ރައީސް މައުމޫނަށް ވެރިކަން ލިބިވަޑައިގަތުން
މިއީ ނޮވެމްބަރު 11، 1978 ވަނަ ދުވަހެވެ. އަލްއުސްތާޒު މައުމޫން އަބްދުލް ގައްޔޫމަށް ދިވެހި ރާއްޖޭގެ ރައީސްކަން ލިބިވަޑަައިގެންމެވި ދުވަހެވެ. އެ ދުވަސްވެގެން ދިޔައީ އައްޑު އަތޮޅަށް އެއް ފަހަރާ ދެ އީދު އައުމުގެ އުފާ ފާޅު ކުރެވުނު ދުވަހެވެ.
ޖުމްހޫރީ ދުވަހާއި އަޟްހާ އީދުގެ އުފަލެވެ. ދިގު 20 އަހަރަށް ފަހު ރާއްޖޭގެ ޒައާމަތާ ހަވާލުވެ ވަޑައިގެންނެވި އައު ރައީސަށް މަރުހަބާ ދެންނެވުމަށް މިފަދަ އީދެއް މެދުވެރިކަން އެއީ ރަނގަޅު އިއްތިފާގެކެވެ.
މި މުނާސަބަތާ ގުޅިގެން ޖުމްހުރީ ދުވަހާއި އަޟްހާ އީދުގެ އުފާ ފާޅު ކުރުމުގެ ފުރަތަމަ ނަމްބަރަކަށް އޮތީ ނޮވެމްބަރު 10 ވަނަ ދުވަހުގެ ރޭ ހިތަދޫ އަތޮޅު އޮފީހުގަ އެވެ.
ކުރިއަށް އޮތް ފަސް އަހަރަށް ދިވެހި ރާއްޖޭގެ ރައީސުލްޖުމްހުރިއްޔާގެ މަގާމަށް އަލްއުސްތާޒު މައުމޫން އަބްދުލް ގައްޔޫމް ހުވާ ކުރެއްވުމުގެ ރަސްމިއްޔާތު އަޑު އެހުމެވެ. ރޭޑިއޯ މޯލްޑިވްސް އިން ވަގުތުން ގެނެސްދޭ މި ހާއްސަ ޕްރޮގްރާމްގެ އަޑު އެއްސެވުމަށް އަތޮޅު އޮފީހަށް ވަޑައިގެންނެވި ހުރިހާ ރަށްރަށުގެ ވެރިންނާއި އަތޮޅުގެ ވަރަށް ގިނަ އިއްޒަތްތެރި ބޭފުޅުންނަށް ދައުވަތު އެރުވިފައިވެ އެވެ.
ނޮވެމްބަރު 11 ވަނަ ދުވަހަކީ ހަމައެކަނި ޖުމްހޫރީ ދުވަހެއް ނޫނެވެ. އެކަނި އަޟްހާ އީދު ދުވަހެއް ވެސް ނޫނެވެ. އައްޑޫ ރައްޔިތުން އެ ދުވަސް ފާހަގަ ކުރީ އެއަށް ވުރެ ވެސް ހާއްސަ ގޮތެއްގަ އެވެ. އިބްރާހީމް ނާސިރު ވެރިކަން ކުރައްވާތާ 20 އަހަރުވުމަށް ފަހު އަމިއްލަފުޅަށް ވެރިކަން ދޫކޮށްލެއްވުމަށް އިރާދަކުރެއްވުމުން ކަމުގައި ވިޔަސް އަލުން މި މަގާމާ މަތި ކުރެއްވުނު ޒުވާން ޒައީމުގެ ވެރިކަމުގެ ތާރީހީ ފުރަތަމަ ދުވަހެވެ.
އައްޑު އަތޮޅުގެ ރަށްރަށުގެ ތެރެއިން މި މުނާސަބަތަށް އެންމެ ބޮޑަށް ތައްޔާރުވެފައި ވަނީ ހިތަދު އާއި ފޭދޫންނެވެ. ފޭދޫގެ މަގުތަކަށް މީހުން ނިކުމެ، އުފާ ފާޅު ކުރަމުން ދިޔަ އެވެ. ރަށުގެ މައި ދެ މަގު ހުރަސްވާ ގޯޅީގައި ރައީސް މައުމޫނާއި ނާސިރުގެ ފޮޓޯފުޅު ބެހެއްޓިފައިވެ އެވެ. މަރުހަބާ އާއި ހެޔޮ އެދުމުގެ ޝުއޫރުތަކުން ފަލާލެވިފައިވާ ބެނާތަކާއި ދިދަފަތިތައް މި ހިސާބުގެ މަގުތަކުގައި ދަމާފައިވެ އެވެ. އިރު އޮއްސުނީއްސުރެ މި ހިސާބަށް މީހުން ގިނަވަމުން ދިޔަ އެވެ.
މުޅި ހިސާބު އޮތީ ނިވި ދިއްލޭ ކުލަބޮކިތަކުން ޒީނަތްތެރިކޮށްފަ އެވެ. މިއީ އައު ރައީސަށް މަރުހަބާ ދެންނެވުމުގެ މައިދާނެވެ. ރައީސް މައުމޫން ހުވާ ކުރެއްވުމާ އެކު މި މައިދާނަށް އެއްވެ ތިބި މީހުން އުފާ ފާޅު ކުރުން އިތުރުވެގެން ދިޔަ އެވެ.
ރައީސް މައުމޫންގެ ޒައާމަތަށް ހެޔޮ އެދިގެންނެވެ. ދިގު އުމުރަކަށް ވެސް އެދިގެންނެވެ. އެ މަނިކުފާނުގެ ޒައާމަތުގައި ރައްޔިތުންނަށް ލިބިގެން ދާނޭ ހެވާއި ލާބައަށްޓަކަަ އެވެ. ގަމުން އިނގިރޭސީން ފޭބުމުން އައްޑު އަތޮޅު ރައްޔިތުންނަށް ޖެހިފައިވާ ހާލުން މިންޖުކޮށް ދެއްވާނެކަމުގެ އުންމީދުގަ އެވެ.
މި އީދުގެ ރަސްމިއްޔާތު އަތޮޅު ފެންވަރުގައި ބޭއްވުނީ ހިތަދޫގަ އެވެ. ނޮވެމްބަރު 11 ވަނަ ދުވަހު ހެނދުނު ހުރިހާ ރަށެއްގެ ކުޅިވަރު ޓީމްތަކާއި އޮފިޝަލުންނާއި ވެރިން އަދި ކުޅިވަރު ބަލާ މީހުން ހިތަދު އަށް ދަތުރު ކުރި އެވެ. ކުޅިވަރު އޮންނަ ހިތަދޫ ބޯޅަދަނޑު ސަރަހައްދުގައި ބެނާތަކާއި ދިދަފަތިތައް ދަމައި ޒީނަތްތެރިިކޮށްފައިވެ އެވެ.
ފޭދޫގެ ޓީމް ހިތަދު އަށް ދިޔަ ލޭންޑްރޯވާއެއްގައި މައުމޫންގެ ބޮޑު ފޮޓޯފުޅެއް ބަހައްޓައި ގައުމީ ދިދަ ނަގައި ޒީނަތްތެރިކޮށްފައިވެ އެވެ. ޓީމް ހިތަދު އަށް ދިޔައީ ރައީސް މައުމޫނަށް މަރުހަބާގެ ލަވަތައް ކިޔައި އަޑު އުފުލަމުންނެވެ.
ނޮވެމްބަރު 13 ވަނަ ދުވަހާ ހަމައަށް ދެމިގެން ދިޔަ މި ގައުމީ އީދު ނިމިގެން ދިޔަ އިރު އެންމެ ފާހަގަކޮށްލެވެނީ ހުރިހާ ރަށެއްގެ މެދުގައި ބޭއްވުނު ދޯނި ރޭހެވެ. ނުވަތަ ފަލި މުބާރާތެވެ. މި މުބާރާތުން އެއް ވަނަ ހޯދީ މަރަދު އެވެ. މިއީ އައްޑު އަތޮޅުގައި އެންމެ ފަހުން ބޭއްވުނު ފަލި މުބާރާތެވެ.
ކުޅިވަރުގެ އީދު ނިންމުމުގެ ރަސްމިއްޔާތު އޮތީ 13 ވަނަ ދުވަހުގެރޭ 8:00 ޖެހި އިރު އެވެ. އެކިއެކި ކުޅިވަރުތަކުން ވަނަތައް ހޯދި ފަރާތްތަކަށް އިނާމް ދެއްވީ ސަދަން ރީޖަނަލް އޮފީހުގެ ވަކީލް އަލްފާޟިލް މަންދު އަބްދުﷲ ވަހީދެވެ. ޝަރަފުވެރި މެހުމާނަކީ ވަގުތީ އަތޮޅުވެރިޔާ އަލްފާޟިލް އަބްދުއްރައޫފެވެ.
މިއީ 1959 ވަނަ އަހަރު އައްޑު އަތޮޅުގައި ގެނެވުނު ސުވާދީބްގެ ދެކޮޅުވެރިކަމުގައި މަރަދޫ ރަތްވިލާގެ ރޯކޮށްލައި އަތޮޅުވެރިކަން ހިތަދު އަށް ބަދަލުކޮށްލެވުނު ފަހުން އަތޮޅުވެރިކަން ވަގުތީ ގޮތުން ނަމަވެސް މާލޭގެ ނުވަތަ އަތޮޅުން ބޭރުގެ ބޭފުޅަކަށް ދެއްވި ފުރަތަމަ ފަރާތެވެ. މިއީ މައުމޫންގެ ސަރުކާރުން އައްޑު އަތޮޅުގެ ވެރިކަމަށް ގެންނެވި ފުރަތަމަ ބަދަލެވެ. (ނުނިމޭ)
——————————————————————————-
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ކޮންމެ ހަފުތާއެއްގެ ހޮނިހިރު ދުވަހު ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސްކުރަމެވެ.
——————————————————————————-