ފިލްމް "ކެޕޯޓް" އިން އެންމެ މޮޅު އެކްޓަރުގެ އޮސްކާ އެވޯޑް ހާސިލްކޮށްފައިވާ ހޮލީވުޑްގެ އެކްޓަރު ފިލިޕް ސޯމޭ ހޮފްމަން އާދީއްތަ ދުވަހު މަރުވެއްޖެ އެވެ.
މީޑިއާ ރިޕޯޓްތައް ބުނާ ގޮތުން އުމުރުން 46 އަހަރުގެ ހޮފްމަން މަރުވެފައި އޮއްވާ ފެނުނީ އޭނާ މެންހަޓަންގައި ދިރިއުޅޭ އެޕާޓްމަންޓްގެ ފާހާނާގެ ތެރެއިންނެވެ. ހޮފްމަން މަރުވެފައި އޮއްވާ ފެނުނީ ހޮފްމަންގެ އެކުވެރި ސްކްރީންރައިޓަރު ޑޭވިޑް ކެޓްޒްއަށެވެ.
އަދި އޭނާ މަރުވެފައި ވަނީ ޑްރަގް އޯވަޑޯޒްވެގެން ކަމަށް ވެސް ރިޕޯޓްތައް ބުނެ އެވެ.
އެހެން ނަމަވެސް ރަސްމީ އެއްވެސް ފަރާތަކުން އެކަން އަދި ކަށަވަރުކޮށް ދީފައެއް ނުވެ އެވެ.
އެކަމަކު ފާހާނާ ތެރޭގައި ހޮފްމަން މަރުވެފައި އޮއްވާ ފެނުނު އިރު، މަސްތުވާތަކެތި އިންޖެކްޓް ކުރަން ބޭނުން ކުރާ ކަހަލަ އާލާތްތަކާއި އެފަދަ ނިޝާންތަކެއް އޭނާގެ ހަށިގަނޑުން ފެނިފައިވެ އެވެ. އަދި އޭނާ ފެނުނު އިރު ވެސް މަރުވެފައިވާ ކަމަށް ރިޕޯޓްތައް ބުނެ އެވެ.
މީގެ ކުރިން ވެސް މަސްތުވާތަކެއްޗަށް ދެވިހިފައިގެން ފަރުވާ ހޯދި ހޮފްމަން މަރުވި އިރު، އަންހެނުންނާއި ތިން ކުދިން ދުނިޔޭގައި އެބަ ތިއްބެވެ.
ހޮފްމަން މަރުވި ހަބަރާ ގުޅިގެން ނިއުޔޯކް ސިޓީގެ މޭޔަރު ބިލް ދެ ބްލާސިއޯ ވަނީ ހިތާމަ ފާޅުކޮށް ޓްވީޓް ކުރައްވައިފަ އެވެ. އޭނާ ވިދާޅުވީ ގެއްލިގެން މި ދިޔައީ ސިނަމާ އާއި ސްޓޭޖްމަތީގެ ކުޅަދާނަ ހުނަރުވެރިއެއް ކަމަށެވެ.
އަދި މިއީ ނިއުޔޯކް ސިޓި އަށް ވަރަށް ހިތާމަވެރި ދަނޑިވަޅެއްގެ ގޮތުގައި މޭޔަރު ވަނީ ސިފަ ކުރައްވައިފަ އެވެ. މީގެ އިތުރުން ހޮލީވުޑްގެ ވަރަށް ގިނަ ފަންނާނުން ވެސް މި ހިތާމައިގައި ޓްވީޓްކޮށްފަ އެވެ.
ބައޯޕިކް "ކެޕޯޓް" އިން 2005 ވަނަ އަހަރު އެންމެ މޮޅު އެކްޓަރުގެ އޮސްކާ ހާސިލް ކުރި، ހޮފްމަން ވަނީ 2012 ވަނަ އަހަރު ރިލީޒްވި "ދަ މާސްޓާ" އިންނާއި 2008 ގައި ނިކުތް "ޗާލީ ވިލްސަންސް ވޯ" އާއި 2009 ގައި ރިލީޒްވި "ޑައުޓް" އިން ވެސް އެންމެ މޮޅު ސަޕޯޓިން އެކްޓަރުގެ އޮސްކާ އަށް ނޮމިނޭޓްވެފަ އެވެ.
އޭނާގެ ފާހަގަކޮށްލެވޭ އިތުރު ފިލްމުތަކުގެ ތެރޭގައި "މެގްނޯލިއާ"، "ދަ ހަންގަ ގޭމްސް: ކެޗިން ފައާ" ފަދަ ފިލްމްތައް ހިމެނެ އެވެ.