ދުބާއީގެ ކުންފުންޏަކުން ރާއްޖޭގައި ޑިޖިޓަލް ބޭންކެއް ހަދަން ނިންމައި، އެކަމުގެ ހުއްދަ އަށް އެދި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހުށަހަޅައިފި އެވެ.
އެ ބޭންކް ޑިޖިޓަލް ބޭންކް އޮފް މޯލްޑިވްސް (ޑީބީއެމް) ގެ ނަމުގައި އިއްޔެ ހުށަހެޅީ މޯޖޭ ގްލޯބަލް ހޯލްޑިން ލިމިޓެޑް ކިޔާ ކުންފުންޏަކުންނެވެ. އެ ކުންފުނީގެ ޗެއާމަނަކީ އެސްޖޭ އަރޫން އެވެ.
މޯޖޭ އިން ނެރުނު ބަޔާނެއްގައި ބުނީ ރާއްޖޭގައި ހަދަން މަސައްކަތްކުރާ ޑިޖިޓަލް ބޭންކަކީ މުޅިން އޮޓަމޭޓެޑް ނިޒާމަކުން ގުޅާލެވޭ ބޭންކެއް ކަމަށާއި އެ ބޭންކުން ފައިސާގެ މުއާމަލާތްކުރަން ބޭނުން ވާނީ ވަރަށް މަދު ވަގުތު ކޮޅެއް ކަމަށެވެ. އަދި ބޭންކުން ހިދުމަތް ފަށާ އިރު، އެކައުންޓް ހުޅުވުމުން ފެށިގެން ބޭންކަކުން ލިބޭނެ ހުރިހާ ހިދުމަތްތަކެއް ލިބޭނެ ކަމަށް މޯޖޭ އިން ބުންޏެވެ.
އެ ކުންފުނިން ބުނީ ޑިޖިޓަލް ބޭންކް ވާނީ ހުރިހާ ގޮތަކުން ރައްކާތެރި ހިދުމަތަކަށް ކަމަށެވެ.
މޯޖޭ އިން ރާއްޖޭގައި ޑިޖިޓަލް މަސައްކަތްކުރާ އިރު، ބޭންކް މޯޖޭ ނިސްބަތްބާ ޔޫއޭއީ އާއި ބްރެޒިލާއި އިންޑިއާ އަދި އެމެރިކާ ފަދަ ގައުމުތަކަށް ހިދުމަތް ފުޅާކުރަން ޕްލޭންކޮށްފައިވާ ކަމަށް ވެސް ބުންޏެވެ.
މޯޖޭ އިން ބުނީ އެ ކުންފުނިން ސްވިސް ބޭންކާ އެކު ޖޮއިންޓް ވެންޗާއެއް ހަދަން ވެސް މަސައްކަތް ކުރަމުންދާ ކަމަށާއި އެކަމުގެ ސަބަބުން ރާއްޖޭގެ ބޭންކްތައް މެދުވެރިކޮށް މަަޝްރޫއުތަކަށް ބޭރު ފައިސާ ހޯދުމަށް ފަސޭހަވެގެން ދާނެ ކަމަށެވެ.
ބޭރު ކުންފުންޏަކުން ޑިޖިޓަލް ބޭންކެއް ހަދަން އެމްއެމްއޭ އަށް ހުށަހެޅި އިރު ދާދި ފަހުން ސަރުކާރުގެ ވިޔަފާރި، ކުންފުނި އެސްޓީއޯ އިން ވެސްޑިޖިޓަލް ބޭންކެއް ހަދަން ހުށަހެޅި އެވެ. އެކަމަކު އެމްއެމްއޭ އިން އެ ކުންފުންޏަށް ހުއްދަ ނުދޭން ނިންމުމުން އަލުން އެސްޓީއޯން މިހާރު އަންނަނީ ހުށަހެޅުމަށް ތައްޔާރު ވަމުންނެވެ.