އަންނަ މާޗް މަހުގެ ހަތެއްގައި މަދޫރީ ޑިކްޝިޓް އާއި ޖޫހީ ޗަވްލާ މުހިއްމު ރޯލްތައް ކުޅެފައިވާ "ގުލާބް ގޭންގް" ރިލީޒް ކުރަން ހަމަޖެހިފައި ވަނިކޮށް، ހަމަ އެ ފިލްމުގެ ވާހަކައިގެ މައްޗަށް ބިނާކޮށް ހަދާފައިވާ ޑޮކިއުމަންޓްރީ ފިލްމް "ގުލާބީ ގޭންގް" އިންޑިއާގައި ރިލީޒް ކުރާ ގޮތަށް ހަމަޖައްސައިފި އެވެ.
މި ދެ ފިލްމުގައި ވެސް ދައްކުވައި ދެނީ އަންހެނުންނަށް ކުރާ ގެވެށި އަނިޔާތަކާ ދެކޮޅަށް އިންސާފު ހޯދަން، އަސުރުމާ ކުލައިގެ ސާޅީ އެޅި އަންހެން އެކްޓިވިސްޓް ގްރޫޕަކުން ކުރާ އަސަރު ގަދަ މަސައްކަތުގެ ވާހަކަ އެވެ.
އެގޮތުން "ގުލާބް ގޭންގް" އަކީ އަނުބަވް ސިންހާ ޕްރޮޑިއުސްކޮށް، ސޯމިކް ސެން ލިޔެ، ޑައިރެކްޓްކޮށްފައިވާ ފީޗާ ފިލްމެކެވެ.
"ގުލާބީ ގޭންގް" އަކީ 96 މިނިޓްގެ ޑޮކިއުމަންޓްރީއެކެވެ. މީގައި މައިގަނޑު ގޮތެއްގައި ދައްކުވައި ދޭނީ އެކްޓިވިސްޓް ގްޕޫރުގެ ލީޑަރު ސަމްޕަތު ޕާލް އިންސާފު ހޯދަން އޭނާގެ ޓީމާ އެކު ކުރާ މަސައްކަތެވެ.
މި ޑޮކިއުމަންޓްރީ ޑައިރެކްޓްކޮށްފައި ވަނީ ނިޝްތާ ޖެއިން އެވެ. އަދި މި ޑޮކިއުމަންޓްރީ ތައްޔާރުކޮށްފައި ވަނީ ކްރިޓިކުންގެ ތައުރީފު ވަރަށް ބޮޑަށް އޮހުނު ފިލްމެއް ކަމަށްވާ "ޝިޕް އޮފް ތީސީސް" ގެ އެކްޓަރު އަދި ޕްރޮޑިއުސަރު ސޯހަމް ޝާހްގެ ވަރަށް ބޮޑު ހިއްސާއަކާ އެކުގަ އެވެ.
"ގުލާބީ ގޭންގް" އާ ބެހޭ ގޮތުން ނިޝްތާ އާއި ސޯހަމް ވެސް ބުނީ މި ޑޮކިއުމަންޓްރީގެ ސަބަބުން މަދޫރީ އާއި ޖޫހީގެ ފިލްމް "ގުލާބް ގޭންގް" އަށް އެއްވެސް އަސަރެއް ނުކުރާނެ ކަމަށެވެ.
ބޮކްސް އޮފީހުގައި "ގުލާބް ގޭންގް" ބޮޑު ކާމިޔާބީއެއް ހޯދާނެކަން އެނގޭ އިރު، "ގުލާބީ ގޭންގް" ޕްރިމިއާ ކުރުމުގެ ބޭނުމަކީ އިންޑިއާގެ ވީހާ ވެސް ގިނަ ބަޔަކަށް މި ޑޮކިއުމަންޓްރީ ދެއްކުން ކަމަށް ނިޝްތާ އާއި ސޯހަމް ބުންޏެވެ.
ނިޝްތާ އިތުރަށް ބުނީ އޭނާގެ ޑޮކިއުމަންޓްރީއަކީ ކަމުގެ ހަގީގަތް އާންމުންނާ ހަމައަށް ގެނެސްދޭ ސީރިއަސް ފިލްމެއް ކަމަށެވެ.
އެހެން ނަމަވެސް "ގުލާބް ގޭންގް" އަކީ ބެލުންތެރިން މުނިފޫހި ފިލުވައި ދޭނެ، ވަރުގަދަ ބޮޑު ފިލްމެއް ކަމަށް ގަބޫލް ކުރާ ކަމަށް އޭނާ ބުންޏެވެ.
މަދޫރީ އާއި ޖޫހީގެ "ގުލާބް ގޭންގް" ދާދި ފަހުން ވަނީ ދުނިޔޭގެ ރެކޯޑް ފޮތަށް ވެސް އަރައިފަ އެވެ. އެއީ ފިލްމެއްގެ މިއުޒިކް ލޯންޗް ކުރަން މިހާތަނަށް ބޭއްވި އެންމެ ބޮޑު އިވެންޓާ އެކުގަ އެވެ.