ކުރިން މާދަމާ ފަށާ ގޮތަށް ހަމަޖެއްސި "ސްޓްރީޓް ސޮކާ 2014" މި މަހުގެ 10 ގައި ފަށާ ގޮތަށް ހަމަޖައްސައި، ގުރުލުން މި މަހުގެ ހަތެއްގައި ބާއްވާ ގޮތަށް ހަމަޖައްސައިފި އެވެ.
މި މުބާރާތް އިންތިޒާމް ކުރާ ފަރާތުން ބުނީ 20 ޓީމް ބައިވެރިވާ މުބާރާތުގެ ގުރުލުން އޮންނާނީ ހަތް ވަނަ ދުވަހުގެ ރޭ ގަމުގެ ޒުވާނުންގެ މަރުކަޒުގައި ކަމަށެވެ.
ވީބީން މާކެޓްއ ކުރާ "ސްނިކާސް" އިން ސްޕޮންސަކޮށްފައިވާ މި މުބާރާތުގެ ޗެމްޕިއަން ޓީމަށް މި ފަހަރު ވެސް 35،000ރ. ހުށަހަޅާފައިވާ އިރު، ރަނައަޕް ޓީމަށް ވަނީ 10،000ރ. ގެ ފައިސާގެ އިނާމް ހުށަހަަޅައިފަ އެވެ.
މިދިޔަ އަހަރު 16 ޓީމާ އެކު ބޭއްވި "އަލިކެފޭ ސްޓްރީޓް ސޮކާ 2013" ގެ ޗެމްޕިއަން ޓީމަކީ ފޭދޫ ފްރެންޑްސް ކުލަބެވެ.
ގިނަ ބައެއްގެ ތަރުހީބު ވެސް ވަރަށް ބޮޑަށް ލިބެމުން އަންނަ ފޭދޫ ސްޕޯޓްސް އިން އިންތިޒާމުކޮށްގެން ބާއްވާ ސްޓްރީޓް ސޮކާ މި އަހަރުގެ މުބާރާތަކީ، މީގެ ހަތަރު ވަނަ މުބާރާތެވެ.