އިސްތަށިގަނޑު ކޮންޑިޝަން ކުރުން މުހިއްމު

ރީތި އަދި ސިއްހަތު ރަނގަޅު އިސްތަށިގަނޑެއް ބޭނުން ނަމަ އިސްތަށިގަނޑު ކޮންޑިޝަން ކުރުމަކީ ނުކޮށް ދޫކޮށްލާވަރުގެ ކަމެއް ނޫނެވެ. އިސްތަށިގަނޑު ކޮންޑިޝަން ކުރުމުން ކޮންމެ އިސްތަށްޓަކަށް ވަކިން ރައްކާތެރިކަން ފޯރުކޮށްދީ އިސްތަށިތައް ހަލާކުވުމުން ދުރުކޮށްދެ އެވެ.

ހަމަ އެހެންމެ އިސްތަށިގަނޑަށް އިތުރު އޮފުކަމެއް ވެސް ގެނުވައިދެ އެވެ. އިސްތަށްޓަކަށް ވަކިން ރައްކާތެރިކަން ފޯރުކޮށްދިނުމުގެ ނަތީޖާއެއްގެ ގޮތުން އިސްތަށިތަކުގައި ގޮށްޖެހުން ދުރުކޮށްދީ އިސްތަށިގަނޑު ހަލާކުވުމުން ރައްކާތެރިކޮށްދެ އެވެ.

އިސްތަށިގަނޑު ކޮންޑިޝަން ކުރާނެ ފޯމިއުލާއެއް އަމިއްލައަށް ތައްޔާރުކުރުމަކީ މިހާރު މާ އުދަނގޫ ކަމެއް ނޫނެވެ. މިގޮތުން މި ފަހަރު މި ހިމަނާލާ، މޮއިސްޗަ އާއި ޕްރޮޓީނުން މުއްސަނދިވެގެންވާ ފަރުވާގެ އެހީގައި ޔަގީނުން ވެސް އިސްތަށިގަނޑަށް އޮފުކަން ގެނުވައިދޭނެ އެވެ.

* ކޮންޑިޝަން ތައްޔާރު ކުރަން ބޭނުން ވާނެ ތަކެތި:

– ޒައިތޫނި ތެޔޮ (އޮލިވް އޮއިލް)

– ބިހުގެ ގޮބޮޅި

– ބޮލުގައި އަޅާނެ ކެޕެއް

1. މައިކްރޯވޭވް ކުޑަ ތަށްޓަކަށް އެއް ސަމުސާ ޒައިތޫނި ތެޔޮ އެޅުމަށް ފަހު ތެޔޮ ފޮދު ހޫނުކޮށްލުމަށްޓަކައި ގާތްގަނޑަކަށް ފަސް ސިކުންތު ވަންދެން މައިކްރޯވޭވް ކޮށްލާށެވެ. ނަމަވެސް ބިސް އެއްކުރުމުން ބިސް ރޯ ފިލާވަރަށް ތެޔޮ ފޮދު ހޫނު ނުކުރާށެވެ.

2. ތެޔޮ ފޮދަށް، އެއް ބިހުގެ ގޮބޮޅި އެއްކުރުމަށް ފަހު ރަނގަޅަށް ގިރާލާށެވެ.

3. ތައްޔާރުކުރި ކޮންޑިޝަނާ އިސްތަށިގަނޑުގައި އުނގުޅާށެވެ.

4. ކެޕް އަޅައި، އިސްތަށިގަނޑު ނިވާކުރާށެވެ. މިގޮތަށް ގާތްގަނޑަކަށް 20 މިނެޓު ވަންދެން ބެހެއްޓުމަށް ފަހު ޝޭމްޕޫ ލައިގެން އިސްތަށިގަނޑު ދޮވެލާށެވެ. މިހާރު އިސްތަށިގަނޑު ވަރަށް މަޑުވެފައި، އޮމާންވެފައި އަދި ވަރުގަދަވާނެ އެވެ. އިސްތަށިގަނޑުން އަތް ދޫކޮށްލާހިތް ވެސް ނުވާނެ އެވެ.