ކެންސާ އެސޯސިއޭޝަން އޮފް މޯލްޑްވިސް އިން ސިންގަޕޫރުގެ ޑޮކްޓަރުންގެ ޓީމެއް އައްޑު އަށް ގެނެސްގެން އިއްޔެ ފޭދޫގައި ކުރިއަށް ގެންދިޔަ ކެންސަ ސްކްރީން ކޭމްޕްގައި 100 އަށް ވުރެ ގިނަ މީހުން ސްކްރީންކޮށްފި އެވެ.
ފޭދޫ ސިއްހީ މަރުކަޒުގައި ކުރިއަށް ގެންދިޔަ މި ކޭމްޕްގައި ފޭދޫގެ އިތުރުން މަރަދޫފޭދު އާއި މަރަދޫން މީހުން ނަން ނޯޓްކޮށް، ސްކްރީންކޮށްފައިވެ އެވެ.
ފޭދޫ ސިއްހީ މަރުކަޒު ހިންގެވުމާ ހަވާލުވެ ހުންނެވި އިހުތިޝާމް ނަޖީބް (އިންތާ) ވިދާޅުވީ ފޭދޫގައި ކުރިއަށް ގެންދިޔަ ސްކްރީން ކޭމްޕްގައި އިއްޔެ ޖުމްލަ 121 މީހުން ސްކްރީން ކުރި ކަމަށެވެ. އަދި ކެންސަރު ބަލީގެ އެއްވެސް ކޭސްއެއް ފެނިފައި ނުވާ ކަމަށް އޭނާ ވިދާޅުވި އެވެ.
މި ކޭމްޕް މިހާރު ކުރިއަށް ދަނީ ހިތަދޫގަ އެވެ. ހިތަދޫ ރީޖަނަލް ހޮސްޕިޓަލްގައި ކުރިއަށް ގެންދާ ކޭމްޕްގައި އެ ރަށުން 150 އަށް ވުރެ ގިނަ މީހުން ނަން ނޯޓްކޮށްފައިވެ އެވެ. އަދި ހުޅުމީދޫން 300 އަށް ވުރެ ގިނަ މީހުން ވަނީ ނަން ނޯޓްކޮށްފަ އެވެ. އެ ރަށުގައި ސްކްރީން ކުރުން އޮންނާނީ މާދަމާ އެ ރަށު ސިއްހީ މަރުކަޒުގަ އެވެ.
ސްކްެރީން ކުރުމުގެ އިތުރަށް ސިންގަޕޫރުގެ ޑޮކްޓަރުންގެ ޓީމާއި ކެންސާ އެސޯސިއޭޝަނުން އަންނަނީ ހޭލުންތެރި ކުރަން ސްކޫލްތަކުގެ ސާނަވީ ގްރޭޑްތަކުގެ ދަރިވަރުންނަށް މައުލޫމާތު ދިނުމުގެ ސެޝަންތަކެއް ވެސް ހިންގަމުންނެވެ.