ސުޕަ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން ތަމްރީނުކުރުމަށްޓަކައި ހާއްސަ ސްކޮލަޝިޕް ސްކީމެއް ހަޔާ އެޑިޔުކޭޝަނުން ތައާރަފުކޮށްފި އެވެ.
މި ސްކޮލަޝިޕް ޕްރޮގްރާމްގެ ދަށުން ޑޮކްޓަރުން ތަމްރީނުކުރަން ހަމަޖެހިފައި ވަނީ ހުޅުމާލޭ ހޮސްޕިޓަލާއި ހަ ރީޖަނަލް ހޮސްޕިޓަލަކުން އެދިފައިވާ ދާއިރާތަކަށެވެ. އެ ރީޖަނަލް ހޮސްޕިޓަލްތަކަކީ އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އާއި ކުޅުދުއްފުށީ ރީޖަނަލް ހޮސްޕިޓަލާއި ލ. ގަން ރީޖަނަލް ހޮސްޕިޓަލާއި ތިނަދޫގައި ހުންނަ ޑރ. އަބްދުސަމަދް މެމޯރިއަލް ހޮސްޕިޓަލާއި ރ. އުނގޫފާރު ރީޖަނަލް ހޮސްޕިޓަލްގެ އިތުރުން މ. މުލީ ރީޖަނަލް ހޮސްޕިޓަލެވެ.
އެ ހޮސްޕިޓަލްތަކުން ސުޕަ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން 10 ދާއިރާއަކުން ތަމްރީނުކުރުމަށް އެދިފައިވާކަމަށް ހަޔަ އެޑިއުކޭޝަން މިނިސްޓްރީން ބުންޏެވެ.
އެ ދާއިރާތަކަކީ ނެފްރޮލޮޖީ، ކާޑިއޯ ވެސްކިއުލަ، ތޮރޭސިކް ސާޖަރީ، އެންޑޯކްރައިނޮލިޖީ އެންޑް ޑައިބެޓިކް، ގޭސްޓްރޯއެންޓިރޯލޮޖީ، ހެޕަޓޮލޮޖީ، އިންޓަވެންޝަނަލް ރޭޑިއޮލޮޖީ، މެޑިކަލް އޮންކޮލޮޖީ، ޕީޑިއެޓްރިކް ނިއުރޮލޮޖީ، ރިއުމަޓޮލޮޖީ، ސާޖިކަލް އޮންކޮލޮޖީ އެވެ.
އަލަށް ތައާރަފުކުރި ހާއްސަ ސްކޮލަޝިޕްގެ ޕްރޮމްގާމްގެ ދަށުން 15 ސްޕެޝަލައިޒްޑް ޑޮކްޓަރުން ތަމްރީނުކޮށް އެ ހޮސްޕިޓަލްތަކުގައި ބޮންޑް އުސޫލުން މަސައްކަތްކުރުވާ ގޮތަށް ހަމަޖެހިފައިވެ އެވެ. ނަމަވެސް އެއަށް ހުޅުވައިލާނެ އިރެއް އަދި މިނިސްޓްރީން ހާމައެއްނުކުރެ އެވެ.