ސިންގަޕޫރުގެ ޑޮކްޓަރުންގެ ޓީމެއް އައްޑު އަށް ވަޑައިގެން ކެންސަރު ސްކްރީން ކުރުމުގެ ކޭމްޕެއް ފަށައިފި އެވެ.
ފޭދޫ ސިއްހީ މަރުކަޒު ހިންގެވުމާ ހަވާލުވެ ހުންނެވި އިހްތިޝާމް ނަޖީބް (އިންތާ) ވިދާޅުވީ އެ ތަނުގައި މިއަދު ސްކްރީން ކުރުން ކުރިއަށް ދާނެ ކަމަށެވެ. އެއީ މެންދުރު ފަހު 1:00 އިން ހަވީރު 4:00 އަށެވެ.
އެހެންވެ ކެންސަރަށް ސްކްރީން ކުރަން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލައިފަ އެވެ.
އިންތާ ވިދާޅުވީ މިއީ ރަށުގައި ތިބެގެން މިފަދަ ޓެސްޓެއް ހެދުމަށް ލިބޭ ރަނުގެ ފުރުސަތެއް ކަމަށެވެ. އެހެންވެ މީގެ ބޭނުން ވީހާ ވެސް ގިނަ ބަޔަކު ހިފުމަށް ސިއްހީ މަރުކަޒުން އެދެ އެވެ.
ސިންގަޕޫރުގެ ޑޮކްޓަރުންހް ޓީމުން އައްޑޫގެ އެކި ރަށްރަށުގައި ކެންސަރަށް ސްކްރީން ކުރުމުގެ ކެމްޕޭން ކުރިއަށް ގެންދަން ވަނީ ނިންމައިފަ އެވެ. އެގޮތުން ސްކްރީން ކުރުން ހުޅުމީދޫ އާއި ހިތަދޫގައި ވެސް ކުރިއަށް ގެންދިއުމަށް ވަނީ ހަމަޖެހިފައެވެ.
ކެންސާ ސޮސައިޓީ އޮފް މޯލްޑިވްސް އާއި ސިންގަޕޫރުގެ ކެންސަރުންގެ ޑޮކްޓަރުންގެ ޓީމަކާއި ގުޅިގެން ކުރިއަށްގެންދާ މި ހަރަކާތުގައި މައުލޫމާތި ސެޝަނެއް ރޭގަނޑަށް ވަނީ ހަމަޖައްސާފައެވެ. އެގޮތުން މިރޭ 8 ޖަހާއިރު ފޭދޫ ސްކޫލްގައި ކެންސަރާއި ގުޅޭ މައުލޫމާތު ސެޝަން އޮންނާނެއެވެ. އަދި މާދަމާ ރޭ ހިތަދޫ ޝަފުއްދީން ސްކޫލް ހޯލްގައި އިތުރު މައުލޫމާތު ސެޝަނެއް ބޭއްވުމަށް ވަނީ ހަމަޖެހިފައެވެ. މި ޕްރޮގްރާމްގެ ފަހު މައުލޫމާތު ސެޝަން އޮންނާނީ ފެންރުއަރީ 5 ވަނަ ދުވަހުގެ ރޭ ސ.އަތޮޅު މަދަރަސާގެ ހޯލްގައި އޮންނާނެއެވެ.
ކެންސަރު ބަލި މުޅި ރާއްޖޭގައި އާއްމުވެފައިވާއިރު މިފަދަ ސެޝަނަކީ ވަރަށް މުހިއްމު މައުލޫމާތުތަކެއް ލިބިގެންދާނެ ސެޝަން ތަކެވެ.