ޕީޕީއެމްގެ ޓިކެޓްގައި ރައްޔިތުންގެ މަޖިލީހުގެ ސ. ފޭދޫ ދާއިރާ އަށް ހަތަރު މީހަކު ކުރިމަތިލައި، އޭގެ ތެރެއިން ބައެއް މީހުން ވަރުގަދަ އަށް ކެމްޕޭން ވެސް ކުރަމުން ދަނިކޮށް، އެ ދާއިރާގެ ޓިކެޓް ފޭދޫ ޕްރައިމެރީއަކާ ނުލައި. މޮހޮރީގޭ ހައްވާ ޒާހިރާ އަށް ދޭން ޕީޕީއެމުން ނިންމާފައިވާ ކަމުގެ އަޑުތަކެއް ފެތުރެން ފަށައިފި އެވެ.
ހައްވަގެ އިތުރުން އެ ދާއިރާ އަށް ދެން ވާދަ ކުރަނީ ޕީޕީއެމްގެ ފަރާތުން އިބްރާހީދީދީ (އައިބީ) އާއި މުހައްމަދު މަރުޒޫގް (މަރާ)ގެ އިތުރުން މުހައްމަދު މޫމިން (މޫނާ) އެވެ.
މީގެ ތެރެއިން އައިބީ އާއި މަރާ މިހާރު ވެސް އަންނަނީ ވަރަށް ބޮަޑަށް ކެމްޕޭން ކުރަމުންނެވެ. އެހެން ނަމަވެސް އަޑުތައް އިވޭ ގޮތުން،ފޭދޫ ރައްޔިތުންގެ މާ ބޮޑު ތާއީދެއް ނެތް ހައްވަ އަށް ޕްރައިމެރީ އާ ނުލައި ޓިކެޓް ދޭން ވަނީ ނިންމައިފަ އެވެ.
މިކަމާ ބެހޭ ގޮތުން ޕީޕީއެމްގެ ރަސްމީ ބަހެއް އަދި ވަނީ ލިބޭ ގޮތެއް ނުވެފަ އެވެ.
އަދި މިކަމާ ގުޅިގެން ޕީޕީއެމް ފޭދޫ ދާއިރާގެ ސަޕޯޓަރުންގެ ތެރޭގައި ވެސް ހިޔާލު ތަފާތުވުންތައް އުފެދި، ބައިބައިވެފައިވެ އެވެ.
ކުރިން އެސްޓީއޯގައި ގިނަ ދުވަސްތަކެއް ވަންދެން ވަޒީފާ އަދާ ކުރި ހައްވަ އަށް ޕްރައިމެރިއަކާ ނުލައި ޓިކެޓް ދޭން ނިންމާފައިވާ ކަމުގެ ވާހަކަތަކެއް ދެކެވެމުން އަންނަ އިރު، އޭނާ އިންތިހާބުގައި ވާދަ ކުރަން ނިންމި ކަމެއް ވެސް ފޭދޫގެ ގިނަ ބަޔަކަށް ނޭނގޭކަން ފާހަގަ ކުރެވެ އެވެ.
ކުރިން މި ހަފުތާގެ ތެރޭގައި ޕީޕީއެމްގެ ޕްރައިމެރީ ބާއްވާނެ ކަމަށް ބުނި ނަމަވެސް، ޕްރައިމެރީ ބާއްވާނެ ދުވަހެއް އަދި ވަނީ ނޭނގުމެއްގެ ތެރޭގަ އެވެ.
މިކަން މިހެން އޮއްވައި ޕްރައިމެރީއަކާ ނުލައި 13 ދާއިރާއެއްގެ ޓިކެޓް، މިހާރު ވެސް ޕީޕީއެމުން ވަނީ 13 މީހަކަށް ކަށަވަރުކޮށް ދީފަ އެވެ.