އަހަރެން އުފަންވީ ކްރިސްޓިއަން ދީނުގެ ޢާއިލާއަކަށެވެ. އަހަރެންގެ ޢާއިލާއަކީ ދީނީ ޢާއިލާއަކަށް ވެފައި ފާދިރީން ވެސް ގޭގައި އުޅެއެވެ.
އެ ދުވަސްވަރަކީ އެމެރިކާގެ މީހުން މިހާރަށް ވުރެ ދީންވެރިކޮށް އުޅެމުން ގޮސްފައިވާ ދުވަސްވަރެއްކަމުން ގިނަ ޢާއިލާތައް އާދީއްތަ ދުވަހު ފައްޅިއަށް ގޮސް އުޅެ އެވެ. އަހަރެން ހަނދާންވާ ގޮތުން ނަމަ އަހަރެން ވެސް އޭރު އުޅެމުން ގޮސްފައި ވަނީ ވަރަށް ދީންވެރިކޮށެވެ.
އަހަރެންގެ އުފަން ދުވަހެއްގައި ބޮޑުދައިތަ އަހަރެންނަށް ބައިބަލްއެއް ދިނެވެ. ދައްތަ ދިނީ ބުދެކެވެ. އަދި ފަހުން އަހަރެންގެ އެދުމުގެ މަތިން މަންމަ އަހަރެންނަށް އަޅުކަން ކުރާ ގޮތް ދަސް ކުރާ ފޮތެއް ދިނެވެ.
އަހަރެން މިޑްލް ސްކޫލްގައި އުޅުން ދުވަސްވަރު ދެއަހަރު ދުވަސް ވަންދެން ބައިބަލް ކިޔެވީމެވެ. އޭގެ ކުރިން ވެސް ބައިބަލްގެ ބައެއް ބައިތައް ކިޔައި އުޅުނީމެވެ. ނަމަވެސް މާރަނގަޅަކަށް އޭގައިވާ އެއްޗެއް ދޭހައެއް ނުވެ އެވެ. ނަސީބު ދެރަކަމުން އޭރު އަހަރެން ކިޔަވަމުން ދިޔައީ އޮޅުންބޮޅުންތަކުން ފުރިފައިވާ ބައިބަލްގެ އޯލްޑް އަދި ނިއުޓެސްޓެމެންޓް އެވެ.
މިސާލަކަށް ބައިބަލްގައި "އޮރިޖިނަލް ސިން" އާއި ބެހޭގޮތުން ވެއެވެ. ކޮންމެ އިންސާނަކު ވެސް ދުނިޔެ އަށް އުފަން ވަނީ ފާފައިން ފުރިގެންވާ ޙާލުގަ އެވެ. އޭރު އަހަރެންގެ ކުޑަ ފިރިހެން ކޮއްކޮއެއް ހުރެ އެވެ. އަހަރެންނަށް ޤަބޫލު ކުރެވުނު ގޮތުގައި ކުޑަކުދިންނަކީ ކުށުން ފުރިފައިވާ ބައެއް ނޫނެވެ.
މީގެ އިތުރުން ރަސޫލު ބޭކަލުންގެ ތެރެއިން އިބްރާހީމްގެފާނާއި ދާއޫދުގެފާނާއި ބެހޭ ގޮތުން ވެސް ޤަބޫލު ކުރަން ދަތި ވާހަކަތަކެއް އޭގައިވާތީ އަހަރެންނަށް ފެނުނެވެ.
ރަސޫލު ބޭކަލުން އެ ފޮތުގައިވާ ފަދަ ގޮތަކަށް ޢަމަލުފުޅުތައް ބަހައްޓަ ވާނެ ކަމަކަށް އަހަރެންގެ ޒަމީރު ޤަބޫލެއް ނުކުރި އެވެ. މީގެ އިތުރުން ވެސް އަހަރެންނަށް ޤަބޫލު ކުރަން ދަތި އެތައް ކަމެއް ބައިބަލްއިން އަހަރެން ކީމެވެ. އެހެން ނަމަވެސް އޭރު އަހަރެން އެއްވެސް ސުވާލެއް ނުކުރަމެވެ. އަހަރެން ބޭނުންވީ ބަސްއަހާ "ރަނގަޅު އަންހެން ކުއްޖަކަށް" ވާށެވެ.
މިހެން އުޅެމުން ދަނިކޮށް ކްލާހުގައި އުޅޭ ފިރިހެން ކުއްޖެއް "ޓްރިނިޓީ" (ކްރިސްޓިއަން ދީނުގައި ކަލާންގެ ފުރިހަމަވާ ތިންބައި) އާ ބެހޭ ގޮތުން ސުވާލުތައް ކުރަން ފެށި އެވެ. އޭނާ ވަރަށް ގިނަ ސުވާލުތައް މިކަމާއި ބެހޭ ގޮތުން ކުރި އެވެ. ނަމަވެސް އޭނާ ވެސް އަދި އަހަރެން ވެސް ހިތްހަމަޖެހޭ ފަދަ ޖަވާބެއް ޓީޗަރުގެ ފަރާތަކުން ނުލިބުނެވެ. އެންމެ ފަހުން އަހަރެންގެ ޓީޗަރު ކަމުގައިވާ ޔުނިވަސިޓީ އޮފް މިޗިގަންގެ ތިއޮލޮޖީ ޓީޗަރު ބުނީ އީމާންތެރި ކަމަށް އެދި ދުޢާ ކުރުމަށެވެ. އެހެންވެ އަހަރެން ވެސް ދުޢާ ކުރީ އެވެ.
ކޮލެޖްގައި އަހަރެން ހޭދަ ކުރި ދުވަސްވަރު ވިސްނުމާއި އަޅުކަން ކުރުމުގައި ކުރިއަށް ދިއައީމެވެ. ދަރިވަރުން ދީނާ ބެހޭ ތަފާތު ސުވާލުތައް ކޮށް އުޅެ އެވެ. އަދި އަހަރެންނަށް ވަރަށް ގިނަ ޖަވާބުތައް ވެސް އަޑު އިވިފައިވެ އެވެ.
އެހެންކަމުން ޔޫސުފް އިސްލާމް ފަދައިން އަހަރެން ވެސް އިރުމަތީ ޤައުމުތަކުގެ ދީންތައް ކިޔެވީމެވެ.
މިގޮތުން ބުޑިޒަމް، ކޮންފޫޝިއޭނިޒަމް (ޗައިނާގެ ފިލޯސަފަރެއްގެ ވިސްނުމަށް ބިނާވެފައިވާ ފިލޯސަފީ ދީނެއް) އަދި ހިންދުއިޒަމް ހިމެނެ އެވެ.
އެއް ފަހަރަކު އަހަރެންނާއި ލީބިޔާގެ މުސްލިމަކާއި ދިމާވި އެވެ. އޭނާގެ ފަރާތުން އަހަރެންނަށް ކޮންމެ ވެސް ވަރަކަށް އިސްލާމް ދީނާއި ކީރިތި ޤުރުއާނާ ބެހޭ މަޢުލޫމާތު ލިބުނެވެ. އޭނާ ބުނި ގޮތުގައި އިސްލާމް ދީނަކީ ބާވައިލެއްވި ދީންތަކުގެ ތެރެއިން އެންމެ ޒަމާނީ ނުވަތަ "އަޕްޑޭޓް" ދީނެވެ.
އަހަރެންނަށް ވިސްނިފައި އޮތް ގޮތުގައި އެފްރިކާ އާއި މެދުއިރުމައްޗަކީ ވަރަށް ތަހުޒީބީ ގޮތުން ދަށް ބަޔަކެވެ. އެހެންކަމުން އިސްލާމް ދީން ތަހުޒީބު ދީނެއްގެ ގޮތުގައި ބަލައިގަތުމުގެ ވިސްނުމެއް އޭނާއާ ދިމާވުމާއި ހަމައަށް ގެންގުޅެވިފައެއް ނެތެވެ.
އެއް ފަހަރަކު އަހަރެންގެ ޢާއިލާ އިން ލީބިޔާގެ މި މީހާ އަށް ފައްޅީގައި އޮތް ދީނީ ޙަފްލާއަކަށް ދަޢުވަތު ދިނެވެ. އެ ޙަފްލާގައި އޭނާއަށް ފެނުނު ކަންތައްތަކާއި ބެހޭ ގޮތުން އަހަރެންނާ ސުވާލު ކުރިއެވެ.
"މިހުރިހާ ކަންކަމެއް އުފެއްދީ ކާކު ހެއްޔެވެ؟ ކޮޅަށް ހުރުމާއި ސަޖިދަ ޖެހުމާއި އަޅުކަން ކުރަންވީގޮތް ކަލޭމެންނަށް ބުނެ ދިނީ ކާކު ހެއްޔެވެ؟" މި ސުވާލުތައް އޭނާ ކުރުމުން އަހަރެން ފައްޅީގެ ކުރީގެ ހަނދާންތައް އޭނާ އަށް ކިޔައި ދިނީމެވެ.
އެގޮތަށް ސުވާލު ކުރުމުން ފުރަތަމަ އަހަރެން ރުޅި ވެސް އައެވެ. އެހެނަސް ފަހުން އެކަމާ ވިސްނުނެވެ. އަހަރެން އަޅުކަންކޮށް ފައްޅި އަށް އައިސް އުޅުނު ކަމުގައި ވިޔަސް ދީނުގެ ވަރަށްގިނަ ކަންކަން އަހަރެންގެ ބުއްދިއަށް ޤަބޫލު ނުކުރެވޭކަން އަހަރެންނަށް ވިސްނައިލެވުނެވެ.
އަދި އަހަރެންނަށް ފަހުން އަޑު އަހަން އުނދަގޫ ޚަބަރެއް ވެސް ލިބުނެވެ. އަހަރެންނާ ވަރަށް ގާތް އަންހެނެއް ކައިވެނީގައި މައްސަލަ ޖެހޭތީ އެކަމުގެ ލަފާއެއް ހޯދުމަށް ފައްޅިއަށް އައުމުން ފާދިރީއެއް އޭނާ އަށް ޖިންސީ ގޯނާ ކުރަން މަސައްކަތް ކުރި ވާހަކަ އެވެ.
އެ ދުވަހުން ފެށިގެން ކްރިސްޓިއަން ދީނާ މެދު އަހަރެން ދެކެމުން އައި ގޮތް މުޅީން ބަދަލުވި އެވެ. އަދި ކަލާންގެއާ ގުޅުވައި ދިނުމަށް ހަމަ އަހަރެމެންކަހަލަ އިންސާނުން (ފާދިރީން) ތިބުމަކީ އަހަރެންނަށް ޤަބޫލު ކުރެވޭ ކަމަކަށް ނުވި އެވެ. ސީދާ އަހަރެންނަށް އެއްވެސް މެދުވެރިއެ އްނެތި ކަލާންގެ އާ މުޢާމަލާތު ނުކުރެވެންވީ ކީއްވެކަމާ މެދު ސުވާލު އުފެދުނެވެ.
އެ ދުވަހަށް ފަހު އަހަރެން ކީރިތި ޤުރުއާން ހަޠިމެއް ގަތީމެވެ. އަދި އަށް އަހަރު ވަންދެން އެ ފޮތް ކިޔައި އުޅުނީމެވެ. މި ދުވަސްތަކުގެ ތެރޭގައި އެހެނިހެން ދީންތައް ވެސް އުނގެނި އުޅުނީމެވެ. އަދި އަހަރެންގެ ފާފަތަކާ މެދު ވިސްނަން ފެށުނެވެ. ކްރިސްޓިއަން ދީނުގައި ފާފަފުއްސެވުން އޮންނަ ގޮތް އަހަރެންނަށް ޤަބޫލެއް ނުކުރެވެ އެވެ.
ޤުރުއާން ކިޔަން ފެށުމުން އަހަރެންގެ ސުވާލުތަކުގެ ޖަވާބު ލިބެން ފެށި އެވެ. އަހަރެންގެ ފާފަތައް ފުހެވޭނެ މަގު ވެސް އެ ފޮތުން ފެނިގެން ދާނެކަމުގައި ވިސްނެން ފެށުނެވެ.
ދެން އަހަރެން މުސްލިމުން ނަމާދު ކުރާ ގޮތް ހޯދަން ފެށީމެވެ. ޓީވީންނާއި އެއްޗެހިން އަހަރެން ކޮންމެވެސް ވަރަކަށް ދަސްކޮށްގެން ވަރަށް ގިނަ ދުވަސްވަންދެން ސިއްރިޔާތުގައި އަހަރެން ނަމާދުކޮށް އުޅުނީމެވެ.
އަދި ޤުރުއާން ކިޔަންފެށިތާ ގާތްގަނޑަކަށް އަށް އަހަރުވީތަނާ އަހަރެން މާއިދާ ސޫރަތުގެ ތިން ވަނަ އާޔަތުގައި އަޅައިގަތެވެ. އެއާޔަތުގެ މާނާގައިވެ އެވެ.
"…..މިއަދު ތިޔަ ބައިމީހުންގެ ދީން ތިޔަބައިމީހުންނަށްޓަކައި ތިމަން ރަސްކަލާނގެ ފުރިހަމަކޮށް ދެއްވައިފީމެވެ. އަދި، ތިމަންރަސްކަލާނގެ ނިޢުމަތް ތިޔަބައިމީހުންގެ މައްޗަށް ތިމަންރަސްކަލާނގެ ފުރިހަމަކޮށްދެއްވައިފީމެވެ. އަދި އިސްލާމްދީން ތިޔަބައި މީހުންނަށް ދީނެއްކަމުގައި ތިމަންރަސްކަލާނގެ ރުހިވޮޑިގެންފީމެވެ…."
މި ދުވަހުން ފެށިގެން އަހަރެން ރަނގަޅަށް ނަމާދު ކުރަން ދަސް ކުރަން ޢަޒުމް ކަނޑައެޅީމެވެ. އަދި އިތުރަށް އެނގެން ޖެހޭ ވަރަށްގިނަ ކަންކަން އެބަހުރިކަން ވިސްނުނެވެ. އެހެނަސް ދެރައީ އަހަރެން ދަންނަ މުސްލިމެއް ވެސް ނޫޅޭތީ އެވެ.
ކުރިއާ ޚިލާފަށް އެމެރިކާގައި މިހާރު އިސްލާމް ދީނާއި މުސްލިމުންގެ ފާޅުކަން ބޮޑެވެ. އަހަރެން ޑައިރެކްޓްރީއަކުން އިސްލާމިކް ސޮސައިޓީގެ ފޯން ނަމްބަރ ނެގުމަށް ފަހު ގުޅައިލީމެވެ.
އެކަމަކު، މީހަކު ފޯނު ނެގުމަށް ފަހު ހަލޯއޭ ބުނުމުން ބުނާނެ އެއްޗެއް ނޭނގި އަހަރެން ފޯނު ބޭއްވީ އެވެ. މިގޮތަށް އެތައް ފަހަރަކު މިސްކިތުގެ ފޯނަށް އަހަރެން ގުޅާ ވާހަކަ ދައްކަން ޖެހިލުންވެގެން ބޭއްވީމެވެ. އަހަރެންނާ މެދު މުސްލިމުން ދެކޭނޭ ގޮތް ނޭނގޭތީ އެވެ.
އެންމެ ފަހުން އަހަރެން ސިޓީއެއް ފޮނުވީމެވެ. އޭގެ ފަހުން، މިސްކިތުން މީހަކު އަހަރެންނަށް ގުޅި އެވެ. އަދި އިސްލާމް ދީނާ ބެހޭ މަޢުލޫމާތުތައް އެކުލެވޭ ތަފާތު ލިޔުންތައް އަހަރެންނަށް ފޮނުވަމުން ގެންދިއަ އެވެ.
އަހަރެން މުސްލިމަކަށް ވާން ބޭނުން ވާހަކަ ބުނުމުން އޭނާ ބުންޏެވެ.
"ކަލޭ އެކަމަށް ޔަޤީންވަންދެން މަޑުކޮށްލާށެވެ." މި ޖަވާބުން އަހަރެން މާޔޫސް ވިޔަސް އެ ބުނީ ރަނގަޅު ވާހަކައެކެވެ.
އިސްލާމްވުމަށް ފަހު ދެން ކުރީން އަހަރެން ކޮށްއުޅުނު ކަންކަމަށް އަނބުރާ ދިއުމަކީ ވާނެ ކަމެއް ނޫނެވެ.
އަހަރެންގެ ވަރަށް ގިނަ ވަގުތު އިސްލާމް ދީނާ މެދު ވިސްނަމުން ދިޔައީމެވެ. ބައެއް ފަހަރު މިސްކިތަށް ޒިޔާރަތްކޮށް މުސްލިމަކާއި ބައްދަލުވުމުގެ އުންމީދުގައި އެތާނގެ ވަށައިގެން ހިނގާ ހަދަމެވެ.
އަދި އެތާނގެ އެތެރެ ހުންނާނީ ކިހިނެއްކަމާ މެދު ވިސްނާ ހަދަމެވެ. އެންމެ ފަހުން 1986 ގެ ނޮވެމްބަރ މަހުގެ ކުރީކޮޅު އަހަރެން ގޭގައި އުޅެނިކޮށް ކުއްލިއަކަށް އަހަރެންނަކީ އިސްލާމެއް ކަމުގައި އިޙްސާސްވި އެވެ.
އެހެންކަމުން އަހަރެން ﷲ އަށް އީމާންވާ ކަމަށާއި، މުޙައްމަދުއަކީ އެކަލާނގެ ރަސޫލާކަމަށް އީމާންވާކަމުގައި ބަޔާންކޮށް މިސްކިތަށް ސިޓީއެއް ލިޔުނީމެވެ.
އަނެއް ދުވަހު މިސްކިތުން ގުޅިމީހާ އަހަރެންނަށް ގުޅިއެވެ. އަދި ފޯނުން އަހަރެން ޝާހާދަތްކިޔާ އިސްލާމްވީމެވެ. އޭނާ އަހަރެންކައިރީ ބުނީ، އެވަގުތުން ފެށިގެން އަހަރެން ކުރިން ކޮށްފައިވާ ހުރިހާ ފާފަތަކެއް ފޮހެވި މިއަދު އުފަންވި މީހެއް ފަދައިން ވީކަމުގަ އެވެ. އެ ވަގުތު އަހަރެންގެ ބުރަކަށިމަތީގައިވާ ފާފައިގެ ބުރަ ފިލައިގެން ދިޔަކަމުގެ އިޙްސާސް އަހަރެންނަށް ކުރެވުނެވެ.
އަދި އުފަލުންގޮސް އަހަރެންނަށް ރޮވުނެވެ.
އަހަރެންނަށް އެރޭ ނިދުނީ ވެސް ވަރަށް ކުޑަކޮށެވެ. ރުއިމާއި ﷲ ގެ ނަންފުޅު ހަނދުމަ ކުރުމުގައި އަހަރެން އޮތީ އެވެ. އަހަރެންނަށް ފާފަ ފުއްސަވައިފި ކަމުގައި އިޙްސާސްވިއެވެ. އަލްޙަމްދުލިއްﷲ.
ނޯޓް: މިއީ އެމެރިކާގެ ކްރިސްޓިއަނެއް ކަމަށްވާ ޙަޔާތު އެނީ ކޮލިންސް އުސްމާން، އިސްލާމްވީ ގޮތުގެ ވާހަކަ އެވެ.