ރާއްޖޭގެ ހަތް ހޮސްޕިޓަލެއްގެ ޑޮކްޓަރުންގެ ތެރެއިން ކަނޑައަޅާފައިވާ ހާއްސަ ދާއިރާތަކަކުން ސްޕެޝަލައިޒްވުމަށް ހަޔާ އެޑިއުކޭޝަން މިނިސްޓްރީން ތައާރަފުކުރި ސްކޮލަޝިޕަށް ކުރިމަތިލާން މިއަދު ހުޅުވާލައިފި އެވެ.
އެ މިނިސްޓްރީން ނެރުނު އިއުލާނެއްގައި ބުނީ 15 ޖާގައިގެ މި ސްކޮލަޝިޕަށް ކުރިމަތިލުމުގެ އެންމެ ފަހު ސުންގަޑި އަކީ އަންނަ މަހުގެ 7 ކަމަށެވެ.
މި ސްކޮލަޝިޕް ހާއްސަކޮށްފައިވާ ހޮސްޕިޓަލްތަކަކީ ހުޅުމާލޭ ހޮސްޕިޓަލާ އެކު އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އާއި ކުޅުދުއްފުށީ ރީޖަނަލް ހޮސްޕިޓަލާއި ލ. ގަން ރީޖަނަލް ހޮސްޕިޓަލާއި ތިނަދޫގައި ހުންނަ ޑރ. އަބްދުސަމަދް މެމޯރިއަލް ހޮސްޕިޓަލާއި ރ. އުނގޫފާރު ރީޖަނަލް ހޮސްޕިޓަލްގެ އަދި މ. މުލީ ރީޖަނަލް ހޮސްޕިޓަލެވެ.
މި ހޮސްޕިޓަލްތަކުގެ ޑޮކްޓަރުން ސްޕެޝަލައިޒްވާން 10 ދާއިރާއެއް ކަނޑައަޅާފައިވެ އެވެ. އެއީ ނެފްރޮލޮޖީ، ކާޑިއޯ ވެސްކިއުލަ، ތޮރޭސިކް ސާޖަރީ، އެންޑޯކްރައިނޮލިޖީ އެންޑް ޑައިބެޓިކް، ގޭސްޓްރޯއެންޓިރޯލޮޖީ، ހެޕަޓޮލޮޖީ، އިންޓަވެންޝަނަލް ރޭޑިއޮލޮޖީ، މެޑިކަލް އޮންކޮލޮޖީ، ޕީޑިއެޓްރިކް ނިއުރޮލޮޖީ، ރިއުމަޓޮލޮޖީ، ސާޖިކަލް އޮންކޮލޮޖީ އެވެ.
މި ދާއިރާތަކަށް ބަލާ އިރު އޭއީއެޗަށް ތިން ދާއިރާއަކުން ސްކޮލަޝިޕްގެ ފުރުސަތު ލިބެ އެވެ. އެއީ އެނެސްތީސިއޮލޮޖީ، އިންޓާނަނަލް މެޑިސިން އަދި އޯތޮޕީޑިކްސް އެންޑް ޓްރޯމާ ސާޖަރީ އެވެ. ހުޅުމާލެ ހޮސްޕިޓަލަށް ދެ ދާއިރާއަކުން ފުރުސަތު ލިބޭ އިރު އެއީ ގޭސްޓްރޯއެންޓްރޮލޮޖީ އެންޑް ހެޕަޓޮލޮޖީ އާއި މެޑިކަލް އޮންކޮލޮޖީ އެވެ.
ކުޅުދުއްފުށީ ހޮސްޕިޓަލަށް ގޭސްޓްރޯއެންޓްރޮލޮޖީ އެންޑް ހެޕަޓޮލޮޖީ އާއި މެޑިކަލް އޮންކޮލޮޖީ، ގަން ރީޖަނަލް ހޮސްޕިޓަލަށް އޮފްތަލްމޮލޮޖީ އާއި ޑާމެޓޮލޮޖީ، އަބްދުއްސަމަދު މެމޯރިއަލް ހޮސްޕިޓަލަށް ނިއޯނޭޓޮލޮޖީ އާއި ޕަލްމޮނޮލޮޖީ އަދި ނެފްރޮލޮޖީ، އުނގޫފާރު ހޮސްޕިޓަލަށް އެންޑޯކްރިނޮލޮޖީ އެންޑް ޑައިބެޓިކްސް އަދި މުލީ ރީޖަނަލް ހޮސްޕިޓަލަށް ގައިނަކޮލޮޖީ ދާއިރާ އިން ސްޕެޝެލައިޒްވުމުގެ ފުރުސަތު ވަނީ ހުޅުވާލައިފަ އެވެ.
މި ދާއިރާތަކުން ސްޕެލައިޒްވާން ކުރިމަތިލާ ޑޮކްޓަރުން ވާން ޖެހެނީ އެމްބީބީއެސް ހާސިލްކޮށްފައިވާ އަދި އެދޭ ކޯހާ އެއް ފެންވަރެއްގެ ކޯހެއް ސަރުކާރުގެ ހަރަދުގައި މިހާރު ފުރިހަމަކުރަމުން ނުދާ މީހަކަށެވެ.
ހަޔާ އެޑިއުކޭޝަން މިނިސްޓރީން ބުނި ގޮތުގައި މި ސްކޮލަޝިޕްތަކަށް މީހުން ހޮވުމުގައި އިސްކަންދޭނީ ކުރިމަތިލާފައިވާ ހޮސްޕިޓަލްގައި މަސައްކަތް ކުރާ ޑޮކްޓަރުންނަށެވެ. ނަމަވެސް އެ ހޮސްޕިޓަލަކަށް ހުޅުވާލާފައިވާ ފުރުސަތުގެ އަދަދަށް ވުރެ ގިނަ މީހުން ކުރިމަތިލާފައިވާ ނަމަ ދެން އިސްކަންދޭނީ، އެ މީހަކު އެމްބީބީއެސް ހެދުމަށް ފަހު އެ ހޮސްޕިޓަލްގައި ޚިދުމަތްކޮށްފައިވާ މުއްދަތަށެވެ. އަދި ހިދުމަތުގެ މުއްދަތު އެއްވަރުވެއްޖެ ނަމަ ކެންޑިޑޭޓުން ހޮވާނީ އެކަޑަމިކް މެރިޓަށް ޕޮއިންޓް ދީގެން އެންމެ މަތިން ޕޮއިންޓް ލިބޭ ތަރުތީބުންނެވެ.
ސްކޮލަޝިލްތަކުގައި ކިޔަވަން ފުރުސަތު ލިބޭ ގައުމުތަކަކީ ނޭޕާލް، ސްރީލަންކާ، ބަންގްލަދޭޝް، ބޫޓާން، އިންޑިޔާ، ޕާކިސްތާން، އަފްގާނިސްތާން، ޗައިނާ، ފިލިޕީންސް، އިންޑޮނޭޝިއާ، މެލޭޝިޔާ، ތައިލެންޑް، ކިރިގިސްތާން، އަޒަރބައިޖާން، މޯލްޓާ، ޗެކް ރިޕަބްލިކް، މޮރިޝަސް، މިސްރު، ސައުތު އެފްރިކާ، އަލްޖީރިއާ އަދި ފިޖީ އެވެ.
ސްކޮލަޝިޕާ ބެހޭ އިތުރު މައުލޫމާތު ހެލްތު މިނިސްޓްރީގެ ވެބްސައިޓް www.mohe.gov.mv އާއި 3026947 އަދި 3026966 ނަންބަރުން ހޯދޭނެ އެވެ.