އަކްޝޭ ކުމާރާ ކައިވެނިކޮށް ދެ ކުދިން ވެސް ލިބިފައިވާ ކުރީގެ ބަތަލާ ޓްވިންކަލް ކަންނާ ބަނޑުގެ އޮޕަރޭޝަނެއްކޮށްފި އެވެ.
މިޑިއާ ރިޕޯޓްތައް ބުނާ ގޮތުން ޑިމްޕަލް ކަޕާޑިއާ އާއި މަރުހޫމް ރާޖޭޝް ކަންނާގެ ދޮށީ އަންހެން ދަރިފުޅު ޓްވިންކަލް، 39، ބަނޑުގެ އޮޕަރޭޝަނެއް ކުރީ އޭނާ ބަނޑުގައި ވަރަށް ބޮޑަށް ރިއްސާތީ، ޑޮކްޓަރަށް ދެއްކުމުން ކިޑްނީގައި ހިލަ އުފެދިފައިވާ ކަމަށް ޑޮކްޓަރު ބުނުމާ ގުޅިގެންނެވެ.
ޑޮކްޓަރުގެ އެ އިންޒާރާ އެކު، މުމްބާއީގެ ހޮސްޕިޓަލެއްގައި ޓްވިންކަލް އެޑްމިޓްކޮށް، ވަގުތުން ވަނީ އޮޕަރޭޝަންކޮށްފަ އެވެ. އަދި އޮޕަރޭޝަން ވަރަށް ކާމިޔާބެވެ.
ޓްވިންކަލް ހޮސްޕިޓަލުގައި ހޭދަ ކުރި ހުރިހާ ވަގުތެއްގައި ފިރިމީހާ އަކްޝޭ އަށް، އޭނާ އާ އެކުގައި ވަގުތު ހޭދަ ކުރެވޭ ގޮތް ނުވި ނަމަވެސް، ވަގުތެއް ލިބުމާ އެކު އަކްޝޭ ވަގުތުން ހޮސްޕިޓަލަށް ޒިޔާރަތް ކުރެ އެވެ.
މި ދުވަސްކޮޅު އަކްޝޭ އުޅެނީ، ވަރަށް އަވަހަށް ރިލީޒް ކުރަން ހަމަޖެހިފައިވާ އޭނާގެ ދެ ފިލްމެއްގެ މަސައްކަތުގައި ވަރަށް ބިޒީކޮށެވެ.
އެއީ ސޮނާކްޝީ ސިންހާ އެކު ކުޅޭ "ހޮލިޑޭ" އާއި ތަމަންނާ ބާޝިއާ އާ އެކު ކުޅޭ "އިޓްސް އެންޓަޓެއިންމަންޓް" އެވެ.