އައްޑޫގައި ހޮސްޕިޓަލްގައި މަސައްކަތްކުރައްވާތާ ހަތް އަހަރު ފަހުން އެނބުރި ގައުމަށް ވަޑައިގެންނެވި ނަމަވެސް ފަހަރުގައި އަދި ދެ ތިން އަހަރު ފަހުން އައްޑު އަށް އެނބުރިވަޑައިގެން ހިދުމަތްކުރުމަކީ ވެދާނެ ކަމެއް ކަމަށް އައްޑޫ އިކްޓޯރިއަލް ހޮސްޕިޓަލްގައި މަސައްކަތްކުރައްވަމުން ގެންދެވި ސީރިއާގެ ޑރ. ތާރެގް ސުރޫރު ވިދާޅުވެއްޖެ އެވެ.
އައްޑޫގެ ވަރަށް ގިނަ ބައެއްގެ ލޯތްބާއި އިހުތިރާމާއި އިތުބާރު ވެސް ހޯއްދަވާފައިވާ ކިޑްނީ އާއި އެތެރެހަށީގެ ބަލިތަކުގެ ހާއްސަ ޑޮކްޓަރު މިއަދު އެނބުރި ގައުމަށް ވަޑައިގަންނަވަން ފުރާވަޑައިގަތުމުގެ ކުރިން "އައްޑޫ ލައިވް" އަށް ދެއްވި ހާއްސަ އިންޓަވިއެއްގައި ވިދާޅުވީ ރާއްޖެ އަށް ގިނަ ދުވަސްތަކެއް ވަންދެން ހިދުމަތްކުރެއްވުމަކީ ލިބިވަޑައިގަތް ބޮޑު އުފަލެއް ކަމަށެވެ.
"ރާއްޖެ [އައްޑޫ] އަކީ މިހާރު އަޅުގަނޑުގެ ދެވަނަ ވަޒަން ކަހަލަ ތަނެއް. މިތަނުގެ އާންމުންނާއި ހާއްސަކޮށް އަޅުގަނޑުގެ ފަރާތުން ހިދުމަތް ހޯދި އެތައް ބަޔަކާ ވެސް ވަރަށް ގާތް ގުޅުމެއް އިވޭ." ތާރެގް ވިދާޅުވި އެވެ.
އޭނާ ވިދާޅުވި ގޮތުގައި އައްޑު އަށް 2015 ގައި ވަޑައިގެން އޭރުގެ ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގައި މަސައްކަތްކުރައްވަން ފެއްޓެވީ ފިޒިޝަނެއްގެ ގޮތުގަ އެވެ. އަދި 2018 ގައި ނެފްރޮލިޖޮސްޓަކަށް ޕްރޮމޯޓްވެވަޑައިގަތުމަށް ފަހު މިހާރު މަސައްކަތްކުރާ ޑިޕާޓްމަންޓްގެ ފިޒިޝަނުންގެ އަަދަދު ހޮސްޕިޓަލް އާ އިމާރާތަކަށް އާ ނަމަކާ އެކު ބަދަލުވި ފަހުން ބޮޑެތި ކުރިއެރުންތަކެއް އައިސްފައިވާ ކަމަށް ވިދާޅުވި އެވެ.
"މިތަނުގެ މެނޭޖްމަންޓާ ބަލި މީހުންނާ އަޅުގަނޑާ އަބަދު ވެސް ވަރަށް ގާތް ގުޅުމެއް އޮވޭ. ހަތް އަހަރު ކޮށްފައި އެނބުރި ދާ އިރު މިކަމަކީ ވަރަށް ގިނަ ބަތަކަށް ލިބުނު މާޔުސްކަމެއްކަން އަޅުގަނޑަށް އެނގޭ. އެނބުރި ގައުމަށް މި ދަނީ އަމިއްލަ ގައުމާއި އާއިލާ އަށްޓަކައި،" ތާރެގް ވިދާޅުވި އެވެ. "އެކަމަކު ފަހުން ވާނެ ގޮތެއް ކިހިނެއް އެނގޭނީ؟ އެހެންވީމަ އަނެއްކާ ވެސް ދެތިން އަހަރުން މިތަނަށް އެނބުރި އައިސް ހިދުމަތްކުރުމަކީ ހަމަ ވެދާނެ ގޮތެއް."
އޭނާ ވިދާޅުވީ އޭއީއެޗް ދޫކޮށްލެއްވި ނަމަވެސް ހޮސްޕިޓަލާއި އައްޑު އަށް އިތުރުކުރިއެރުމަށް އެދިވަޑައިގަންނަވާ ކަމަށެވެ.