ސ. ފޭދޫގައި ފާމަސީއެއް ހިންގަން ވިމްލާ އިބްރާހީމް ރަޝީދަށް ކުއްޔަށް ދޫކުރި ބިމުގައި ހަދާފައިވާ ތަނުގައި ފާމަސީ ނުހިންގައި އެތަނުގެ ބޭނުން ހިފެމުން ނުދާތީ ބައެއް ފަރާތްތަކުން ކަންބޮޑުވުން ފާޅު ކުރަން ފަށައިފި އެވެ.
ފޭދު އަވަށު އޮފީހުގެ ޑެޕިއުޓީ ޑިރެކްޓަރު ހަސަން ލަފީތް އަލީ މިއަދު ވިދާޅުވީ ފޭދޫ ސިއްހީ މަރުކަޒު ކުރިމަތީގައި ހުންނަ މިސްކިތާ އިންވެގެން އޮތް ތަނުގައި ފާމަސީއެއް ހިންގަން ވިމްލާ އަށް ދިނީ 10 އަހަރުގެ މުއްދަތަކަށް ކަމަށެވެ.
އެތަނުގައި ފާމަސީއެއް ހުޅުވައި، ކުޑަ ދުވަސްކޮޅަކު ހިންގުމަށް ފަހު ވަނީ ބަންދުކޮށްފަ އެވެ.
ލަތީފް ވިދާޅުވީ އެތަން ބަންދުކޮށް މިހާތަނަށް އަލުން ނުހުޅުވި ލަސްވެގެން ގޮސްފައި ވަނީ ވިމްލާގެ ވިޔަފާރި އަށް ދިމާތި ތާށިކަމަކާ ގުޅިގެން ގަބޫލް ކުރެއްވޭ ކަމަށެވެ.
"އެކަހަލަ ގޮތެއް ދިމާވެގެން ފާމަސީ ބަންދު ކުރަން ޖެހުނީ ކަމަށް ގަބޫލް ކުރެވެނީ. އެހެން ނަމަވެސް އެތަން ނުހިންގޭނެ ވާހަކައެއް އެ ފަރާތުން މިހާތަނަށް އަޅުގަނޑުމެންނާ ހަމައަށް ގެނެސްފައެއް ނެތް. އެހެންވެ އެތަން ހިންގަން ވިމްލާ އިން މަސައްކަތް ކުރަމުން އަންނަ ކަމަށް ގަބޫލް ނުކުރެވެނީ،" އޭނާ ވިދާޅުވި އެވެ. "އަނެއްކާ އާސަންދަ އާ ނުލައި ފާމަސީއެއް ހިންގުމަކީ މިހާރު ވަރަށް ދަތި ކަމަކަށް ވާނެ. އަޅުގަނޑުމެންނަށް އެނގިފައި އޮތް ގޮތުން، އާސަންދަ ހޯދުމަށް ވިމްލާ އިން ވަނީ ސަރުކާރަށް ވެސް ހުށަހަޅާފައި."
ލަތީފް ވިދާޅުވީ ވިމްލާ އިން ހެދި އިމާރާތުގައި ފާމަސީއެއް ހިންގުމަކީ މުހިއްމު ކަމެއް ކަމަށެވެ. އެގޮތުން އެއީ ފޭދޫ ސިއްހީ މަރުކަޒާ ވަރަށް ކައިރީގައި ހުރި ތަނަކަށްވުމުން، 24 ގަޑި އިރު، ފާމަސީގެ ހިދުމަތް ލިބޭނެ ގޮތެއް ވުމަކީ އުންމީދެއް ކަމަށް އޭނާ ވިދާޅުވި އެވެ.
އެނގިފައިވާ ގޮތުން ފާމަސީ ހިންގަން ވިމްލާ އިން ހެދި އިމާރާތުން ބައެއް އެހެން ފަރާތަކަށް ކުއްޔަށް ދޭން ވިމްލާ އިން ވަނީ ނިންމައިފަ އެވެ. އެގޮތުން އިމާރާތް ވަނީ ބައި ވެސް ކޮށްފަ އެވެ.
އަދި ވަރަށް އަވަހަށް އެތަނުގައި ފާމަސީއެއްގެ ހިދުމަތް ދޭން ފަށާނެ ކަމަށް އެނގިފައިވެ އެވެ.