނުއަރީ މަސް ނިމުމުގެ ކުރިން ހުޅުވާނެ ކަމަށް އެ ބޭންކުން ކުރި ބުނި ނަމަވެސް، އެކިއެކި ސަބަބުތަކާ ހެދި މަސައްކަތް ނުފެށި ވަނީ ލަސްވެގެން ގޮސްފަ އެވެ.
އެހެން ނަމަވެސް އެމްއައިބީން މިހާރު ބުނާ ގޮތުން އަންނަ މާޗް މަހުގެ ތެރޭގައި އެމްއައިބީ އައްޑޫ ބްރާންޗް ހުޅުވައި ހިދުމަތް ދޭން ފެށޭނެ އެވެ.