ޖަރާސީމު ހުރި ފެނެއް ބާޒާރަށް ނެރެގެން ނުވިއްކާ ކަމަށް "ތާޒާ" ބްރޭންޑްގެ ފެން ވިއްކާ އެމްޑަބްލިއުސްސީން ބުނެފި އެވެ.
އެތަނުގެ ތާނގީއެެއްގެ ތެރެއަށް މަރުވެފައިވާ ކާޅެއް ވެއްޓި، ފެން ތަޢައްޔަރުވެފައިވާ ކަމަށް ބުނެ ސޯޝަލް މީޑިއާގައި ރޭ ދައުރުވަމުން ދިޔަ ވާހަކަތަކާ ގުޅިގެން ފެން ކުންފުނިން ބުނީ އެފަދަ މައްސަލައެއް ދިމާވި ފެނެއް ނުވިއްކާ ކަމަށެވެ.
ނަމަވެސް މިދިޔަ ހަފުތާގެ ތެރޭގައި ފެން ބެޗެއްގައި މައްސަލަތަކެއް ހުރިކަން ފާހަގަކުރެވިގެން، އެ ފެން މާކެޓަށް ނުނެރޭ ކަމަށް ވެސް އެމްޑަބްލިއުއެސްސީން ބުންޏެވެ. އެހެންވެ އެކަން ބަލަމުން އަންނަ ކަމަށާއި ޖަރާސީމާއި އަދި އެ ނޫން ވެސް ގޮތަކުން ތަޢައްޔަރުވެފައި ހުރި "ތާޒާ" ބްރޭންޑްގެ ފެނެއް ބާޒާރުގައި ނުހުންނާނެކަމުގެ ޔަގީންކަންދޭ ކަމަށް ފެން ކުންފުނިން ނެރުނު ބަޔާނެއްގައި ބުންޏެވެ.
"ތާޒާ ފެނަކީގެ އޭގެ ކޮލިޓީ ޔަގީންކުރުމުގެ ގޮތުން ފުޅީގައި ބަންދުކުރުމުގެ މަރުހަލާތަކުގައި ގަޑިއަކު އެއް ފަހަރު ހަދަން ޖެހޭ އެންމެހައި ޓެސްޓެއް ހަދައި ފެން އުފެއްދުމަށް ފަހު، އިތުރު ތަހުލީލުކުރުމަށްޓަކައި މާކެޓަށް ނުނެރި ސައުވީސް ގަޑިއިރު ބަހައްޓައި ގިނަ ތަހުލީލުތަކެއްކޮށް، ބައިނަލްއަގްވާމީ ކަމާ ގުޅޭ އެންމެ މަތީ މިންގަނޑުތަކުން ފެންވަރު ވަޒަންކޮށް މާކެޓަށް ނެރޭ ފެނެކެވެ." ބަޔާނުގައި ބުންޏެވެ.
"ތާޒާ" ފެނުގައި މައްސަލަތަކެއް ހުރި ކަމަށް ބުނެ ސޯޝަލް މީޑިއާގައި ދައުރުވި ވާހަކަތަކާ ގުޅިގެން އާންމުންގެ ތެރޭގައި ކަންބޮޑުވުން ވެސް އުފެދިފައިވެ އެވެ.