ސްޕޭސް އެކްސްގެ ސްޓާލިންކްގެ އިންޓަނެޓްގެ ހިދުމަތް ރާއްޖެއަށް ދިނުމާ ބެހޭ ގޮތުން މަޝްވަރާތައް އަދިވެސް ކުރިއަށް ދަމުން އަންނަކަމަށް މިނިސްޓަރު އައިމިނަތު ޝައުނާ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުންނަށް ސުވާލު ކުރުމަށް ލިބުނު ފުރުސަތުގައި ވެލިދޫ ދާއިރާގެ މެމްބަރު މުހައްމަދު ޝަފީގް ވަނީ ސްޓާލިންކް އިންޓަނެތް ރާއްޖެއަށް ދިނުމާ ގުޅޭގޮތުން ކުރިއަށްދިޔަ މަޝްވަރާތަކާ ބެހޭގޮތުން ސުވާލު ކޮށްފައެވެ.
އެސުވާލަށް ޖަވާބު ދެއްވަމުން މިނިސްޓަރު ޝައުނާ ވިދާޅުވީ، ސްޕޭސް އެކްސްގެ ސްޓާލިންކް އިންޓަނެޓް ހިދުމަތް ބްލޮކް ކުރުމުގެ އެއްވެސް ވިސްނުމެއް ސަރުކާރުން ނުގެންގުޅޭ ކަމަށެވެ.
"އެ ބައްދަލުވުމާ ގުޅޭގޮތުން ސްޕޭސް އެކްސްއިން އެދިލައްވާފައިވަނީ އެ ބައްދަލުވުމުގެ އެއްވެސް އިތުރު މައުލޫމާތެއް ހާމަނުކުރެއްވުމަށް. އެ މަޝްވަރާތައްވެސް އެބަ ކުރިއަށްދޭ. އެ މަޝްވަރާތައް ނުނިމެނީސް އެ މައުލޫމާތު ހާމަނުކުރެއްވުމަށް އެދިލައްވާފަވާތީވެ އެވާހަކަ ދަންނަވަން." މިނިސްޓަރު ޝައުނާ ވިދާޅުވިއެވެ.
ސްޕޭސް އެކްސްގެ ސްޓާލިންކްގެ އިންޓަނެޓްގެ ހިދުމަތް ރާއްޖެއަށް ދިނުމާ ބެހޭ ގޮތުން މަޝްވަރާތައް ކުރިއަށްދާކަން އެންވާރަމެންޓް މިނިސްޓްރީން ހާމަކޮށްފައިވަނީ ފެބްރުއަރީ 13 ވަނަ ދުވަހުއެވެ.
އެ މިނިސްޓްރީން އެދުވަހު ބުނެފައިވަނީ އެކަމާ ގުޅޭގޮތުން މިނިސްޓަރު އައިމިނަތު ޝައުނާ އާއި ސްޓާލިންކްގެ މާކެޓް އެކްސެސް ޑައިރެކްޓަރު ރަޔަން ގުޑްނައިޓާ ދެމެދު މަޝްވަރާތަކެއް ކުރިއަށް ގެންދިޔަ ކަމަށެވެ. އިތުރު ތަފްސީލެއް އޭރުވެސް ހާމަކޮށްފައެއް ނުވެއެވެ.