މީގެ ދުވަސްކޮޅެއް ކުރިން ރާއްޖޭގެ މަޝްހޫރު އަންހެން ނެށުންތެރިޔާ ސުނީތާ އަލީ (ސުނީ) ޕްރިޔަންކާ ޗޯޕްޅާ (ޕީސީ) އަށް ދިން ނެށުމުގެ ޔޫޓިއުބް ޓްރިބިއުޓަކާ ގުޅިގެން ވަރަށް ގިނަ ބައެއްގެ ފާޑު ކިއުންތައް އޭނާ އަށް އަމާޒުވި އެވެ.
ޕްރިޔަންކާގެ އަމިއްލަ އަޑުން އޭނާ ކިޔާފައިވާ އިނގިރޭސި ލަވަތަކެއް މަސްހުނިކޮށްލައިގެން، އޭނާގެ ފޮޓޯތަަކެއް ސްޓޭޖެއްގެ މަތީގައި އަތުރައިގެން ސުނީ "ޖެއްސި ވައްތަރުތައް" ޔޫޓިއުބަށް އަޕްލޯޑް ކުރުމުން އޭނާއަކީ ރާއްޖޭގެ ނަމަށް ހުތުރު އަރުވަން އުޅޭ ތާކުން ކުރެ ތާކު ނުޖެހޭ ކަންކަން ކުރާ މީހެއް ކަމެއް ކަމަށް ބުނެ، ވަރަށް ގިނަ ބަޔަކު ސުނީ އަށް ފާޑު ކިޔުންތައް އަމާޒުކޮށްފައިވެ އެވެ.
ހާއްސަކޮށް މި ހަބަރު ގެނެސް ދިން އޮންލައިން ސައިޓްތަަކަށް ކިއުންތެރިން ކޮށްފައިވާ ކޮމެންޓްތަކަށް ބަލާ އިރު، ސުނީ އަށް ގިނަ ބަޔަކު ކޮށްފައި ވަނީ މަލާމާތެވެ.
އަދި މިސް ވޯލްޑްގެ ތާޖް ވެސް ހާސިިލް ކުރި ބޮލީވުޑްގެ މިހާރު އެންމެ ކާމިޔާބް އެއް ބަތަލާގެ ގޮތުގައި ހިމެނޭ ޕްރިޔަންކާ އަށް ވާން އުޅޭ ކަމަށް ބުނެ ބައެއް ފަރާތްތަކުން ޖޯކު ޖަހާފައިވެ އެވެ.
އެގޮތުން ޕްރިޔަންކާ އާ ވައްތަރު ވެވޭ ގޮތަށް މޭކަޕްކޮށް، ހެދުން އަޅައި އޭނާގެ އެފްބީ އާއި ޓްވިޓާ އަށް ސުނީ ފޮޓޯތައް އަޕްލޯޑް ކުރާކަން ވެސް ފާހަގަ ކުރެވިފައިވެ އެވެ.
އެހެން ނަމަވެސް ޔޫޓިއުބް މެދުވެރިކޮށް ސުނީ ޕީސީ އަށް ދިން ޓްރިބިއުޓަށް ޓްވިޓާ މެދުވެރިކޮށް ޕީސީ ކޮމެންޓް ކުރުމުން ގިނަ ބަޔަކަށް ހައިރާކަން ވެސް ލިބުނެވެ. އެ ވީޑިއޯ އާ ގުޅިގެން ޕީސީ ބުނެފައި ވަނީ "އައި އެމް ސޯ ޓަޗްޑް" ކަމަށެވެ.
މިފަދަ ގޮތަކަަށް ޕީސީގެ ރިއެކްޝަން އައުމާ އެކު ސުނީ އަށް ލިބުނީ އިތުރު ހިތްވަރަކާއި އުފަލެކެވެ. އަދި އެއީ އޭނާ އަށް ލިބުނު ވަރަށް ބޮޑު ޝަރަފެއްގެ ގޮތުގައި ސިފަކޮށްފައިވެ އެވެ.
އެހެންވެ އެ ވަރަކުން އަދި ނިމުނީކީ ނޫނެވެ. ދާދި ފަހުން އޮލިމްޕަހުގައި ބޭއްވި ޗެރިޓީ އިވެންޓް "ހެލްޕް މަންމަ" ގައި ސުނީ އަނެއްކާ ވެސް ވަނީ އޭނާއަކީ ޕީސީގެ ބޮޑު ފޭނެއްކަން ދައްކުވައި ދީފަ އެވެ.
އަދި އޭނާ އެހެރީ ހަަ ހަގީގަތުގައި ވެސް ޕީސީ އާ ހެދި "މޮޔަވެފައި" ކަމަށް ގިނަ ބަޔަކަށް ގަބޫލް ކުރަން މިހާރު މަޖުބޫރު ވެސް ވެއްޖެ އެވެ.
އެހެން ނުބުނަންވީ ސަބަބެއް ނެތްތާ އެވެ. އެ އިވެންޓްގައި ސުނީ ވަނީ ސަންޖޭ ލީލާ ބަންސާލީގެ "ރާމް-ލީލާ" ފިލްމުގައި ޕީސީ ހުށަހަޅައި ދިން ހިޓް އައިޓަމް ލަވަ "ރާމް ޗާހޭ ލީލާ ޗާހޭ،" ލަވަ އަށް ޕްރިޔަންކާގެ ކޮސްޓިއުމާ އެކު ނަށައިފަ އެވެ.
ހަމަ އެ ލަވަ އާ އެކު ޕްރިޔަންކާ ލީޑް ރޯލް ކުޅުނު "ޒަންޖީރު" ގައި ހިމެނޭ "ޕިންކީ" ލަވަ ވެސް ހަމަ އެ ލަވައިގައި ޕީސީ އަޅާފައި އިން ކަހަލަ ކޮސްޓިއުމަކާ އެކު ސުނީ ސްޓޭޖްމަތީގައި ވައްތަރު ޖައްސައިފަ އެވެ.
އަދި މި މަހުގެ 14 ގައި ރިލީޒްވާ "ގުންޑޭ" ގައި ހިމެނޭ ޕްރިޔަންކާގެ ކެބަރެޓް ނަންބާ "އައްސަލާމޭ އިޝްގުމް" ވެސް ސުނީ ވެސް ބަޑި ލައްވައިފަ އެވެ.
ރާއްޖެއަކީ ހިންދީ ތަރިންނަށް އަބަދު ވެސް ވަރަށް ބޮޑަށް ސަޕޯޓް ކުރާ ބަޔަކު އުޅޭ ގައުމެކެވެ. އެހެން ނަމަވެސް ފިލްމީ ތަރިއަކާ ހެދި ދިވެއްސަކު މިހާ ވަރަށް މޮޔަވެގެން އުޅުނު ތަނެއް މީގެ ކުރިއަކުން ފެނިފައެއް ނުވެ އެވެ.
ހިންދީ ލަވަތަކައި ފިލްމްތައް ކޮޕީ ކުރުމަކީ ދިވެހިންގެ ކަށީގައި ހިފާފައި އޮތް އާދައެކެވެ. މި ސަބަބާ ހުރެ ދިވެހިން ސިފަ ކުރެވެނީ ފަންނުވެރިކަމުގައި "އޮރިޖިނަލިޓީއެއް" ނެތް ބައެއްގެ ގޮތުގަ އެވެ. ހަގީގަތުގައި ވެސް އަމިއްލަ އުފެއްދުންތެރި ކަމެއް ނެތީ އެވެ.
ސުނީމެން ކަހަލަ ދުވަސްވީ އަދި ދިވެހި ފިލްމީ ދާއިރާގައި މަސައްކަތް ކުރާ ތަޖުރިބާކާރު ނެށުންތެރިންގެ ފަރާތުން އާ ކަމަކަށް އުންމީދު ކުރާނެ ކަމެއް ނެތެވެ. މި މީހުން އަބަދު ވެސް ތިބޭނީ ބޭރު މީހުން ކޮޕީކޮށްލަކޮށްލަ އެވެ. ބޭރުގެ ފަންނާނުން ޖައްސާ ވައްތަރުތައް ޖައްސާ ލެވުނީމާ މި މީހުންނަށް ދެން އެ ކުރެވުނީ މާ މޮޅު ކަމަކީ އެވެ.
ބުނާނެ އެއްޗެއް ނެތެވެ. މި ދެން ތަންކޮޅެއް ބޮޑުވަރު ކަންނޭނގެ އެވެ.