އައްޑޫގައި ހުރި އެންމެ ދުވަސްވީ އެއް ކެފޭ ކަމަށްވާ މަރަދޫ "ގްލޭޑް ކެފޭ" ހިންގާ އިމާރާތް، ފިހާރައެއް ހިންގަން ކުއްޔަަށް ދޫކުރާ ގޮތަށް ނިންމައިފި އެވެ.
މީގެ 20 އަހަރު ކުރިން އެންމެ ފުރަތަމަ "ވެންބޮޅަ ފިށި ހޮޓާ" ގެ ނަމުގައި ހިންގުމަށް ފަހު މިހާރު "ގްލޭޑް ކެފޭ" ގެ ނަމުގައި ހިންގާ ތަނުގެ ވެރިޔާ އިބްރާހީން ފައުޒީ މިއަދު ބުނީ އެހާ ޒަމާންކޮށްފައި "ގްލޭޑް ކެފޭ" ބަންދު ކުރަން ނިންމީ އޭނާ އަށް މި މަސައްކަތް ވަރަށް ދުވަހު ކުރެވިއްޖެ ކަމަށް ގަބޫލް ކުރެވޭތީ އާއި އިތުރަށް ދެން މި މަސައްކަތުގައި އެކަނި އުޅެން ނޭނުން ނުވާތީ ކަމަށެވެ.
"އަޅުގަނޑު އެކަނި 20 އަހަރު ވަންދެން މި މަސައްކަތް ކުރެވިއްޖެތާ. މިހާރު ދެން އުމުރުން ވެސް ވަރަށް ދުވަސް ވެސް ވެއްޖެ. ދެން ބޭނުން ނުވަނީ އެކަނި މާއެކަނި ކެފޭ ހިންގަން. އަޅުގަނޑުގެ އެއްވެސް ކުއްޖަކު ވެސް މިކަމަކަށް ޝައުގުވެރި ކަމެއް ނުދޭ،" މަރަދޫ ބޮޑު މަގުގައި ހުންނަ "ބޮޑުގެ" ކައިރީގައި ހުންނަ ގްލޭޑް ކެފޭ އާ ބެހޭ ގޮތުން ފައުޒީ ބުންޏެވެ.
އޭނާ ބުނީ ކެފޭ ހިންގާ އިމާރާތް މިހާރު ބޭނުން ވަނީ ފިހާރައެއް ހިންގަން ޝައުގުވެރިވާ ބަޔަކަށް ކުއްޔަށް ދޭން ކަމަށެވެ. އެގޮތުން 10 އަހަރުގެ މުއްދަތަށް އެތަން ކުއްޔަށް ދޭން ނިންމާފައި ވަނީ މަހަކު 5،000ރ. އަށް ވުރެ ކުޑަ ނޫން އަގަކަށެވެ.
އަދި ކުއްޔަށް ހިފާ ފަރާތުން ތިން މަހުގެ އެޑްވާންސް ދައްކަން ޖެހޭނެ ކަމަށް ފައުޒީ ބުންްޏެވެ.
ރަނގަޅު ފެންވަރަކަށް ހަދާފައި ހުރި "ގްލޭޑް ކެފޭ" ގައި ގުދަނަކާއި ފާހާނާއެއް ވެސް ހިމެނެ އެވެ. އެހެންވެ އެތަނަކީ ފިހާރައެއް ހިންގަން ވަރަށް ކަމުދާނެ އިމާރާތެއް ކަމަށް ފައުޒީ ބުންޏެވެ. އަދި އެތަން ދޫކުރާނީ ހަމައެކަނި ފިހާރައެއް ހިންގަން ކަމަށް ވެސް ފައުޒީ ބުންޏެވެ.
އެތަން ކުއްޔަށް ހިފަން ބޭނުންވާ ފަރާތްތަކުން އިތުރު މައުލޫމާތު ހޯދަން ބޭނުން ނަމަ ފައުޒީގެ ނަމްބަރު 9748901 އަށް ގުޅުމުން ލިބޭނެ އެވެ.
ފައުޒީ ބުނީ އޭނާގެ ޒަމާންވީ ކެފޭ ހުއްޓާލި ނަމަވެސް، އެތަނާ އިންވެގެން އޮތް ތަނުގައި ކެޓަރިންގެ ހިދުމަތް މެދުކެނޑުމެއް ނެތި ދޭނެ ކަމަށެވެ.
އެގޮތުން ކެޓަރިން އަށް ހާއްސަކޮށްފައިވާ ބައިގެ މަތީގައި ޑެކެއް އަޅައި އެތަނުގައި "ކެފޭއެއް" ހިންގުމުގެ ވިސްނުން ގެންގުޅޭ ކަމަށް ފައުޒީ ބުންޏެވެ. އެ މަސައްކަތް މިހާރު ވެސް ވަނީ ކޮންމެވެސް ވަރަކަށް ފަށައިފަ އެވެ.